İntim videoların yayılmasında günahkar kimdir?

Bakı/07.03.23/Turan: Son günlər qadınların şəxsi şəkilləri və intim videoları, yazışmaları sosial şəbəkələrdə yayılır. Daha çox ictimai fəalların, jurnalistlərin, müxalifətçilərin şəxsi görüntüləri icazəsiz əldə edilərək yayılıb.

Bunların arasında həbsdə olan ictimai fəal Bəxtiyar Hacıyevin qadınlarla şəxsi yazışmaları, görüntüləri də var.

Konstitusiyanın 32-ci maddəsində bildirilir ki, “Öz razılığı olmadan kimsənin şəxsi həyatı haqqında məlumatın toplanılmasına, saxlanılmasına, istifadəsinə və yayılmasına yol verilmir.

Qanunla müəyyən edilmiş hallar istisna olmaqla, heç kəs onun xəbəri olmadan və ya etirazına baxmadan izlənilə bilməz, video və foto çəkilişinə, səs yazısına və digər bu cür hərəkətlərə məruz qoyula bilməz”.

Hüquqşünas Vəfa Rüstəm bildirir ki, belə bir hadisənin baş verməsi Azərbaycan kimi patriarxat baxışları olan bir ölkədə qadınlar üçün çox böyük bir təhlükə yarada bilər.

“Ümumiyyətlə insanların icazəsi olmadan onların şəxsi məlumatları şəkilləri, videoları, səsləri və s. paylaşıla bilməz, başqa şəxsə ötürülə bilməz. Şəxs yalnız onun razılığı olan halda öz məlumatlarını paylaşa bilər”.

Həmin şəxsi məlumatları paylaşanlar barəsində dövlət hər hansı bir addım atır mı? Feminst fəal Nərmin Şahmarzadə deyir ki, hakimiyyətin əli olmadığı işləri tez araşdırıb tapır, amma özü elədiyi işi heç vaxt araşdırmır.

“Hansı işlərdəki özləri yoxdu, hə, araşdırırlar. Amma hansı işləri ki, özləri edib, o məsələdə əlbəttə nə bir tutarlı araşdırma olacaq, nə də açıqlama”.

Daxili İşlər Nazirliyi (DİN) həbsdə olan ictimai fəal Bəxtiyar Hacıyevlə bağlı məlumatların yayılmasına aid bildirib ki, o, həbs olunduğu zaman üzərində hər hansı elektron daşıyıcı cihaz olmayıb. Bəs məlumatlar kimlər tərəfindən yayılır və bu Bəxtiyar Hacıyevə qarşı yeni cinayət işi açılmasına səbəb ola bilər mi?

Vəkil Səməd Rəhimli bildirir ki, kibercinayətkarlıqla əldə edilmiş materiallar məhkəmədə sübut olaraq göstərilə bilməz. Çünki bu məlumatlar özü qanunsuz yolla əldə edilib.

“Orada olan yazışmaların düzgün olub olmaması məlum deyil. Şəkillərin isə üçüncü şəxsə ötürülməsi məsuliyyət yarada bilər. Bu materialların kibercinayətkarlıq nəticəsində əldə olunmasını nəzərə alaraq, onlar cinayət işində istifadə edilə bilməz”. 0