F.Ələsgərov: Aleksandr Lapşin sağlamdır və istənilən vaxt İsrailə gedə bilər

Bakı/12.09.17/Turan: Azərbaycan prezidenti İlham Əliyev tərəfindən əfv olunduqdan sonra bloger Aleksandr Lapşin Azərbaycandan gedəcəyi yeri seçməkdə azaddır. Bu barədə Azərbaycan prezidentinin hüquq-mühafizə orqanları ilə iş üzrə köməkçisi Fuad Ələsgərov AzərTAc-a müsahibəsində bildirib.

Onun sözlərinə görə, Lapşin barəsində paralel olaraq iki hüquqi prosedura baxılıb - onun cəzasını çəkməsi üçün vətəndaşı olduğu İsrailə təhvil verilməsi və əfv olunması. "Lapşinin həm məhkəmə prosesi zamanı, həm də Azərbaycan Prezidentinə ünvanladığı müraciətlərdə törətdiyi cinayətdən səmimi peşmançılıq keçirdiyini etiraf etməsi, Azərbaycanın ərazi bütövlüyünü tanıdığını bildirməsi, ailə vəziyyəti, xüsusilə azyaşlı övladının olması nəzərə alınaraq, cənab Prezident onun əfv olunmasını mümkün hesab edib və bu barədə müvafiq Sərəncam imzalayıb", deyə Ələsgərov izah edib.

O, Lapşinin ekstradisiya olunacağı və ya başqa ölkəyə təhvil veriləcəyi haqqında məlumatlara da aydınlıq gətirib.

Aleksandr Lapşin əvf olunduğuna görə onun başqa ölkəyə təhvil verilməsi məsələsi gündəlikdən çıxarılıb. Beynəlxalq konvensiyalara görə, məhkum edilmiş şəxsin başqa dövlətə verilməsinin məqsədi onun cəzasını vətəndaşı olduğu ölkədə çəkməsidir. "Cənab Prezidentin əfv Sərəncamından sonra Aleksandr Lapşin cəzasının qalan hissəsini çəkməkdən azad edilib və o, gedəcəyi yeri müəyyənləşdirməkdə tam sərbəstdir", deyə Ələsgərov qeyd edib.

Onun sözlərinə görə, Lapşin vətəndaşı olduu İsrailə getmək istəyir. "O, sağlamdır, səhhətində heç bir problem yoxdur və istədiyi zaman İsrailə gedə bilər", deyə Ələsgərov qeyd edib.

O, Lapşinin əvfini Azərbaycan rəhbərliyinin növbəti humanizm aktı adlandırıb.

2003-cü ildən bu günə qədər 54 min şəxsi əhatə edən 5 amnistiya aktı qəbul edilib. Elə həmin müddət ərzində Azərbaycan prezidenti 3800-dən çox məhkuma şamil olunan 31 əvf fərmanı imzalayıb, deyə Ələsgərov bildirib.

Öz növbəsində, Lapşinin vəkili Eduard Çernin Turan-ın müxbirinə bildirib ki, bloger hazırda Mərkəzi Klinik Xəstəxanadadır və onun səhhəti normaldır, ölkədən getməsi üçün bütün sənədlər hazırdır.

Onun Azərbaycandan çıxmasında anası Bella Lapşinanın yanına gəlib, onunla birlikdə getmək arzusu ilə əlaqədar gecikmə yaşanıb.

Bununla əlaqədar Lapşinin gedişi 1-2 gün təxirə salınıb.

Bir müddət əvvəl prezidentin ictimai-siyasi məsələlər üzrə digər köməkçisi Əli Həsənov bildirib ki, Lapşinin əvfindən sonra onun "ekstradisiyası" məsələləri ilə Azərbaycan XİN və İsrail səfirliyi məşğul olur. -06D-