Kəmaləddin Heydərov Oqtay Gülalıyevi hədəfə aldı

 

Məlum olduğu kimi «Kür» Vətəndaş Cəmiyyəti Qərargahı Qax- Zaqatala bölgəsində baş vermiş zəlzələnın fəsadlarının aradan qaldırılması istiqamətində birbaşa Fövqəladə Hallar Nazirliyinin fəaliyyətinin təftiş olunmasına yönəlmiş hesabat hazırlayıb. Hesabatda müdhiş korrupsiya və mənimsəmə faktlarının yer almasına dair bir neçə gün öncə yayılmış məlumat ölkə gündəmində geniş rezonans yaratdı. Əslinə baxanda ölkə mətbuatı FHN şefi Kəmaləddin Heydərovdan demək olar ki, hər gün yazır. Mətbuatın yazdıqlarından fərqli olaraq bu hesabatın ümumi məzmununu əhatə edən məlumatlar son illər FHN- nin fəaliyyətini kifayət qədər sistemli, fəal şəkildə izləyən və təftiş edən «Kür» Cəmiyyəti tərəfindən işıq üzü gördü. 

 

 

Dərc olunan məlumatlara nəzər yetirdikdə hiss olunur ki, araşdırma zamanı real müşahidələrlə yanaşı tam rəsmi məlumatlara da əsaslanıb. O məlumatlara ki, onlar kabinetlərdə qovluqlara qoyulub saxlanıb və ictimaiyyətdən gizlədilib. Demək məlumatların bir qisminin məhz FHN-nin daxilindən, yaxud hökumətin yüksək ranqına yaxın mənbələr tərəfindən  ötürülməsini düşünmək olar. Məhz informasiyaların dəqiqliyi, hədəfi tam vurması FHN və onun rəhbəri Kəmaləddin Heydərovu təşvişə salıb. Hesabatın ümumi məzmunu haqda məlumatlar açıqlandıqdan sonra nazirlik daxilində fövqəladə vəziyyət elan olunub və daxil olan məlumatlara görə birbaşa nazir özü hesabatın tam açıqlanmaması və məlumatların hansı şəkildə əldə olunmasının araşdırılması üçün fəaliyyətə keçib. Nəzərə alsaq ki, sözü gedən Cəmiyyətin təqdim etdiyi bu məlumatlar həmin qurumun Qax-Zaqatala  zəlzələsi ilə bağlı hesabatın hazırlanmasına dair idi, yəqin ki, əsas mərəkkə hesabat dərc olunanadan sonra başalayacaq...

 

 

Əldə etdiyimiz məlumata görə hesabtda dərc olunan bəzi məlumatlar, xüsusən zəlzələ üçün ayrılan pulların başqa məqsədlər üçün istifadə olunması, fəlakətin baş verməsindən 6 ay keçməsinə baxmayaraq bu günə qədər bir dənə də olsun evin tikilib istifadəyə verilməməsi, eləcə də məktəblərin tikintisi ilə bağlı dövlət başçsına yalan məlumatların verilməsi və s. məsələlərin aşkara çıxması ölkənin birinci şəxsinə qədər gedib çatıb və bu məsələ FHN şefi üçün əməlli- başlı baş ağrısına çevirilib. Mənbəmizin verdiyi məlumata görə «zəlzələ faktları»-nın deşifrə olunmasından dərhal sonra K.Heydərov Prezident Administrasiyasına çağırılıb və ondan izahat tələb edilib. Tələblərin qarşısında aciz və çarəsiz durumda qalan, eyni zamanda həddən- ziyadə əsəbləşən nazir FHN- ə gələrək hesabatla bağlı toplantı keçirib. Hesabatın nəşrinin qarşısını almaq üçün hərəkətə keçib və bir sıra göstərişlər verib. O ilk öncə yaxın çevrəsində cəsus ovuna çıxıb. 

Etibarlı mənbədən əldə etdiyimiz məlumata görə artıq FHN- nin Qax Zaqatala bölgəsində tikinti işlərinə cəlb etdiyi şirkətlərdən 7 nəfər dərhal həbs edilib. Həbsdə məqsəd dövlət başçısına işləri yubandıran və sobataj edən «günah keçiləri»-ni göstərmək, daxildə isə həmin şəxslərdən məlumatın mənbəsini öyrənməkdir.

