Hesablama Palatası bir sıra yoxlamalara hazırlaşır

 Bakı Slavyan Universitetində xərclərin qanuna uyğunluğu yoxlanılacaq. Bu barədə qərar aprelin 10-da Hesablama Palatasının kollegiya iclasında qəbul edilib.

Bundan başqa, Azərbaycan Respublikasının Ekologiya və Təbii Sərvətlər Nazirliyinin aparatının saxlanılmasına, nazirliyin Milli Geoloji Kəşfiyyat Xidmətinə və Meşələrin İnkişafı Departamentinə ayrılan vəsaitlərin istifadəsinə və büdcədənkənar vəsaitlərin icrasına dair audit proqramları müzakirə edilərək təsdiq olunub.

Palata həmçinin dövlət büdcəsindən Azərbaycan Milli Elmlər Akademiyasının Arxeologiya və Etnoqrafiya İnstitutuna ayrılan vəsaitlərin istifadəsi ilə bağlı, eyni zamanda Göyçay rayon İcra Hakimiyyətinə dövlət büdcəsi və ehtiyat fondlarından ayrılan vəsaitlərin istifadəsinə dair audit proqramlarını təsdiq edib.

Xatırladaq ki, Hesablama Palatası ötən il üçün hesabat hazırlayıb və 18 apreldə parlamentdə çıxış edəcək.

Hesablama Palatası 7 dekabr 2001-ci ildən fəaliyyət göstərir və büdcə vəsaitlərinin xərclənməsinə nəzarət edir. Rəhbər işçilər (kollegiya üzvləri – sədr, müavinləri və 7 auditor) 7 ildə bir dəfə seçilir. 

Hesablama Palatası bir qayda olaraq yoxlamalarının nəticələrini açıqlamır. Bəzən ümumi nəticələri elan edir, konkret fakt və rəqəmlər gətirmir.

“İnformasiya əldə edilməsi haqqında” Qanunun 6.0.3 maddəsinə əsasən, büdcə vəsaitlərinin yoxlanması barədə informasiyanın yayılması dövlət strukturlarının, o cümlədən Hesablama Palatasının vəzifəsidir. --17D—