Hərbi Prokurorluq əsgər Ç.Tarverdiyevin yaralanması haqqında

Yanvarın 27-də Tovuz rayonundakı hərbi hissələrdən birində baş vermiş silahlı insident faktı üzrə cinayət işi başlayıb.

Bir müddət əvvəl əsgər Çingiz Tanrıverdiyevin atası Aydın Tanrıverdiyev KİV-ə bildirib ki, oğlu hərbi hissənin yüksək vəzifəli zabiti tərəfindən güllələnib və ona lazımi tibbi yardım göstərilmir.

Öz növbəsində, Hərbi Prokurorluqdan Turan-a bildiriblər ki, əsgər Çingiz Tarverdiyev 2014-cü ilin may ayında öz sağlamlığına ziyan vurmaqla xidmətdən yayınmaya görə  5 ay müddətinə intizam xarakterli hərbi hissədə saxlama cəzasına məhkum edilib.

Cəzasını çəkdikdən sonra dekabrda o, xidmətini davam etdirmək üçün Müdafiə Nazirliyinin N saylı hərbi hissəsinə göndərilib.

Yanvarın 27-də saat 06:00-da mühafizə növbəsində olarkən o, əsgər yoldaşı ilə mübahisə edib, daha sonra xidməti istifadəsində olan silahdan mübahisə etdiyi əsgərin başı üzərindən havaya atəş açıb.

Daha sonra o, digər əsgərdən silahını istəyib. Tarverdiyev digər əsgərin başı üzərindən də iki dəfə atəş açıb. Daha sonra avtomatı öz çənəsinə dirəyərək, əsgər yoldaşı avtomatı ona vermədiyi təqdirdə özünü güllələcəyi ilə hədələyib.

Bundan sonra Tarverdiyev əlində iki avtomatla əsgər yataqxanasının qarşısına gedib və “tabor düzülsün” deyə qışqıraraq, havaya atəş açmağa başlayıb, əsgər yoldaşının mobil telefonunu yerə çırparaq sındırıb.

O, yenidən avtomatı çənəsinə dirəyərək hədələməyə başlayıb. Əsgər yoldaşları ona mane olmağa çalışsa da, o, bir dəfə atəş açıb, güllə başına dəyib.

Tarverdiyəv təcili olaraq hospitala çatdırılıb və ona təpə-gicgah nahiyəsindən əməliyyat edilib, müalicə davam edir.

Faktla bağlı CM-in 335.1 (öz sağlamlığına ziyan vurmaqla hərbi xidmətdən boyun qaçırma) və 349.1-ci (hərbi əmlakı qəsdən məhv etmə və ya zədələmə) maddələri ilə cinayət işi açılıb. -06D-