Expressiononline.net satının təqdimatı keçirilib

Bu gün Reportyorların Azadlıq və Təhlükəsizlik İnstitutunun mətbuat mərkəzində onlayn İfadə Təşəbbüsü (Expression Online Initiative) kampaniyasının expressiononline.net veb-səhifəsinin təqdimatı keçirilib.

Sayt haqqında məlumat verən Kampaniyanın koordinatoru Rəsul Cəfərov bildirib ki, saytın  yaradılmasında məqsəd 6-9 noyabr tarixində Bakı şəhərində keçiriləcək beynəlxalq İnternet İdarəçiliyi Forumunun (IGF) 7-ci toplantısı ərəfəsində Azərbaycanda internet  sahəsindəki mövcud durum barədə yerli və beynəlxalq  ictimaiyyətə  məlumat verməkdir.

Cəfərov oktyabr ayında Azərbaycanda İKT, internet azadlığı və idarəetməsi sahəsində vəziyyət haqqında hesabat hazırlanacağını bildirib. Kampaniyanın bütün məlumatları expressiononline.net saytında yerləşdiriləcək. Bundan başqa, kampaniyanın qaynar xətti fəaliyyət göstərəcək: (+99412) 408 80 02, (050) 508 78 87.

RATİ direktoru Emin Hüseynov bildirib ki, sayt Azərbaycan və ingilis dilində fəaliyyət göstərir, burada Bakıda keçiriləcək İnternet İdarəçilik Forumu ilə bağlı yaradılan milli veb səhifəsinə keçid və internet azadlığı bəyannaməsi yerləşdirilib. Yaxın iki həftə ərzində sayt tam hazır olacaq.

Emin Hüseynov Azərbaycanda internet azadlığı və internet istifadəçilərinin mövcud durumunu qismən azad kimi səciyyələndirib. Hüseynovun fikrincə, Azərbaycan bu məsələdə Gürcüstandan, Rusiyadan və Türkiyədən geridə qalır. 

Onun fikrincə, Azərbaycan hakimiyyətinin sözü ilə əməli üst-üstə düşmür. Belə ki, Hüseynov bu gün rəsmi şəxslərin əhalinin 65%-nin İnternetə çıxışı olduğunu dediyinə baxmayaraq, Azərbaycanda internet istifadəçilərinin sayının cəmi 40% təşkil etdiyini deyib.

Cəfərovun sözlərinə görə, kampaniya təşəbbüskarları yerli hakimiyyətlər vətəndaş cəmiyyətinin araşdırmalarına mane olduğu üçün regionlarda internetin vəziyyətinin araşdırılması üçün Prezident Aparatına və Rabitə və İnformasiya Texnologiyası Nazirliyinə   müraciət ediblər. O qeyd edib ki, administrasiya və RİTN belə bir əməkdaşlığa maraq göstəriblər. -16C-