Göygöldə atışma - torpaq davası

Yanvarın 7-də Göygöl rayonu Qızılqaya qəsəbəsinin ərazisində yerləşən “Duru” kafesinə gəlmiş şəxslər havaya və otaqların tavanına ov tüfəngindən atəş açaraq gediblər. Bu barədə Daxili İşlər Nazirliyinin mətbuat xidməti məlumat yayıb. 

Xəbərdə deyilir ki, hadisə nəticəsində xəsarət alan olmayıb, kafeyə qismən ziyan dəyib. Hadisə yerinə baxış zamanı 1 ədəd patron və 16 ədəd boş giliz aşkar edilərək götürülüb. 

Göygöl rayon Polis Şöbəsinin əməkdaşları hadisəni törətmiş Göygöl şəhər sakinləri Müşfiq Hacıyev, Nuriddin Hacıyev, Gəncə şəhər sakini Azər Əliyev və Bakı şəhər sakini Tahir Rəhimov saxlayıb. 

M.Hacıyevdən müvafiq sənədləri olan “Sayqa-410 K” markalı silah, güllə darağı və 21 ədəd güllə, N.Hacıyevdən isə müvafiq sənədləri olmayan “Maverlick” markalı ov tüfəngi və 3 ədəd güllə götürülüb.

Mətbuat xidmətinin məlumatında hadisənin səbəbləri göstərilmir. 

Öz növbəsində, “Azadlıq” qəzeti mübahisənin bir neçə gün əvvəldən Samux rayonunun ərazisində torpaq üstündə yarandığını yazır.  Qəzetin bölgə müxbiri yerli mənbələrə istinadən “Duru” kafesindəki silahlı qarşıdurmanı torpaq mübahisəsinin davamı olduğunu bildirir. Qəzet atışma zamanı bir nəfərin yaralandığını da yazır. -03B-