İlkin Rüstəmzadə SOS siqnalı verir

Bakı/08.07.18/Turan: NİDA Hərəkatının fəalı İlkin Rüstəmzadə 13 saylı koloniyadan ictimaiyyətə müraciət edərək onun hüquqlarının müdafiəsilə bağlı səyləri atırmağa çağırıb.

13 saylı koloniyadan telefonla diqtə etdiyi mürcaiət NİDA Hərəkatının Facebook səhfəsində dərc edilib.

"Salam, dostlar. Artıq 6-cı ildir həbsdəyəm.

"İlk dəfədir ki, özümü bu qədər gücsüz hiss edirəm. İlk dəfədir ki, dəstəyinizə bu qədər böyük ehtiyacım var. Artıq boğuluram, nəfəs ala bilmirəm. Məni burda hər gün diri-diri öldürürlər. Heç kimə tətbiq olunmayan ən sərt məhdudiyyətlər, ən xırda məsələlərə ilişmələr, gündəlik didişmək məcburiyyətində qaldığım hər cür təxribatlar. Bunlar hələ bir hissəsidir. Artıq hiss edirəm ki, gücüm çatmır. Əllərimi arxadan qandallayıb saçımı qırxdılar. Sonra zabitlərdən bir neçəsi gəldi ki, sənə qarşı yanlışlıq olub. Sənə qarşı bir də heç nə olmayacaq. Sakitlik cəmi 1 ay çəkdi. Bir aydan sonra yenə ilişmələr. Sıra yoxlamasına niyə çıxmırsan? Çıxmışam! Gəl, izahat yaz. Töhmət, get.

Tam güclərlə üstümə gəlirlər. Və bundan sonra nə olacağını bilmirəm.

İsveçdə yaşayan qız dostuma zəng edirəm. Dərhal əməliyyatçılar gəlirlər. Bu haranın kodudur belə? Nə? İsveç? Xatalı ölkədir, olmaz. 2 ay əvvəl onurğamın üstündəki kistadan əməliyyat oldum. (Prezidentin imzalayacağı əfv sərəncamı ərəfəsi idi deyə mərhəmət dilənçisi kimi görünməmək üçün ailəmə 1 ay sonra məlumat verdim) Həkimin mənə əməliyyatdan sonrakı sözü: "Bilirik əməliyyat olmusan, vəziyyətin də yaxşı deyil, amma yuxarıdan tibb hissəsində qalmağına icazə verilmir".

İnformasiya çıxışım tam məhdudlaşdırılıb. Tam güclərlə üstümə gəlirlər. Və bundan sonra nə olacağını bilmirəm",- İ. Rüstəmzadənin adından yayılan müraciətdə qeyd edilir.

Bununla əlaqədar NİDA Hərəkatı sosial şəbəkə istifadəçilərini və vətəndaşları İ.Rüstəmzadəni dəstəkləməyə, onun haqqında informasiya yaymağa, profillərində onun fotosunu yerləşdirməyə, ailəsinə maddi və mənəvi təzyiq göstərməyə, beynəlxalq təşkilatlara çoxlu müraciətlər göndərməyə çağırıb.

İ.Rüstəmzadə 2013-cü il mayın 17-də xuliqanlıq ittihamı ilə həbs edilib. İstintaq Bakıda dənizkənarı bulvarda Harlem Shake rəqs fleşmobunun keçirilməsini və YouTube-da süjetin yerləşdirilməsini belə qiymətləndirib.

2014-cü il mayın 6-da məhkəmə onu 8 il azadlıqdan məhrum edib. 2014-cü il dekabrın 16-da apellyasiya təmin edilməyib. Onunla birgə həbs edilən yeddi nəfər çoxdan azadlığa buraxılıb. 06D--