İmişlidə məhkəmə işdən çıxarılmış müəllimənin iddiasını təmin etməyib

İmişli Rayon Məhkəməsi müəllimə Leyla Nəcəfquliyevanın Aranlı kənd orta məktəbinə və Mil-Muğan regional təhsil idarəsinə qarşı iddiasına baxıb və işdən çıxarılmış pedaqoqun tələbini təmin etməyib.

L.Nəcəfquliyeva sonuncu parlament seçkilərində deputatlığa namizəd olarkən seçki kampaniyasında iştirakı ilə əlaqədar məktəbdə peşə öhdəliklərini yerinə yetirə bilməyib. Sonradan ibtidai sinif müəlliməsi sosial şəbəkədə yerli rəhbərlərin qanunsuz hərəkətləri haqqında məlumatlar yaydıqdan sonra işdən çıxarılıb.

Müəllimənin vəkili Rövşanə Rəhimlinin Turan-a verdiyi məlumata görə, İmişli məhkəməsi Seçki Məcəlləsinin 70.3-cü maddəsinə məhəl qoymayaraq, qanunsuz qərar qəbul edib. Bu maddədə deyilir ki, qeydiyyatdan keçən namizdə dövlət orqanının, idarə, təşkilat və ya bələdiyyə orqanının vəzifəli şəxslərinin təşəbbüsü ilə işdən, xidmətdən, təhsil müəssisəsindən çıxarıla bilməz. İşdən çıxarılma qadağası namizədin müvafiq seçki komissiyasında qeydiyyatı tarixindən seçkilərin nəticələri rəsmi olaraq dərc edildiyi günə qədər qüvvədə olur.

"Qanun pozuntusuna yol verilib, məhkəmə təhsil müəssisəsinə bəraət verərək, hüquqi əsası olmayan əmrlə 18 il stajı olan müəllimi işdən çıxarıb", deyə vəkil R.Rəhimli bildirib.

Onun sözlərinə görə, bu qərardan şikayət veriləcək. 

Leyla Nəcəfquliyeva apellyasiya şikayəti vermək niyyətini Turan-a təsdiq edib. Onun sözlərinə görə, məhkəmədə cavabdehlər Aran kənd məktəbinin direktoru və Mil-Muğan regional təhsil idarəsinin rəhbəri idi.

"Onlar vəkilimin suallarına cavab verə bilməyiblər. Mən və vəkil Rövşanə Rəhimli məhkəməyə çoxsaylı dəlillər təqdim etdik, lakin hakim Mahmud Orxan bizi dinləmək istəmədi, diqqətsiz idi və prosesin əvvəlindən etibarən onun davranışından məhkəmənin dövlət təşkilatının tərəfini tutacağı aydın idi", deyə Nəcəfquliyeva qeyd edib.

O bildirib ki, "təhsildə qanunilik, düzgün dərs keçilməsi tələblərinə" görə işdən çıxarılıb.  

Nəcəfquliyeva həmçinin İmişlidə məktəblinin ölümü ilə bağlı YNH-yə diqqət çəkib.

"Bu faciə şənbə günü baş verib. Məktəblilər niyə şənbə günü, ölkədə dərs olmadığı bir vaxtda məktəbdən qayıdırdılar? Çünki beş iş günündə düzgün dərs keçilmir, uşaqlar əlavə dərslərə cəlb olunur və həftə sonları məktəbə gəlməyə məcbur edilir", deyə Nəcəfquliyeva əlavə edib.

O, həmçinin bu yaxınlarda əhalinin polislə qarşıdurmasından sonra İmişlidəki vəziyyət haqqında suallara cavab verib. Hazırda şəhərdə sakitçilikdir, DİN-in əlavə qüvvələri İmişlidən çıxarılıb.