Vətəndaş cəmiyyəti fəalalrı hakimiyyətin inzibati həbs müddətinin artırılması planlarını pisləyir

Bir qrup vətəndaş cəmiyyəti fəalı bəyanatla çıxış edərək, İnzibati Xətalar Məcəlləsinə (İXM) inzibati həbs müddətlərinin artırılmasını nəzərdə tutan düzəlişlər layihəsinin baxılması üçün parlamentə təqdim edilməsini pisləyib. Onlar təklif edilən yenilikləri məhdudlaşdırıcı və Azərbaycanda insan hüquqları ilə bağlı vəziyyətə mənfi təsir göstərən dəyişiklik hesab edirlər.

Bəyanatda xatırladılır ki, Azərbaycanın baş prokuroru Zakir Qaralov qanunvericilik təşəbbüsü qaydasında İXM-nin 298.1 və 298.2-ci maddələrinə düzəlişlər layihəsini parlamentə təqdim edib. Düzəlişlər mitinq keçirilməsi qaydalarının pozulmasına görə maksimum inzibati həbs müddətinin 15 gündən 60 günədək artırılmasını nəzərdə tutur.

Bundan başqa, İXM-nn 310-cu maddəsinə polisə tabe olmamağa görə həbs müddətinin 15 gündən 30 günədək artırılmasını nəzərdə tutan düzəlişlər təklif olunur.

Demokratik dövlətlərdə bu hüquqpozmalara görə həbsdən imtina edildiyi halda, Azərbaycanda həbs müddətinin artırılması fəalların cəzalarının sərtləşdirilməsi və prezident seçkiləri ərəfəsində etirazların yatırılması məqsədinə xidmət edir, müraciət müəllifləri belə hesab edir.

Onların fikrincə, bu düzəlişlərin həyata keçirilməsi üçün nə hüquqi əsasə, nə sosial tələbat yoxdur.

Cəzanın sərtləşdirilməsi ictimai-siyasi fəaliyyətin məhdudlaşdırılması və ümumi qorxu mühiti yaratmaq məqsədi güdür.

Bu düzəlişlər Azərbaycanın onsuz da mənfi olan beynəlxalq imicinə zərbə vurur.

Belə ki, aprelin 30-da BMT Şurasının sessiyasında Azərbaycanda insan hüquqları sahəsində vəziyyətlə bağlı müzakirələr zamanı bu sahədə vəziyyətin yaxşılaşdırılması üçün 160-dan çox tövsiyə irəli sürülüb.

2013-cü ilin yanvarında AŞPA ölkədə insan hüquqları sahəsində vəziyyətin tənqidi yer alan qətnamə qəbul edib.

Aparıcı hüquq-müdafiə təşkilatları da öz hesabatlarında Azərbaycanı insan hüquqlarının pozulmasına görə tənqidə məruz qoyur.

Bu halda vəziyyəti yaxşılaşdırmaq əvəzinə Azərbaycan hakimiyyəti beynəlxalq öhdəliklərini pozaraq, daha mürtəce addımlar atır.

Müraciət müəllifləri Azərbaycan hakimiyyətini qanun layihəsini parlamentdən geri almağa çağırır.

Onlar həmçinin beynəlxalq ictimaiyyəti düzəlişlərə münasibət bildirməyə və Azərbaycan hakimiyyətindən beynəlxalq öhdəliklərinə hörmət etməyi tələb etməyə çağırıblar.

Müraciəti bir qrup hüquq-müdafiə, jurnalist, gənclər təşkilatlarının və KİV-lərin rəhbərləri, o cümlədən Rəsul Cəfərov, Anar Məmmədli, Leyla Yunus, Leyla Əliyeva, Samir Kazımlı, Rövşən Hacıyev, Emin Hüseynov, İntiqam Əliyev, Mirvari Qəhrəmanlı, Ziya Quliyev, Ülvi Həsənli, Mehman Əliyev, İlqar İbrahimoğlu, Rəşid Hacılı, Mirəli Hüseynov, Hafiz Həsənov, Fuad Həsənov, İradə Cavadova imzalayıblar. -06D-