Gənclər narkomaniyaya qarşı mübarizə aparmaq istəyirlər

“Narkomaniyaya qarşı Mübarizə” İctimai Birliyi çərşənbə axşamı Beynəlxalq Mətbuat Mərkəzində (BMM) təqdimat mərasimi keçirib.

Qurumun rəhbəri Azər Mustafayev təşkilatı cəmi 20 gün öncə təsis etdiklərini deyib. Əsas məqsəd narkomaniyaya və o cümlədən, narkomaniyanın gənclərin arasında yayılmasına qarşı mübarizə aparmaqdır. 

A.Mustafayev narkomaniyanın Azərbaycanda da yayıldığını deyib. Ölkədə rəsmi olaraq 26 min nəfərdən çox narkomanın qeydə alındığı nəzərə çatdırılıb. Amma qeyri-rəsmi sayın isə rəsmidən bir neçə dəfə çox olduğu vurğulanıb. Ölkənin erməni işğalı nəticəsində nəzarətsiz qalan ərazilərinin narkobiznes üçün baza rolu oynadığı, bu ərazilərin narkotranzitə çevrildiyi qeyd edilib. Qafqaz zonası narkotik dövriyyəsi baxımından “riskli zonalar” sırasına aid edilir. 

Daha sonra nakomaniyanın aradan qaldırılması yollarına toxunulub. Çıxış edən ayrı-ayrı natiqlərin fikrincə, bu məsələdə maarifləndirmə əsas rol oynayır. Ayrı-ayrı risk qrupları ilə maarifləndirici tədbirlər keçirilməsi vacibdir. Daha bir mübarizə yolu kimi idmanla məşğul olmaq göstərilib. Bu bəlaya qarşı daha bir mübarizə vasitəsi kimi ailə və vətəndaş cəmiyyəti institutlarının gücləndirilməsi hesab edilib. Gənclərin müstəqilliynə xələl gətirmədən onları xoşagəlməz vərdişlərdən kənar saxlamaq üçün nəzarət etməyin lazımlığı vurğulanıb. 

Ayrı-ayrı cəmiyyətlərin rəhbərləri birliyə uğurlar arzu ediblər. -05C-