İranlı narkokuryer sərhədi keçərkən saxlanılıb

Martın 6-da saat 19:50:də Dövlət Sərhəd Xidmətinin Sərhəd Qoşunlarının “Göytəpə” sərhəd dəstəsinin xidməti ərazisində İrandan Azərbaycan istiqamətində naməlum şəxsin dövlət sərhədini pozması müşahidə edilib.

Xidməti ərazi qapa­dılıb, sərhəd pozucusu sərhəd naryadı tərəfindən saxlanılıb.  Saxlanılan şəxsin İran vətəndaşı Ağaməhəmməd Tohid Mirməhəbbətəli (1983-cü ildə anadan olub) olduğu müəyyən edilib.

Üzərindəki bağlamaya baxış keçirilərkən ümumi çəkisi 6 kiloqram 275 qram narkotik vasitə (4 kiloqram 995 qram metamfetamin, 1 kiloqram 280 qram marixuana) aşkar olunaraq götürülüb.

Fakt üzrə əməliyyat-istintaq tədbirləri davam etdirilir. Bu barədə Dövlət Sərhəd Xidmətinin 12 mart tarixli məlumatında deyilir.

Həmin gün saat 6:30-da "Horadiz" sərhəd dəstəsinin ərazisində İrandan narkotik maddə qaçaqmalçılığına daha bir cəhdin qarşısı alınıb.

Əməliyyat tədbirləri zamanı sərhədçilər ətraf ərazidə 11 kiloqramdam çox marixuana aşkar ediblər.