Fəallar sərbəst buraxılıb (YENİLƏNİB)

Bu gün, iyunun 2-də Təhsil Nazirliyin qarşısında "Tələbənin tələbi cinayət deyil" adlı etiraz aksiyasını keçirən fəallar Gülnarə Mehdiyeva, Rəbiyyə Məmmədova və hadisəni çəkən reportyor Nərgiz Absalamova sərbəst buraxılıb. 

Rəbiyyə Məmmədovanın sözlərinə görə, fəallar və reportyor saxlanılaraq Nərimanov Rayon 18-ci polis bölməsinə gətirilib. "Bölmə rəisi bizimlə profilaktik söhbət aparıb, bizə izahat yazdırılıb. Daha sonra sərbəst buraxıldıq". 

"Dünən və bu gün Təhsil Nazirliyinin qarşısında bir qrup şəxs tərəfindən mövcud preventiv tədbirlərin şərtlərinin pozulması ilə müşayiət olunan icazəsiz aksiyalara cəhdlər göstərilib". 

Bunu Bakı Şəhər Baş Polis İdarəsinin mətbuat xidmətinin rəhbəri Elşad Hacıyev fəal Gülnarə Mehdiyevanın Təhsil Nazirliyin qarşısında "Tələbin tələbi cinayət deyil" adlı aksiyaya münasibət bildirərək deyib. O əlavə edib ki, xüsusi karantin rejim, sanitariya-gigiyenanın həssas dönəmində toplantıların, aksiyaların keçirilməsinə məhdudiyyət tətbiq olunub. 

Hacıyevin sözlərinə görə, həmin aksiyaları işıqlandıran jurnalistlər, iştirakçılarla birgə xüsusi karantin rejimi qaydalarına zidd olaraq, COVID-19 infeksiyasının həssas dönəmində sanitar-epidemioloji normaların pozulmasına zəmin yaradıblar. "Bununla ali məqsədi həqiqəti yaymaq, peşəkarlıq meyarı obyektivlik olan jurnalistlər tətbiq olunan xüsusi karantin rejim qaydalarına etinasızlıq nümayiş etdiriblər. Jurnalistlər əhalinin sağlamlığının effektiv qorunması naminə ictimai yerlərdə sosial məsafənin, mövcud preventiv tədbirlərin şərtlərinin pozulması ilə müşayiət olunan hallardan çəkinməli, vətəndaşlıq mövqeyi nümayiş etdirərək mövcud qaydalara əməl etməlidir”.

BŞBPİ-nin sözçüsü bildirib ki, polis tərəfindən jurnalistlərin sərbəst peşə fəaliyyətinin həyata keçirilməsi üçün əvvəlki dövrlərdə heç bir məhdudiyyət yaradılmayıb. "İndiki halda, COVID-19 pandemiyası ilə mübarizədə dövlət tərəfindən həyata keçirilən qabaqlayıcı tədbirlər nəzərə alınmalı, polisin qanunu tələblərinə əməl olunmalıdır. Jurnalist həmkarlarımdan xahiş edirəm ki, sosial məsuliyyətimizdən irəli gələrək özümüzü, yaxınlarımızı və cəmiyyət üzvlərini qorumaq üçün mövcud sanitar-gigiyenik qayda və tələblərə ciddi riayət edək. Bu ərəfədə hamını şəxsi gigiyena, eləcə də tibbi-profilaktik qaydalara əməl etməyə, ictimai yerlərdə kənar şəxslərlə minimum kontaktda olmağa, mövcud preventiv tədbirlərin şərtlərinə riayət etməyə çağırır, mövcud vəziyyətin həsasslığını nəzərə alaraq, xahişimin anlayışla qarşılanacağına ümid edirəm.

*   *   *

2020 İyun 02 (Çərşənbə axşamı) 19:56:19

Təhsil Nazirliyi qarşısında təkbaşına aksiya keçirən fəal saxlanılıb

Bakı/02.06.20/Turan: İyunun 2-də ictimai fəal Gülnarə Mehdiyeva Təhsil Nazirliyi qarşısında "Tələbənin tələbi cinayət deyil" şüarı ilə təkbaşına aksiya keçirib.

O, tələbələrin iyunun 1-də karantin rejimi ilə əlaqədar ali məktəblərdə ikinci semestr üçün təhsil haqqının ləğvi tələbi ilə keçirilən etiraz aksiyasının dağıdılmasına bu şəkildə etiraz edib.

"Tələbələr keçirilməyən dərslərə görə ödəniş etmək istəmirlər. Onlar tam haqlıdırlar. Tələbələrin təhsil haqqına ödəyəcəyi pulu qazanmaq üçün valideynlər bu ağır karantin dövründə böyük əziyyət çəkirlər. Tələbələrin tələbini haqlı hesab edirəm", deyə Mehdiyeva bildirib.

Hadisə yerinə gələn polis əməkdaşları onun aksiya keçirməsinə və jurnalistlərin işinə mane olublar. Mehdiyeva, həmçinin deputatlığa keçmiş namizəd Rəbiyyə Məmmədova və jurnalist Nərgiz Absalamova saxlanılıb.

Xatırladaq ki, dünən bir qrup tələbə və gənc fəal Təhsil Nazirliyi qarşısında "Ödənişi ləğv et!" və "İmtahanları ləğv et!" şüarları altında aksiya keçirib. Onlar yay imtahan sessiyasının və ikinci semestr üçün təhsil haqqının ləğvini tələb ediblər.

"Tələbə tələbi" təşəbbüs qrupunun rəhbəri Rüstəm İsmayılbəyli karantin rejiminin pozulması və polisə tabe olmama ittihamı ilə 15 gün müddətinə həbs edilib. Daha beş fəal cərimə edilib. -03B06-