İctimai birliyə tədbir keçirməyə yer verilməyib

“Marriott” Abşeron oteli  “Qadınlar Rasional İnkişaf Uğrunda” İctimai Birliyinin çərşənbə gününə nəzərdə tutulan tədbirinə yer verməkdən imtina edib.

Qurum “Qadınlar sülh quruculuğunda: regional yol xəritəsi” ilə bağlı layihəyə dair yekun təqdimat konfransı keçirməyi nəzərdə tuturdu. Quruma tədbirə görə yer verilməməsinin səbəbləri  izah olunmayıb.

Tədbirin təşkilatçısı Şəhla İsmayılın Turan-a açıqlamasında deyilir ki, yerlə bağlı 15 gün öncə tərəflər arasında razılaşma əldə olunub. Amma aprelin 15-də axşam saatlarında otel administrasiyası təşkilatçı tərəfə tədbiri təxirə saldığını bildirib. Bütün səylərə baxmayaraq, qurum hüquqlarını bərpa edə bilməyib.

Dağlıq Qarabağ mövzusuna aid olan layihə il ərzində 80 insanın əməyilə gerşəkləşib və tədbirdə məqsəd layihənin nəticələrini ictimaiyyətə təqdim etmək idi. Təşkilatçılar tədbirin qarşısını alanlara “ar olsun” mesajını ünvanlayıb.

Hökumətə loyal olmayan ictimai birliklərin tədbirlərinə yer verilməsindən imtina olunması son vaxtlar tez-tez baş verir. Bu imtinaları “əsaslandırmaq” üçün  göstərilən səbəblərsə əslində bəhanələr sayla bilər. Məsələn, bəzən bəhanə kimi oteldə elektirk enerjisinin olmaması göstərilir. Bəzən həmin yerdə başqa bir tədbirə daha əvvəl yer verilməsi kimi “fakt” ortaya çıxır. Amma bütün bu halların hamısından çıxarılan nəticə budur ki, hakimiyyət müstəqil qurumların hətta qapalı məkanda adi bir tədbir belə keçirməsini istəmir. Bu isə sadəcə ayrı-seçkilikdir, başqasının haqqını tapdamaqdır. Üstəlik, ictimai birliyin fəaliyyətinə bilərəkdən maneçilik törətməkdir.-05B-