İlham Əliyev 2016-cı il aprel döyüşləri haqqında danışıb

Bakı/02.04.19/Turan: Bu gün Azərbaycan prezidenti İlham Əliyev ölkə Silahlı Qüvvələrinin Xüsusi Təyinatlı Qüvvələrinin hərbi hissəsinə baş çəkib. Şəxsi heyət qarşısında çıxış edən Əliyev Azərbaycan ordusunun uğurla inkişaf etdiyini, onun ən müasir texnika və silahlarla təchiz edildiyini qeyd edib.

2016-cı il aprel döyüşlərinin üçüncü ildönümü olduğunu xatırladan Əliyev onları "tarixi qələbəmiz", "müasir tariximizdə ən uğurlu hərbi əməliyyatlardan biri" adlandırıb.

Aprel döyüşləri zamanı Ağdərə, Füzuli, Cəbrayıl rayonlarının minlərlə hektarlıq hissəsi işğaldan azad edilib.

Aprel döyüşlərindəki uğurların ardınca Azərbaycan ordusu Naxçıvan istiqamətində strateji yüksəkliklər üzərində nəzarət əldə edib.

Əliyevin sözlərinə görə, münaqişənin həlli məsələsində Azərbaycanın mövqeyi dəyişməz olaraq qalır.

"Bu münaqişə yalnız Azərbaycanın ərazi bütövlüyü çərçivəsində həll oluna bilər", deyə o bildirib. Bütün dünya Dağlıq Qarabağı Azərbaycanın tərkib hissəsi kimi tanıyır və bu, bütün nüfuzlu beynəlxalq təşkilatların qətnamələrində və qərarlarında əksini tapıb.

"Heç bir ölkə qondarma "Dağlıq Qarabağ respublikası"nı tanımayıb, əminəm ki, tanımayacaqdır", deyə Əliyev bildirib. Buna görə danışıqların əsas məqsədi işğal edilmiş ərazilərin azad edilməsidir.

Əliyev xatırladıb ki, Ermənistanın yeni rəhbərliyi danışıqlar formatını dəyişdirmək istəyirdi. Amma Azərbaycanın birmənalı mövqeyi buna imkan verməyib.

"Münaqişə Ermənistan ilə Azərbaycan arasındadır. Bizim torpaqlarımızı Ermənistan işğal edibdir. İşğal edilmiş torpaqlarda qarşı tərəfdə hərbçilərin 80 faizi Ermənistan vətəndaşlarıdır. Ona görə danışıqlar prosesi də iki ölkə arasında aparılmalıdır və aparılır. Son Vyana görüşü, o cümlədən ona görə önəmli idi ki, bu mövcud formatı bir daha təsdiqlədi", deyə Əliyev bildirib.

"Haqq-ədalət, tarixi həqiqət bizim tərəfimizdədir. İqtisadi güc də, hərbi güc də bizim tərəfimizdədir. Son illərdə görülmüş işlər, hərbi sahədə aparılan islahatlar, hərbi gücümüzün artırılması, həm siyasi meydanlarda, həm də döyüş meydanlarında qələbələr bizi daha da ruhlandırır, daha da gücləndirir", deyə Azərbaycan dövlət başçısı qeyd edib. -06D-