Hakimiyyət QHT koalisiyasını parçalamaq istəyir

İctimai Birliklərin “Mədən sənayesində şəffaflığın artırılması” (MSŞA) Koalisiyasının koordinatoru Qubad İbadoğlu öz facebook səhifəsində koalisiyanın açıqlamasını yerləşdirib. Açıqlamada deyilir:

"MSŞA QHT Koalisiyası bildirir ki, MHŞT tərəfləri arasında 10 iyun 2014-cü ildə imzalanmış Memorandum çərçivəsində, Azərbaycan Respublikasında tətbiq olunan MHŞT prosesini təkmilləşdirmək, prosesin inkişafı üzərində səmərəli çoxtərəfli nəzarəti və idarəetməni təmin etmək məqsədi ilə Tərəflərin nümayəndələrindən ibarət ÇQ təşkil edilir. Çoxtərəfli Qrupda (ÇTQ) Koalisiya üzvlərinin fəaliyyəti Reqlamentinin ÇTQ üzvlərinin seçkisi hər ilin başlanğıcında olan Şura iclasında yenidən aparılır. Odur ki, MSŞA QHT Koalisiyası 20 yanvar 2017-ci ildə təşkil olunmuş bu ilin birinci, ümumilikdə 168-ci iclasında əvvəlcədən bəyan edilmiş namizədlər arasından sadə səs çoxluğu və gizli səsvermə ilə 6 nəfəri (3 əsas və 3 alternativ) ÇTQ-yə üzv seçmiş və Mədən Hasilatı üzrə Şəffaflıq Təşəbbüsünün Azərbaycan Respublikasında tətbiqinə dair qarşılıqlı anlaşma haqqında Memorandumunun 1.2.2. maddəsinə müvafiq olaraq Memorandum Tərəfi olaraq təyin etdikləri əsas və əvəzedici üzvlərin siyahısını MHŞT üzrə Katibliyə təqdim etmişdir. Hər il mübahisəsiz qəbul edilən yeni üzvlərin siyahısı təəssüflər olsun ki, bu il səlahiyyət müddəti başa çatmış Koalisiya Şurasının üzvü Əliməmməd Nuriyevin şikayəti əsasında ÇTQ-nin 02 fevral 2017-ci tarixli iclasında müzakirələr açılmışdır. ÇTQ iclasından əvvəl MSŞA Koalisiya Şurası Memorandum tərəflərinə və Katibliyə müraciət edərək bildirmişdir ki, belə tip məsələlər tərəflərin iştirakı ilə ÇTQ-də deyil, hər bir tərəfin təmsil etdiyi qrupda müzakirə olunmalıdır. Lakin buna baxmayaraq, MSŞT Katibliyi tərəfindən ÇTQ iclasına Koalisiya Şurasının üzvü Əliməmməd Nuriyevin də daxil olduğu səlahiyyət müddəti başa çatmış köhnə üzvlər də dəvət olunmuşdur. Onlardan yalnız Əliməmməd Nuriyev və Sabit Bağırov iclasa qatılmış və konsensusu pozaraq ÇTQ-nin növbəti iclasında gündəliyin təsdiq olunmasına mane olmuşdur. Gündəliyin təsdiqi ətrafında gedən 1 saata qədər səmərəsiz müzakirələr nəticəsində iclasın pozulması səbəbindən ÇTQ-yə yeni seçilmiş üzvlər səlahiyyət müddəti başa çatmış ÇTQ üzvlərinin MHŞT Katibliyi tərəfindən yenidən iclasa dəvət olunmasına etiraz edərək ÇTQ iclasını tərk etmişdir. Bundan sonra MSŞA QHT Koalisiyasının üzvlərinə Çoxtərəfli Qrupda təmsilçiliyinə dair yaranmış problemlə bağlı Hökumət Komissiyasının sədri ilə 7 fevral tarixində Dövlət Neft Fondunun inzibati binasında görüşün keçirilməsi təklif edilib və bütün Koalisiya üzvləri bu görüşə dəvət edilib.

Bununla əlaqədar MSŞA Koalisiyası bildirir ki, MHŞT 1.3. standartının ii. bəndinə görə, hər bir maraqlı tərəf plüralist və dəyişkən təmsilçilik istəyini nəzərə alaraq, öz nümayəndəsini seçmək hüququna malik olmalıdır. Təyinat prosesi müstəqil və hər hansı məcburiyyət faktından uzaq olmalıdır. MHŞT-yə Çoxtərəfli qrupun üzvləri kimi cəlb edilmiş vətəndaş cəmiyyəti qrupları əməliyyat və siyasət baxımından dövlətdən və/yaxud digər şirkətlərdən azad olmalıdırlar. MSŞA QHT Koalisiyası bildirir ki, vətəndaş cəmiyyətinin ÇTQ-də iştirakı problemlərini həll etmək Memorandum tərəfi olaraq Hökümətin səlahiyyətinə aid deyildir, bu məsələyə müdaxilə etməklə MHŞT üzrə komissiyasi səlahiyyət həddini aşmışdır. Biz MHŞT üzrə ÇTQ təmsilçilik məsələsində nə hökümətin və nə də ki, şirkətlərin işinə qarışmadığımız kimi, onlar da bizim işimizə müdaxilə etməməlidir. Lakin, göründüyü kimi, MSŞT Komissiyası açıq şəkildə Koalisiyanın daxili işlərinə müdaxilə edir və onun Memorandumda təsbit olunan müstəqilliyinə xələl gətirir. MSŞA QHT Koalisiyası hesab edir ki, belə açıq və kobud müdaxilə eyni zamanda MHŞT üzrə Komissiyasının istəklərinə uyğun gələn vətəndaş cəmiyyəti təmsilçilərinin ÇTQ-də təmsilçiliyinə olan maraqdan irəli gəlir. Çünki onlar müstəqil vətəndaş cəmiyyətinin ÇTQ-də təmsilçiliyini istəmir, onların ÇTQ-də iştirakını əngəlləyirək səsinin boğulmasına çalışırlar.

MSŞA Koalisiyası bu tip görüşlərin Koalisiya Şurası ilə aparılmasını məqsədəmüvafiq hesab etmiş və ötən il ərzində bu məqsədlə dəfələrlə rəsmi müraciət etməklərinə baxmayaraq, MSŞT Komissiyasının sədri Şahmar Mövsümov Şura üzvləri ilə görüşdən imtina edib. Baxmayaraq ki, belə bir görüş həm də 2016-ci ilin İş Planında nəzərdə tutulmuş, lakin qarşı tərəfin istəyinin olmamasına görə icra edilməmişdir.

MSŞA QHT Koalisiyasının Şurası belə hesab edir ki, MHŞT Komissiyasının sədri Şahmar Mövsümovun timsalında hökümətin MSŞA QHT Koalisiyasının fəaliyyətinə bu şəkildə kobud müdaxilə etməsi vətəndaş cəmiyyətinin təmsilçisi olaraq QHT Koalisiyasının parçalanmasını stimullaşdırmaq və qurumu nəzarətə götürmək məqsədi daşıyır.

MSŞA QHT Koalisiyasının Şurası Koalisiyanın üzvlərinin MHŞT Komissiyasının sədri Şahmar Mövsümovun təşəbbüsü ilə 07 fevral 2017-ci ildə Dövlət Neft Fondunda təşkil olunan görüşə qatılmasını məqbul hesab etmir". -06D-