İsmayıllı hadisələri üzrə prosesdə polislər İ.Məmədov və T.Yaqublunun əleyhinə ifadə verirlər

Yanvarın 14-də günün ikinci yarısında Ağır Cinayətlərə dair İşlər üzrə Şəki Məhkəməsində İsmayıllı hadisələri üzrə proses ittiham tərəfin şahidlərinin – polis əməkdaşlarının ifadələri ilə davam edib.

Bu zaman günün birinci yarısında ifadə verən polis əməkdaşı Bəkir Xələfov deyib ki, ReAl hərəkatının rəhbəri İlqar Məmmədov və Müsavat Partiyasının sədr müavini Tofiq Yaqublu yanvarın 24-də İsmayıllıda camaatın arasında olub, lakin onlar sakit dayanaraq, baş verənləri müşahidə edirdilər. Lakin fasilədən sonra polis ifadəsini dəyişdirib.

Belə ki, prokurorun Məmmədov və Yaqublunun hadisələrdə iştirakı haqqında israrlı suallarından sonra Xələfov guya müxalifətçilərin yerli sakinləri itaətsizliyə təhrik etdiklərini iddia etməyə başlayıb.

Digər polis Vüsal Mirzəyev bildirib ki, İsmayıllı hadisələri zamanı yerli sakinləri hüquqazidd əməllərə çağıran Məmmədov və Yaqubludan başqa, müttəhimlərdən heç birini görməyib. 

Əvvəlcə Məmmədov və Yaqublunu yerli sakinlərin arasında gördüyünü iddia edən polis əməkdaşı Valeh Sultanzadə günün ikinci yarısında bu müxalifətçilərin rayonda sabitliyi pozmaq üçün gəldiklərini iddia edib.

Lakin vəkillər qeyd ediblər ki, Sultanzadə faktiki olaraq siyasi qərəzliliyini göstərib. Faktlar haqqında danışmaq yerinə o, təqsirləndirilənlərə siyasi qiymət verməyə çalışıb.

Proses yanvarın 15-də davam edəcək.

Xatırladaq ki, İsmayıllı iğtişaşları haqqında iş üzrə müttəhimlər kürsüsündə 18 nəfər, o cümlədən ReAl hərəkatının rəhbəri İlqar Məmmədov və Müsavat Partiyasının sədr müavini Tofiq Yaqublu var. Onlar 23-24 yanvar 2013-cü il tarixində İsmayıllıda kütləvi iğtişaşlar təşkil etməkdə və ya onlarda iştirak etməkdə ittiham olunurlar. -06D-