Hava normallaşır

Bakı/25.02.21/Turan: Fevralın 25-də gecə və səhər Azərbaycan ərazisində ən aşağı hava temperaturu ölkənin şimalında Quba-Xaçmaz regionunda qeydə alınıb. Burada termometrlərin cirə sütunu 13-17 dərəcə şaxta göstərib, xəbəri Ekologiya Nazirliyi yayıb.

Qəbələ, Zaqatala, Şəki rayonlarında temperatur -6 -10 dərəcəyə qədər düşüb.

Güclü qar yağışı nəticəsində bəzi yerlərdə qar örtüyünün hündürlüyü 50 santimetrə çatıb.

Bakıda və Abşeronda da qeyri-adi şaxtalı hava şəraiti müşahidə olunub, burada havanın temperaturu -6 dərəcəyə qədər düşüb.

Amma fevralın 25-də günün ikinci yarısından etibarən paytaxtda havanın temperaturu tədricən sıfırdan yuxarı qalxacaq, yağıntı gözlənilmir.

Neft Daşlarında dalğaların yüksəkliyi artıq 4 metrdən 2,5 metrə qədər enib.

Yolları buz bağlaması səbəbindən travmalarla əlaqədar tibbi yardım üçün müraciət edən şəxslərin sayı artıb.

Bakı Təcili və Təxirəsalınmaz Tibbi Yardım Stansiyasından verilən məlumata görə, ötən gün ərzində qar və buzda yıxılma nəticəsində 64 nəfər – o cümlədən 35 kişi, 29 qadın müxtəlif dərəcəli xəsarətlər alıb. -03D05/06-