Karantin rejimi: etiraz aksiyaları məhdudlaşdırılıb

Bakı/24.05.21/Turan: Bloger-mühacirlərin mayın 21-də Bakının «28 may» metrostansiyasının qarşısında təyin etiraz aksiyanın qarşısı alınıb. Ümumiyyətlə, hüquq müdafiəçiləri bildirirlər ki, paytaxtın mərkəzində etiraz aksiyaların keçirilməsi qadağan edilib. Son zamanlar bu, koronavirus pandemiyası ilə bağlı elan olunmuş xüsusi karantin rejiminin tələblərilə izah edilir.

Rəsmi qurumlar bildirirlər ki, xüsusi karantin rejiminin tətbiqilə əlaqədar toplantıların, aksiyaların keçirilməsinə məhdudiyyət qoyulub.

Sosial şəbəkələrin istifadəçiləri qeyd edirlər ki, xüsusi karantin rejiminə görə aksiyalara icazənin dövrdə idman yarışlarına və onları izləyəcək tamaşaçıların toplanmasına məhdudiyyət qoyulmur. Məsələn, iyunun 4-6-da Bakıda tamaşaçıların iştirakı ilə “Formula-1” yarışlarının keçiriləcəyi gözlənilir, futbol üzrə Avropa Çempionatının Bakıdakı matçlarına isə bilet satışına başlanıb.

Karantin rejimi zamanı aksiyalar keçirilə bilərmi?

Nazirlər Kabinetinin qərarına əsasən Azərbaycan Respublikasının ərazisində xüsusi karantin rejiminin müddəti iyunun 1-dək uzadılıb. Qurumun xüsusi karantin rejimilə bağlı əlavə tədbirlər barədə qərarına görə, tamaşaçıların iştirakı olmadan açıq havada idman yarışlarının və oyunlarının keçirilməsi istisna olmaqla, bütün kütləvi tədbirlərin, o cümlədən mədəni-idman tədbirlərinin keçirilməsi dayandırılıb.

«Amnesty İnternational» beynəlxalq hüquq- müdafiə təşkilatı aprelin 7-dəaçıqladığı hesabatda ö qeyd edib ki, ötən il koronavirus pandemiyası ilə mübarizə tədbirlərindən bəzisi Avropada və Mərkəzi Asiyada insan hüquqları ilə bağlı pozuntuları və bərabərsizliyi daha da dərinləşdirib. Təşkilatın məlumatına görə, Azərbaycanda bəzi vəkillər də təzyiqlərə məruz qalıblar, sərbəst toplaşma azadlığı məhdudlaşdırılıb, saxlanmalar zamanı işgəncə və amansız rəftarla bağlı ittihamlar geniş yayılıb.

Milli Məclisin Hüquq siyasəti və dövlət quruculuğu komitəsinin üzvü Fəzail Ağamalı Turan-a bildirib ki, pandemiya dövründə aksiyaların keçirilməsi məqsədəuyğun deyil, “çünki aksiyanın keçirilməsi zamanı bir çox hallarda müəyyən olunmuş qaydalara əməl edilmir». Deputatın fikrincə bu, reallığı əks etdirməyən və ətrafına kifayət qədər adam cəlb etməyən allüziyadır: «Burada elə bir şey yoxdur ki, dövlət özünə qarşı hər hansı bir təhlükə hiss etsin, hətta konkret məqsəd olsa belə”.

Komitə üzvü qeyd edib ki, Azərbaycan qanunvericiliyinə görə, aksiyaların keçirilməsi üçün Bakı Şəhər İcra Hakimiyyətinə müraciət etmək lazımdır ki, aksiya iştirakçılarının təhlükəsizliyi təmin olunsun, digər tərəfdən də aksiyada iştirak etməyənlərin hüquqları pozulmasın.

«Bu amillərin ikisi də vacibdir. Ona görə də müraciət olunsa yaxşı olar və bunun əsasında müəyyən karantin qaydalarına əməl etmək şərtilə aksiyaların keçirilməsi mümkündür. Ancaq  çox epizodik şəkildə maksimum 50-60 nəfər aksiyaya çıxır, maskası olmur,  gigiyenik təhlükəsizlik məsafəsi gözlənilmir. Bu da pandemiya qaydalarına ziddir», - o deyib.

Ağamalı hesab edir ki, bunu “Formula-1” yarışması ilə müqayisə etməyin  yetərincə məntiqi yoxdur. Çünki bu yarışmanı izləyən tamaşaçılar birmənalı şəkildə sosial məsafəni gözləyəcəklər, onlar bir-birindən ən azı 2 metr aralıda olacaqlar».

Deputat vurğulayıb ki, keçirilən aksiyalarda kütləvilik yoxdur və müqayisə əsassızdır.  “Bu gün Azərbaycan cəmiyyəti ən müxtəlif məsələlərlə bağlı keçirilən aksiyaları dəstəkləmir”, - o deyib.

Vətəndaş Hüquqları İnstitutunun rəhbəri Bəşir Süleymanlı bildirib ki, karantin rejimi aksiyaların keçirilməsinə əngəl ola bilməz. «Azərbaycanda çoxdandır  ki, sərbəst toplaşmaq azadlığı məhdudlaşdırılıb. Karantin rejimində bu, sadəcə, davam edib. Təkcə sərbəst toplaşmaq azaldığı yox, digər hüquqlar və siyasi azadlıqlar da zaman-zaman məhdudlaşdırılıb. Bu, həm yerli hüquq müdafiəçilərinin sənədlərində, həm də beynəlxalq təşkilatların hesabatlarında öz əksini tapır», - o qeyd edib.

Ekspert qeyd edib ki, bu gün məhdudiyyətləri Azərbaycanda karantin rejimilə  əlaqələndirirlər. «Amma təəssüflər olsun ki, digər vaxtlarda da vətəndaşların özlərini ifadə etməsi üçün əlverişli şərait yaradılmır. Sərbəst toplaşmaq azadlığı ilə bağlı məhdudiyyət var və hakimiyyət bu sahədə yanlış siyasət aparır.

Süleymanlı deyir ki, aksiyanın keçirilməsinə ya ümumiyyətlə icazə verilmir, ya da vətəndaşlara aksiya keçirmək çox mürəkkəb yerlər təklif olunur. «Artıq bir neçə ildir ki, şəhər içində aksiyaların keçirildiyi «Məhsul» stadionu bağlıdır.

Bakı Şəhər İcra Hakimiyyəti bildirib ki, orada təmir işləri aparılır. Amma bu qədər vaxt keçməsinə baxmayaraq, orada heç bir təmir işi aparılmır, sadəcə, bir neçə yer qazılıb. Hətta stadion təmir edilib istifadəyə verilmir ki, sakinlər ondan təyinatı üzrə istifadə etsinlər. ki, sakinlər ondan təyinat üzrə istifadə etsinlər».

O, hesab edir ki, pandemiya, sadəcə, bəhanədir.

«Dünya ölkələrində pandemiya ilə əlaqədar qadağalar olsa belə, zaman-zaman aksiyalar keçirilir. Amma Azərbaycanda aksiyaların keçirilməsi tamamilə məhdudlaşdırılıb», - Süleymanlı deyib.0—