Komitə sədri İrana getmək istəyir

70 günə yaxındır ki, İranda saxlanılan Azərbaycanın iki yazarı - Fərid Hüseyn və Şəhriyar Hacızadənin Hüquqlarını Müdafiə Komitəsi bazar ertəsi Beynəlxalq Mətbuat Mərkəzində (BMM) mətbuat konfransı keçirib.

    Komitənin üzvü Şahbaz Xuduolğu mayın 2-də İranda saxlanılan yazarların taleyinə İran tərəfin aydınlıq gətirmədiyini deyib. Azərbaycan ictimaiyyətindən müraciətlər olmasına, Azərbaycan XİN-in 5 nota verməsinə baxmayaraq, rəsmi Tehran bunlara cavab verməyib. 

    Komitənin sədri, yazıçı Çingiz Abdullayev Yazıçılar Birliyinin, Slavyan Universitetinin də yazarların azadlığa buraxılmaları ilə bağlı İrana müraciət etdiklərini nəzərə çatdırıb. Amma hələ ki, İran tərəfdən hər-hansı reaksiya yoxdur. “İran tərəfi özü də yaxşı bilir ki, bu gənclər casus deyil, amma hansısa siyasi mülahizələrə görə onları azad etmir”, - deyə C.Abdullayev qənaətini ifadə edib. 

    Eyni zamanda, rəsmi olaraq bu yazarların nədə ittiham olunduqları da məlum deyil. Belə ki, İran mətbuatı bu gənclərin narkotik qaçaqmalçılığında, casusluqda ittiham edildiyini yazsa da, rəsmi olaraq hansısa ittiham yoxdur. Odur ki, İran tərəfə gənclərə ittihamın nədən ibarət olmasını açıqlaması təklif edilib. 

    Gənclərin azad olunması üçün fəallığı vətəndaş borcu kimi dəyərləndirən yazıçı vətəndaş cəmiyyəti institutlarını ciddi fəallığa səsləyib. Komitənin İran prezidenti Mahmud Əhmədinecata müraciət hazırladığı nəzərə çatdırılıb. Sənədin İranın Azərbaycan səfirliyinə veriləcəyi xatırladılıb. Komitə sədri cavab üçün daha 10 gün gözləyərək, sonra bir neçə şəxslə İrana getməyi nəzərdə tutduğunu bildirib. Yazarların valideynləri də konsulla görüşə, vəkillə təmin olunmasına razılıq vermədiyi üçün İranı tənqid edib. 

    Yazıçı Ç.Abdullayev və hansı beynəlxalq qurumu təmsil etdiyi bəlli olmayan Azər Həsrət ölkə QHT-lərinin çoxunun kampaniyaya qoşulmamasını qəribə şəkildə təqdim ediblər. Belə ki, adı çəkilməyən hansısa qurumlar “Eurovision” yarışması əleyhinə çıxmaqda,  yazarların müdafiəsinə isə qoşulmamaqda ittiham ediliblər. Bu iki şəxsin fikrinə görə, bu qurumlar yazarları müdafiə üçün qrant almayacaqları üçün müdafiə kampaniyasına qoşulmayıblar. Bu mənada natiqlər iki gənci müdafiədən çox sanki gəncləri İranda həbsə aldıran “Eurovision”uy tənqidə məruz qoyan ictimai birlikləri sərt tənqid ediblər. 

    Tədbirin sonunda İran prezidentinə ünvanlanan müraciətin mətni paylanıb. Sənədin finalında hər iki yazarın tezliklə azadlığa buraxılacağına ümid bəsləndiyi xüsusi qeyd edilir.

    F.Hüseyn və Ş.Hacızadə bu il aprelin 29-da İranda şer festivalına qatılıblar. Mayın 2-də Təbrizə gedərkən mülki geyimli şəxslər tərəfindən saxlanılıblar. Rəsmi olaraq bu iki yazarın nədə ittiham olunması haqda hər-hansı açıqlama yoxdur. -05C-