FIFA U-17 qadınlararası dünya çempionatı başa çatır

Bu gün Four Seasons otelində “FIFA U-17 qadınlararası dünya çempionatı Azərbaycan 2012”nin başa çatmasına həsr olunmuş mətbuat konfransı keçirilib.

Mətbuat konfransında Yerli Təşkilat Komitəsinin infrastruktur və IT direktoru Elnur Məmmədov bildirib ki, Azərbaycan bu yarışmanı keçirməklə qadın futbolunun inkişafında mühüm bir addım atmış oldu. “Çempionat ərzində biz bütün imkanlarımızdan istifadə etdik. Təşkilatı məsələlərdə böyük təcrübəyə malik olduq. Bundan sonra keçiriləcək idman tədbirlərində kifayət qədər böyük təcrübəmiz və potensialımız var.

Daha sonra tədbirdə çıxış edən FIFA U-17 qadınlararası dünya çempionatının Təşkilat Komitəsinin üzvü Anastasiya Tsiklas yaradılan şəraitdən və göstərilən qayğıdan danışıb. 

“Gözəl infrastruktur yaradılmışdı, bütün təşkilati işlər yüksək səviyyədə həyata keçirilmişdi. Təəssüflər olsun ki, Azərbaycan komandası növbəti mərhələyə keçə bilmədi. Amma bu çempionatda iştirak etməklə komandanız böyük təcrübə qazanmış oldu. Artıq Azərbaycanda qadın futbol komandası olduğunu deyə bilərik”. 

Qeyd edək ki, bu, 17 yaşına qədər qızlar arasında üçüncü dünya çempionatıdır. Sentyabrın 22-dən start götürən çempionat oktyabrın 13-ü başa çatacaq. Tofiq Bəhramov adına stadionda saat 17.00-da Qana və Almaniya arasında 3 yer uğrunda oyun, final oyunu isə saat 20.00-da Fransa və Cənubi Koreya Respublikası arasında olacaq. -26C