İran alpinistləri azərbaycanli bələdçinin rəhbərliyi altinda kazbekə qalxiblar

İran alpinist qrupu azərbaycanlı idmançı, Azərbaycan Alpinizm Federasiyasının instruktoru Sirxan Məmmədovun rəhbərliyi altında uğurla Kazbek dağına (5033 m) qalxıb.

Ekspedisiyada Tehran, İsfahan, Şiraz və digər İran şəhərlərindən olan 42 alpinist iştirak edib. İdmançıların arasında İran Alpinizm Federasiyasının Himalay ekspedisiyalar komitəsinin rəhbəri Hüseyin Nəzəri də var idi. Qrupun tərkibində həm təcrübəli alpinist, həm də hələ ki cəmi bir zirvəni fəth edən təzə idmançılar da daxil idi.

Əvvəli xoş olan hava, sonra sərt üzünü göstərdi, kəskin güclü külək alpinistlərin işini xeyli çətinləşdirdi. Nəticədə qrupun az qala yarısı (17 nəfər) 2700 m hündürlükdən geri dönmək fikrinə gəldi. İki nəfər 3700 m hündürlüyə çatandan sonra təslim oldu, bir xanım isə qələbəyə bir-iki addım qalmış, 5000 m hündürlüyündə zirvəyə qalxmaqdan imtina etdi.

Buna baxmayaraq, Sirxan Məmmədovun rəhbərliyi altında qalan 22 alpinist bütün maneələri aşaraq Kazbek zirvəsinə qalxıblar.

AAF-nın mətbuat xidməti