Gəncədə etiraz aksiyası

Bakı/16.07.19/Turan: Gəncə hadisələri ilə əlaqədar ittiham olunanların anaları oğullarına ədalət tələbilə şəhərin əsas meydanında aksiya keçirməyə cəhd ediblər. Onlar hesab edirlər ki, oğulları günahsızdır, ittiham isə saxtalaşdırılıb.

Qadınlar övladlarına qarşı işgəncələrin araşdırılmasını, obyektiv məhkəmə və həbs edilənlərin azad olunmasını tələb edirlər.

Aksiya iştirakçıları saxlanılaraq Gəncə şəhəri Nizami Rayon Polis İdarəsinə aparılıb. Bir müddət sonra onları buraxıblar.

* 2018-ci il iyulun 3-də Gəncədə şəhərin o zamankı rəhbəri Elmar Vəliyevə qarşı sui-qəsd törədilib. Əslən Gəncədən olan Yunis Səfərov onu və onun cangüdənini yaralayıb.

Bundan sonra sosial şəbəkələrdə iyulun 10-na Gəncə administrasiyasının qarşısında E.Vəliyevin işinə etiraz olaraq aksiya təyin edilib.

İyulun 10-da axşam DİN Gəncədə iğtişaşlar barədə məlumat yayıb. Hadisələr zamanı iki polis əməkdaşı öldürülüb. Bunun ardınca dindarlar arasında kütləvi həbslər baş verib. 60-a yaxın adam cinayət məsuliyyətinə cəlb edilib. Silahlı müqavimət zamanı 6 nəfər öldürülüb.

Gəncə Ağır Cinayətlər Məhkəməsi 40 nəfərdən ibarət 5 qrupun barəsində hökm çıxarıb. Onlar 5 ildən 8 ilədək azadlıqdan məhrum ediliblər. İki qrupun işi üzrə proses davam edir. Bütün proseslər Bakının Sabunçu Rayon Məhkəməsində keçirilib.

Bundan əlavə, Lənkəran Ağır Cinayətlər Məhkəməsi 8 nəfərdən ibarət qrupu mühakimə edib. Onlar 12 ildən 14 ilədək cəza alıblar.

Həmin şəxslər başqa cinayətlərə görə mühakimə olunublar, lakin hüquq müdafiəçisinin qeyd etdiyi kimi, Gəncə hadisələrindən dərhal sonra həbs ediliblər.

Digər 16 nəfər, o cümlədən Gəncənin keçmiş icra başçısına atəş açmış Yunis Səfərov hələ də istintaq altındadır. 06D--