Media-icmal 17.03.21

Qarabağda ermənilərin silahlı qüvvə yaratmaq istəklərinə cavab, Qarabağdakı erməni yaraqlılarına qarşı anti-terrror əmliyyatı keçirilməsi vacibliyi, inflyasiyanın qaçılmaz olması iddiaları və s. məsələlər medianın aparıcı mövzuları sırasındadır...        

“Yenisabah.az” saytında  yer alan “Ermənilərin Qarabağda “güclü ordu” qurması mifdir, çünki… - Azərbaycan hərəkətə keçməlidir” sərlövhəli məqalədə müəllif Qarabağda yerləşmiş ermənilərin silahlı qüvvə yaratmaq planlarını politoloq Məhəmməd Əsədullazadə ilə dəyərləndirir.

Politoloqa görə, erməni separatçıları ordu yaratmaqdan dəm vururlar, amma Azərbaycan ərazisində ermənilərin “güclü ordu” qurmaq istəməsi mifdir.

M.Əsədullazadə hesab edir ki, Ermənistanın Qarabağ ermənilərini silahla təchiz etməsi mümkün deyil. Politoloq bunu onunla əsaslandırır ki, Ermənistan ordu üçün ayrılan vəsaiti azaldıb. Üstəlik, Qarabağda erməni yaraqlılarını silahla təchiz etmək Ermənistan üçün yükə dönmüşdü. Daha bir məsələ bu idi ki, Ermənistan bu silahlanmada maraqlı deyildi.

M.Əsədullazadə hesab edir ki, bu halda erməni yaraqlılarını silahlandırmaq sadəcə mümkün deyil, əgər Rusiya bunu etmək istəsə Türkiyə və Azərbaycan bunun qarşısını qətiyyətlə ala bilər.

Onun sözlərinə görə, Ermənistan Azərbaycan və Türkiyə ilə sülh müqaviləsinə gedəcəksə ilk növbədə iki ölkənin ərazi bütövlüyünü tanıması şərtdir.

Qarabağda erməni yaraqlılarına gəlincə, politoloq hesab edir ki, bu istiqamətdə Azərbaycan hərəkətə keçməlidir.

“Redaktor.az” saytında “Bakıdan sərt tələb: Anti-terror əməliyyatı başlaya bilər - Xankəndi, Xocalı...” sərlövhəli məqalədə bəhs olunan məsələ araşdırılır.

Müəllif hazırda Azərbaycan Ordusunun davam edən təlimlərinin mahiyyətini politoloq Asif Nərimanlı ilə dəyərləndirir.

Politoloq yada salır ki, İkinci Qarabağ müharibəsindən dörd ay ötür, münaqişə həll edilib, Azərbaycanın qonşu ölkələrə hərbi iddiası yoxdur,

“... hədəf taxtasında ölkə daxilindəki qanunsuz silahlı birləşmələr və terrorçu qruplaşmalardır. Qarabağdakı terrorçu qruplaşmaların çıxarılması tələbini masada daha güclü şəkildə irəli sürmək lazımdır. Danışıqlarla həll edilmirsə, mümkün anti-terror əməliyyatı keçirilməlidir”, deyə politoloq bildirir.

A.Nərimanlı əlavə edir ki, “Qarabağdakı silahlı qruplaşmalar qanunsuzdur və onlara qarşı addımlar anti-terror xarakteri daşıyacaq” mövqeyi hərbi müstəvidə nümayiş etdirilməlidir.

Politoloq deyir ki, Azərbaycan masada istəyinə nail olmazsa, anti-terror əməliyyatı Xankəndidə yox, erməni silahlı birləşmələrinin Azərbaycan Ordusu ilə üzbəüz dayandığı ətraf ərazilərdə keçirilə bilər. Bu isə ruslara qəti mövqe nümayiş etdirmək məqsədi daşıyacaq”, deyə ekspert fikrini ifadə edir.

“Sfera.az” saytı “Yanacağın bahalaşması, kommunal xərclərin artması... – İnflyasiya qaçılmazdır?” sərlövhəli məqalədə Azərbaycanda inflyasiya ehtimalını iqtisadçı-ekspert Eldəniz Əmirovla dəyərləndirir. Ekspertə görə, pandemiya əksər sahələrdə fəsadlar yaratdı, ən təhlükəlisi isə inflyasiya meyllərinin güclənməsidir.

Ekspert deyir ki, yanacağın bahalaşması, kommunal xərclərin artırılması inflyasiya yaradan amillər sırasındadır, bunlardan sonra ərzaq və qeyri-ərzaq məhsullarında bahalaşma olmasını sesnsasiya kimi qəbul etməyə dəyməz.  

İqtisadçı deyir ki, qiymətləri zəruri olandan da yuxarı qaldıran şəxslərə iş adamı demək olmaz, elələri “işbaz”lardır.

Ekspertə görə, rəqabətin olduğu mühitdə süni qiymət artımı anlayışı yoxdur və əgər qiymət artıbsa, bunun iqtisadi əsasları var. Əgər süni qiymət artımından danışılırsa, artıq söhbət iş adamlarından yox, inhisarçılardan gedir.   

E.Əmirov vurğulayır ki, bəzi sahələrdə 30%-ə qədər bahalaşma müşahidə edilir.

Ekspert vəziyyətdən çıxış yolunu Rəqabət Məcəlləsinin qəbul olunmasında gördüyünü bildirir.