Hüseyn Abdullayev məhkəmə prosesində AFR səfirliyinin nümayəndələrinin iştirakını istəyir

Bakı/02.04.19/Turan: Ötən il Türkiyədən Azərbaycana ekstradisiya olunmuş keçmiş biznesmen və deputat Hüseyn Abdullayev bu gün Bakı Hərbi Məhkəməsinə çıxarılıb.

İşdə onun anası Zeynəb Abdullayeva da təqsirləndirilən şəxs qismində keçir, ondan ölkəni tərk etməmək haqqında iltizam alınıb.

İşə Hərbi Məhkəmə baxır, belə ki, təqsirləndirilən 7 şəxs arasında hərbi qulluqçular-sərhədçilər də var.

Cinayət işi "qanunsuz sahibkarlıq", "fırıldaqçılıq", "hədələmə yolu ilə pul tələb etmə", "vergi ödənişindən yayınma" və s. maddələrlə araşdırılırdı.

Bu gün hazırlıq iclasında Abdullayevin və anasının vəkilləri cinayət işinə xitam verilməsi, bu olmasa, sabiq deputatın ev dustaqlığına keçirilməsi haqqında vəsatət qaldırıblar.

Abdullayev özü ittihamın əsassız olduğunu bildirib.

O deyib ki, bir ildir həbsdədir və bu müddət ərzində ailə üzvləri ilə nə görüşə, nə telefonla danışa bilməyib.

Abdullayev bu məhdudiyyətlərin aradan qaldırılmasını xahiş edib.

Amma hakim Həbib Həsənov deyib ki, bu məsələ məhkəmənin səlahiyyətlərinə aid deyil.

Abdullayev həmçinin AFR səfirliyinin nümayəndəsinin məhkəməyə dəvət edilməsini xahiş edib, belə ki, bir müddət əvvəl o, Almaniyadan siyasi sığınacaq alıb.

Buna cavabda hakim deyib ki, proses açıq olduğuna görə arzu edənlər prosesdə iştirak edə bilərlər.

Digər məhbusların vəkilləri də müvəkkillərinin ev dustaqlığına keçirilməsi barədə vəsatət qaldırıblar. Təqsirləndirilən üç şəxs - Həbib İbrahimov, Zaur Quliyev və Pərviz Kazımov barəsində vəsatətlər təmin edilib və onlar məhkəmə zalından sərbəst buraxılıblar. Hər üçü sərhədçidir.

İttiham aktına əsasən, cinayət işi 2018-ci il fevralın 14-də müxtəlif şəxslərin şikayətləri əsasında açılıb. 28 nəfər zərərçəkmiş hesab edilib.

Məhkəmə təhqiqatı davam edir.

** Hüseyn Abdullayev 2013-cü ildə hakimiyyətlə münaqişədən sonra Azərbaycandan mühacirət edib, daha sonra ona qarşı vergi ittihamı ilə cinayət işi açılıb. 2018-ci il aprelin 22-də o, Almaniyadan Türkiyəyə gəlib və burada saxlanılıb, Azərbaycana ekstradisiya edilib.

Abdullayev həmçinin CM-in 192.2.2 (qanunsuz sahibkarlıq, böyük gəlir əldə edilməklə törədildikdə), 178.2.1 (fırıldaqçılıq), 178.2.2, 178.2.4 (fırıldaqçılıq), 182.2.1 (əvvəlcədən əlbir olmuş şəxslər tərəfindən hədələmə yolu ilə pul tələb etmə), 182.2.2 (eyni hərəkətlər təkrar törədildikdə) və 182.2.4-cü (eyni hərəkətlər zərərçəkmişə böyük ziyan vurulmaqla törədildikdə) ittihamları ilə ittiham olunub.

Fevralın 1-də təqsirləndirilən şəxsin anası Zeynəb Abdullayeva prezident İlham Əliyevə oğluna qarşı humanizm və mərhəmət nümayiş etdirmək xahişi ilə müraciət edib. O, yaşlı olduğunu və Abdullayevin özünün səhhətində ciddi problemlər olduğunu nəzərə almağı xahiş edib. -06D-