Qarabağa silah daşımanın qarşısını almaq və Qarabağ ermənilərini Azərbaycana reinteqrasiyaya razı salmaq üçün nə etməli? – Azər Qasımlı Çətin sualda

Bakı/07.03.23/Turan: Azərbaycan Müdafiə Nazirliyinin açıqlamasında deyilir ki, Rusiya Federasiyası Müdafiə Nazirliyi Xankəndi-Xəlfəli-Turşsu torpaq yolunda baş vermiş silahlı insidentlə bağlı yaydığı bülletendə faktları təhrif edib.

"Təəssüf hissi ilə qeyd edirik ki, martın 6-da Rusiya Federasiyası Müdafiə Nazirliyi dünən Xankəndi-Xəlfəli-Turşsu torpaq yolunda baş vermiş silahlı insidentlə bağlı yaydığı bülletendə faktları təhrif etmiş və həqiqəti əks etdirməyən məlumat yaymışdır.”

 Nazirliyin açıqlamasında, həmçinin bildirilir ki, Ermənistan qoşunları Azərbaycan  ərazisindən tam çıxarılmalıdır.

Bu arada Qarabağda kı separatçı rejimin rəhbəri Arayik Harutyunyan rəsmi Bakının Qarabağın Azərbaycana reinteqrasiyası təklifini rədd etdiyini bildirib.Onun sözlərinə görə, fevralın 24-də sülhməramlıların vasitəçiliyi ilə Qarabağ və Bakı nümayəndələri arasında “humanitar və infrastruktur məsələlərini müzakirə etmək üçün” görüş keçirilib.Martın 1-də keçirilən ikinci görüşlə bağlı razılıq əldə olunub. Gündəliyə dörd məsələ daxil edilib: Laçın dəhlizinin açılması, Ermənistandan Qarabağa elektrik enerjisinin verilməsinin bərpası, qaz təchizatının bərpası və Kaşen mədəninin (Qızılbulaq) fəaliyyətinin bərpası.

“İkinci görüşdə Azərbaycan nümayəndəsi “inteqrasiya” sözündən istifadə edərək siyasi mövzuları müzakirə etməyə çalışdı, lakin Qarabağ təmsilçisi Samvel Şahramanyan bu mövzuda danışmaqdan imtina etdi”, - deyə Arutyunyan bildirib.

Bundan sonra Azərbaycan tərəfi öz kanalları ilə çatdırdı ki, ya ermənilər inteqrasiyaya gedir, ya da mövcud problemlər həll olunmayacaq, əksinə, daha da sərtləşəcək.Sonda Harutyunyan bəyan edib ki, Qarabağ əhalisinin əksəriyyəti Azərbaycana inteqrasiyanın əleyhinədir və müstəqillik uğrunda mübarizədən əl çəkməyəcək.

Bu gərginlik nə ilə nəticələnəcək?

Siyasətçi, Siyasi Menecment İnstitutunun rəhbəri Azər Qasımlı Kamran Mahmudovun təqdimatında yayımlanan “Çətin sual” verilişində bu barədə danışır.