 

 

Əldə etdiyimiz məlumatlara görə K. Heydərov 2 ildən artıqdır ki, onun üçün əməlli-başlı baş ağrısına çevrilmiş «Kür» Cəmiyyətini susdurmağa qərar verib. Xatırladaq ki, sözü gedən Cəmiyyətin yaranmasında və fəaliyyətində bir sıra nüfuzlu, tanınmış şəxslər və media qurumları iştirak edir. Cəmiyyətə ölkə mətbuatından, beynəlxalq təşkilatlardan, müxalif düşərgədən, xüsusən İctimai Palatadan böyük dəstək var. Bu dəstəyin bariz nümunəsi təşkilatın koordinatoru Oqtay Gülalıyevin həbsi zamanı aparılan müdafiə kampaniyasıdır. Xatırlayırsınızsa kampaniya o qədər surətli və sistemli aparıldı ki, O. Gülalıyev həbsinin 12-ci günü artıq Amnestyu İnternational təşkilatı tərəfindən vicdan məhbusu elan edildi, AŞPA- nın siyasi məhbuslar üzrə nümayəndəsi Ştrasser Kristofer tərəfindən isə dərhal siyasi məhbus kimi siyahıya əlavə olundu. Azərbaycanın yaxın tarixində beynəlxalq qurumlar tərəfindən məhbusa qısa zamanda bir mənalı bu cür yanaşma ilk dəfə idi ki, nümayiş olunurdu. Aparılan kampaniyanın məntiqi nəticəsi olaraq 3 ay tamam olmamış «Kür» məhbusu ABŞ dövlət katibi xanım Klintonun Bakıya səfərindən dərhal sonra prezident İlham Əliyevin müdaxiləsi ilə 2 saat ərzində dəmir barmaqlıla arasından azadlığa buraxıldı. Amma azadlığa buraxılan keçmiş vicdan məhbusu rəsmi qərarla ev dustağı elan edilsə də bir çoxlarının gözlədiyinin əksinə olaraq Kür fəaliyyətini davam etdirdi və Kür daşqınlarının təsirinə məruz qalmış, FHN- nin «ədalətsizlik və ayrı- seçkilik» repressiyasına uğramış 130 nəfərin məhkəmə iddiasını bərpa etdi. Hazırda 2 aydır ki, Şirvan İnzibatı İqtisad Məhkəməsi hər həftə FHN- dən narazı insanların duruşma mərkəzinə çevrilib. Əldə etdiyimiz məlumata görə artıq bəzi iddiaçıların Kəmaləddin Heydərova qarşı şikayəti Azərbaycan sərhdələrini aşaraq Avropa İnsan Haqları Məhkəməsinə qədər gedib çıxıb. Kür Araz daşqınları ilə bağlı narazı elektoratın problemlərini həll etməmiş Zaqatala olaylarının meydana gəlməsi və «Kür» Cəmiyyətinin uzaq şimala baş vurması, FHN- nin əməllərini deşifrə etməsi K. Heydərovun sözü gedən cəmiyyəti susdurması üçün hərəkətə sövq edib. 

 

 

Aldığımız məlumatlara görə rəsmi qərarla «ev dustağı» edilməsinə, haqqında açıq cinayyət işi (CM- nin 220.2- ci maddəsi) olmasına baxmayaraq, Sabirabadda, Şirvanda və son günlər də Qax- Zaqatalada olan «Kür» Cəmiyyətinin koordinatoru Oqtay Gülalıyevin məhz K. Heydərovun bir başa göstərişi ilə həbs olunacağı gözlənilir. Xatırladaq ki, FHN şefinin ona qarşı çıxan rəqiblərini sıradan çıxarması, həbs etdirməsi birinci hadisə deyil. Yaxın tariximizdə keçmiş İqtisadi İnkişaf naziri Fərhad Əliyevdən tutmuş bu ilin 08 iyununda onunla görüşündə sadəcə regionun problemlərini xatırlatdığına və insanların şikayətini çatdırdığına görə «Kür» Vətəndaş Cəmiyyətinin digər fəalı, Sabirabad rayonunun Əsgərbəyli kənd sakini İlham Əmiraslanov K. Heydərovla görüşdən bir neçə gün sonra şərlənərək həbs olunub. Əldə etdiyimiz başqa bir məlumata görə FHN şefinin hərəkətə keçməsinə səbəb O. Gülalıyevin həbsdən çıxdıqdan sonra onun dərhal Prezident Administrasiyasında Əli Həsənov tərəfindən qəbul edilməsi və haqqında olan cinayət işinin dondurularaq məhkəməyə çıxarılmaması və fəaliyyətinə göy işıq yandırılması da olub. «Kür» Cəmiyyətinin FHN-ə qarşı yönələn fəaliyyətinin onun hakimiyyət daxili rəqibləri tərəfindən dəstəkləndiyini düşünən «fövqəlnazir»- in çox yaxın günlərdə hərəkətə keçəcəyi gözlənilir. Amma bu məsələdə ona iqtidar içi rəqiblərinin mane olub-olmaması bəlli deyil. Hər şey K. Heydərovun bu məsələdə dövlət başçısından razılıq əldə edib edə bilməyəcəyindən asılıdır.