Keçmiş MTN zabitlərindən ibarət qrupun işi üzrə ikinci məhkəmə başlayır

Bu gün paytaxtın Sabunçu rayon məhkəməsində ləğv edilmiş Milli Təhlükəsizlik Nazirliyinin keçmiş zabitlərindən ibarət qrupun işi üzrə sayca ikinci proses başlayıb.

Müttəhimlər kürsüsündə üç general – Monitorinq Mərkəzinin keçmiş rəisi Elçin Quliyev, Transmilli Cinayətkarlığa qarşı Mübarizə İdarəsinin keçmiş rəisi Subahir Qurbanov və Əməliyyat-Texniki İdarənin keçmiş rəisi Natəvan Muradova da daxil olmaqla, 10 nəfər əyləşib.

İstintaq materiallarına əsasən, 2004-2015-ci illərdə bu şəxslər və onların tabeliyində olanlar sahibkarların telefon danışıqlarını qanunsuz dinləyir və izləmə həyata keçirirdilər. MTN işçiləri əldə olunan şəxsi xarakterli məlumatdan biznesmenlərin şantajı üçün istifadə edir, onları həbs edir və fiziki və psixoloji təzyiq göstərirdilər.

Bu iş üzrə ümumilikdə 162 zərərçəkmiş keçir, onlara 18,5 mln. manat ziyan vurulub. Həbs olunanlardan təxminən 6,5 mln. manat pul, 5 mln. manatdan çox dəyəri olan daşınmaz əmlak götürülüb.

Keçmiş MTN-in 10 zabiti qanunsuz azadlıqdan məhrum etməkdə, fırıldaqçılıqda, talanda, rüşvət tələb etməkdə, vəzifə saxtakarlığında, sui-istifadədə və digər cinayətlərdə ittiham olunur.

Xatırladaq ki, artıq bir nemə aydır Sabunçu rayon məhkəməsində başda Akif Çovdarov olmaqla, MTN zabitlərinin daha bir qrupunun işi üzrə proses gedir. Onlar da analoji cinayətlərdə ittiham olunurlar.

Ümumilikdə 20-dən çox MTN zabiti həbs olunub, 500-ə yaxın insan isə 2015-ci ilin oktyabrında nazir Eldar Mahmudov vəzifədən kənarlaşdırıldıqdan sonra bu idarədə işdən çıxarılıb.

Qəribədir ki, Mahmudovun özü hələ də həbs olunmayıb və ona qarşı cinayət işi açılmayıb.

Müşahidəçilərin fikrincə, bu, onunla bağlıdır ki, Mahmudov hakimiyyətin böyük sirlərini bilir və məsuliyyətə cəlb olunarsa, bütün bu məlumatlar ictimaiyyətə açıqlanacaq və bir çox cinayətlərin arxasında ölkənin yüksək vəzifəli şəxslərinin durduğu məlum olacaq. -02D-