Hakim hüquq müdafiəçisi Rəsul Cəfərovu hədələyib (YENİLƏNİB)

Yanvarın 22-də günün ikinci yarısında Ağır Cinayətlərə dair İşlər üzrə Şəki Məhkəməsində İsmayıllı hadisələri üzrə proses şahidlərin ifadələri ilə davam edib.

Əvvəlcə İsmayıllı səfərində ReAl lideri İlqar Məmmədovu müşaiyət edən ReAl hərəkatının icraçı katibi Natiq Cəfərli və “Zerkalo” qəzetinin müxbiri Nicat Məlikov ifadə verib. 

Hər iki şahid bildirib ki, cəmi bir saat – 16.00-dan 17.00-a qədər Məmmədovla birlikdə İsmayıllıda olublar. Bu müddət ərzində sakinlər və polis arasında heç bir qarşıdurma olmayıb. Məmmədov sadəcə toplaşan insanlarla söhbət edib.

Şahidlər həmçinin prokurorun və hakimin suallarını cavablandırıblar. Özləri ilə əleyhqaz aparıb-aparmadıqları barədə suala Cəfərli “əlbəttə yox, biz Fələstinə getməyə hazırlaşmırdıq” deyə cavam verib.

Daha sonra İsmayıllı sakinləri Rövşən Novruzov və İsrafil Verdiyevin ifadələri dinlənilib. Onlar Məmmədovun və Müsavat Partiyasının sədr müavini Tofiq Yaqublunun insanları iğtişaşlara təhrik etdiklərini gördüklərini iddia ediblər.

Lakin onların ifadələri digər şahidlərin ifadələri ilə ziddiyyət təşkil edib və zalda narazılığa səbəb olub. Lakin hakim nədənsə hüquq müdafiəçisi Rəsul Cəfərovu yerindən qaldıraraq, onu əl çalmaqda ittiham edib. Hüquq müdafiəçisi bunu etmədiyini dedikdə hakim deyib: “deməli danışırdın” və Cəfərovun zalı tərk etməsini tələb edib. Buna cavabda Cəfərov “məhkəmənin ədalətsiz olduğunu” bəyan edib, hakim isə polislərə “tədbir görmək üçün” onun şəxsiyyət vəsiqəsini alıb surətini çıxarmağı əmr edib.

Proses başa çatana qədər polislər Cəfərovla söhbət ediblər, daha sonra onu sərbəst buraxıblar.

İclas yanvarın 27-də davam edəcək. -06С- 

2014 Yanvar 22 (Çərşənbə) 13:59:47

 Bu gün Şəki Ağır Cinayətlər Məhkəməsində İsmayıllı hadisələri üzrə dinləmələr davam edib.

İclas başlamazdan öncə vəkillər müttəhim T.Yaqubluya bildiriblər ki, dünən onun həyat yoldaşı, qızı, vəkil Xalid Bağırov və Müsavat Partiyasının fəalı Çingiz Əli yol qəzasına düşüblər. T.Yaqubluya doğmaları ilə telefon əlaqəsi saxlamaq imkanı verilib. 

Məhkəmə iclası zamanı 19 şahid və 2 zərərçəkən dindirilib. Hüquq müdafiəçisi Rəsul Cəfərov Turan-a bildirib ki, dindirilənlərin heç biri müttəhimlərin əleyhinə ifadə verməyib. 

İki nəfər zərərçəkən “Çıraq” otelində qalan şəxslər olub. Bakı sakinləri olan bu adamlar otel yanarkən gecələyə bilmədiklərinə görə zərərçəkən kimi tanınıblar. Onların hər birinə dəyən zərər 40 manat həcmində dəyərləndirilib. Onlar bildiriblər ki, müttəhimlərə qarşı heç bir iradları yoxdur və onların tezliklə azadlığa buraxılmasını istəyirlər.

Dəyən zərərlə bağlı şikayət edib-etməmələri barədə hakimin sualına cavab verən zərərçəkənlər işarə ediblər ki, onları buna məcbur ediblər. 

Şahidlər həmçinin bildiriblər ki, iğtişaş iştirakçılar arasında heç kimi tanımayıblar. 

Qeyd edək ki, 24  yanvar hadisələri üzrə şahidlər bildiriblər ki, polislə yerli sakinlər arasında toqquşmalar qaranlıq düşəndə başlayıb. Bu isə T.Yaqublu və REAL lideri İlqar Məmmədovun iğtişaşların təşkili və iştirakı barədə istintaqın versiyasını təkzib edir. Çünki istintaqın öz məlumatına görə, onlar İsmayıllıya saat 16.00 və 17.00 arasında olublar

Prokurorun təkidli suallarına baxmayaraq, şahidlər birmənalı olaraq cavab veriblər ki, hadisələr axşam qaranlıqda baş verib.

Bəzi şahidlər inzibati həbsə məruz qalanların arasından olub. Həmin şəxslər bildiriblər ki, onları küçədə tutublar. Onlardan biri, avtomobil yuma məntəqəsinin işçisi obyekti bağlayaraq evə getdiyi yerdə saxlayıblar.

Günün ikinci yarısında İlqar Məmmədovla birlikdə İsmayıllıya gedən şahidlərin ifadələri dinləniləcək.-06D-