Taleh Xasməmmədovun apellyasiya şikayətinə baxılması yenidən təxirə salınıb

Bu gün Şirvan Apellyasiya Məhkəməsində hüquq müdafiəçisi Taleh Xasməmmədovun apellyasiya şikayətinə baxılması oktyabrın 9-na qədər təxirə salınıb. Bu barədə Turan-a ictimai vəkil, “Siyasi məhbuslarsız Azərbaycan” QHT-nin həmtəsisçisi Oqtay Gülalıyev bildirib.

Hakim bu qərarı məhbusun məhkəməyə gətirilməsi üçün məhkəmə bildirişinin yetərsiz olması, xüsusi qərar tələb olunması haqqında yeni qaydalarla əsaslandırıb.

Gülalıyev hakimin əməllərini qanun pozuntusu kimi dəyərləndirib, belə ki, məhbusun doğmalarına və vəkillərinə bu barədə məlumat verilməyib.

Gülalıyev apellyasiya şikayətinə baxılmasının əsassız olaraq ləngidilməsinə diqqət çəkib. Şirvan Apellyasiya Məhkəməsində ilk iclas iyulun 10-da keçirilib, daha sonra prosesdə 2 aylıq fasilə elan edilib.

Xasməmmədovun siyasi səbəblərlə təqib edildiyi beynəlxalq səviyyədə də qəbul olunub, deyə Gülalıyev bildirib. Belə ki, beynəlxalq Amnesty İnternational təşkilatı hüquq müdafiəçisini azad etməyə çağırıb. Bundan başqa, o, AŞPA məruzəçisi Kristofer Ştrasserin tərtib etdiyi siyasi məhbuslar siyahısına daxil edilib.

* Xasməmmədov 2011-ci ilin noyabrında həbs edilib və bu il aprelin 20-də Göyçay rayon məhkəməsi tərəfindən 221.3 (xuliqanlıq) və 315.1 (polisə müqavimət göstərmə) maddələri ilə 4 il müddətinə azadlıqdan məhrum edilib.

Xasməmmədov hesab edir ki, ona qarşı ittiham Ucar polis rəhbərliyi tərəfindən saxtalaşdırılıb. Buna səbəb yerli polisin narkobiznes və insan alveri ilə məşğul olan cinayətkar sindikatla əlaqələri haqqında məqaləsinə görə saxta ittihamla həbs edilmiş jurnalist Fuad Hüseynovun hüquqlarını müdafiə etməsi olub. -06B-