Hüquq müdafiəçisi Elşən Həsənov İrana buraxılmayıb (YENİLƏNİB)

Siyasi Məhbusların Monitorinq Mərkəzinin rəhbəri, keçmiş “siyasi məhbus” Elşən Həsənov İrana buraxılmayıb.

Xatırladaq ki, bazar ertəsi səhər “Biləsuvar” sərhəd-buraxılış məntəqəsində  E.Həsənova bildirilib ki, Ədliyyə Nazirliyi onun ölkədən çıxışına qadağa qoyub. Eyni zamanda onunla çox kobud davranıblar, alt paltarına kimi soyunduraraq üst-başını yoxlayıblar. Sonradan “nəzakətli” zabitlər işə müdaxilə edərək bildiriblər ki, E.Həsənovu tanıyırlar və onun ölkədən çıxışında problem yoxdur.

“Düşündüm ki, məsələ yoluna qoyuldu. Lakin son anda məni yenidən geri qaytardılar”, - E.Həsənov bildirib. O, baş verənləri özbaşınalıq adlandırıb və onun hüquqlarını pozan şəxslərin cəzalandırılmasına nail olmaq niyyətini açıqlayıb.—06D-

2015 Aprel 13 (Bazar ertəsi) 13:28:54

Siyasi Məhbusların Monitorinqi Mərkəzinin rəhbəri, keçmiş “vicdan məhbusu” Elşən Həsənov bu gün müalicə üçün İrana gedərkən Biləsuvar nəzarət-buraxılış məntəqəsində saxlanılıb.

Həsənovun Turan agentliyinə verdiyi məlumata görə, çavuş rütbəli növbətçi sərhədçilər əvvəlcə Ədliyyə Nazirliyinin 2013-cü il tarixli hansısa qərarına istinad edərək onu sərhəddən buraxmaqdan imtina ediblər.

Qeyd edək ki, Həsənov müxalifətin 2011-ci il 2 aprel mitinqində iştiraka görə azadlıqdan məhrum edilmişdi. 2012-ci ildə o, azad edilib, bundan sonra artıq Gürcüstana səfər edib.

Həsənovun sözlərinə görə, sərhədçilər onu alçaldıcı şəkildə axtarışa məruz qoyublar, alt paltarına qədər soyundurublar. Lakin gözlənilmədən sərhəd xidməti zabitlərinin müdaxiləsindən sonra hər şey dəyişib. Zabitlər Həsənovu tanıdıqlarını deyiblər və onu sərhəddən buraxıblar.

Turan-ın Dövlət Sərhəd Xidmətindən şərh almaq cəhdlər nəticə verməyib. -06B-