Mayın 7-8-də Bakıda nəqliyyatın hərəkəti yenidən məhdudlaşdırılacaq

Mayın 7-8-də Bakıda keçiriləcək Cənubi Qafqaz Forumu ilə əlaqədar olaraq tədbirlərin keçiriləcəyi yerlər istiqamətində hərəkətin təhlükəsizliyinin təmin edilməsi məqsədilə Bakının bir çox küçə və prospektlərində hərəkət məhdudlaşdırılacaq.

Baş Polis İdarəsinin Dövlət Yol Polisi İdarəsinin bölmə rəisi Vaqif Əsədovun verdiyi məlumata görə, aeroport istiqamətindən şəhər istiqamətinə, yəni - Yusif Səfərov, Üzeyir Hacıbəyov küçələri, Azadlıq prospekti, Zərifə Əliyeva, Rəsul Rza küçələri, Neftçilər prospekti, "Azneft" dairəsi istiqamətində şəxsi avtomobillərdən mümkün qədər az istifadə edilməsini tövsiyə edib.

Bundan əlavə, mayın 8-dək davam edəcək forumla əlaqədar paytaxtın Mərdəkan, Buzovna istiqamətində də təhlükəsizlik tədbirlərinin görülməsi nəzərdə tutulduğundan qeyd edilən istiqamətlər üzrə şəxsi avtomobillərdən mümkün qədər az istifadə etmək tövsiyə edilir.

Qeyd edək ki, forum Four Seasons otelində keçiriləcək.

Mayın ilk ongünlüyü Bakıda sürücülər üçün dəhşətə çevrilir.

Mayın 1-də və 5-də velosiped turu ilə əlaqədar nəqliyyatın hərəkəti məhdudlaşdırılmışdı, bu da şəhərdə böyük tıxaclara səbəb olub.

İndi isə mərkəzi və əsas magistrallar forumla əlaqədar bağlanır.

Mayın 10-da isə ənənəvi olaraq bakılıları Heydər Əliyevin doğum günü ilə əlaqədar “Gül bayramı”nda nəqliyyat problemləri gözləyir. -06D-