FHN növbəti məhkəməyə də məhəl qoymadı

Fövqəladə Hallar Nazirliyi Şirvan Apellyasiya Məhkəməsində 2010-cu il daşqını ilə bağlı iş üzrə prosesi növbəti dəfə pozub.

FHN nümayəndəsi yenə daşqından ziyan çəkən vətəndaşların şikayəti əsasında keçirilən məhkəməyə gəlməyib. 

Çərşənbə günü məhkəmə İmişli və Kürdəmir rayonunun 6 sakininin FHN-ə qarşı iddiasına baxmalı idi. Sakinlər hökumətin zərərçəkmişlərin evlərinin əsaslı təmiri və yeni evlərin tikintisi haqqında qərarının icrasını tələb edirlər.

Hakim Rafael Eyvazov FHN-ə iddialara cavab vermək tələbi ilə məktub göndərəcəyini bildirib.

Yaxın günlərdə Sabirabad rayonundan daha dörd qrup vətəndaşların iddiaları üzrə növbəti məhkəmə iclasları keçiriləcək. FHN-ə qarşı ümumilikdə 132 nəfər iddia qaldırıb.

Məhkəmə iclasları cavabdehin ünvanı üzrə Bakıda keçirilməli idi. Bir neçə iclasdan sonra şikayətçilərin və müdafiə tərəfin iştirakını çətinləşdirmək məqsədilə prosesləri Şirvana köçürüblər. Lakin buna müvəffəq olmayıblar və indi FHN sadəcə məhkəmələrə məhəl qoymur.

Daşqının nəticələrinin aradan qaldırılması üçün hökumət təxminən 500 mln. manat ayırıb. Bu vəsaitin əksər hissəsi FHN-in sərəncamına verilib. FHN-in həyata keçirdiyi tədbirlər geniş miqyaslı korrupsiya və vəsaitlərin mənimsənilməsi ilə müşaiyət olunub. -0-