Komitə komissiyanın tərkibinə narazılıq edir

Vətəndaş Cəmiyyətini Müdafiə Komitəsi bu günlərdə növbədənkənar iclasını keçiirb. Bu haqda Turan-a qurumun üzvü Elşən Həsənli bildirib.

Onun sözlərinə görə, komitə üzvləri Bakının Binəqədi rayonunda çoxmərtəbəli binada kütləvi insan tələfatı və xəsarətlərilə müşayət edilən yanğında həlak olanların ailələrinə başsağlığı verib və xəsarət alanlara tezliklə sağalmaları arzularını ifadə ediblər.

Bundan əlavə, iclasda adı çəkilən yanğının səbəblərini araşdırmaq və nəticələrini aradan qaldırmaq üçün yaradılan komissyanın tərkibinə əlavələr edilməsi haqda təkliflər səsləndiriblər. Belə ki, komitə üzvləri bu araşdırmaların şəffaf aparılması üçün müstəqil media və eləcə də QHT təmsilçilərinin komissiya tərkibinə daxil olmasını məqsəduyğun sayıblar. Bununla bağlı komitənin müraciət hazırlayacağı qeyd olunub.

Yanğına səbəb olan poliüteran materialından binalara üzlük kimi istfadə edilməsinə qadağa qoyulması təklifi də səslənib. Komitə üzvləri hələ iki il öncə Sumqayıtda, daha sonra keçən il Xətai rayonunda bu üzlüklər üzündən iki binada yanğın baş verməsini xatırladıblar. Bununla bağlı aidiyyatı qurumların bu ötən müddət ərzində tədbir görməmələri vətəndaş taleyinə biganəlik və məmurların insan taleyinə laqeydliyi kimi dəyərləndirilib. Komitə üzvləri vəzifəsindən. tutduğu mövqedən asılı olmayaraq, bu tələfata səbəb olan bütün günahkarların cəzalandırılması tələb edilib. -05B-