Media-icmal 17.11.20

"Azərbaycan" qəzeti  "Azərbaycanı ucaldan Qələbə" sərlövhəli məqalədə Azərbaycanın 1988-ci ildən başlamış azadlıq mübarizəsini və onun nəticələrini dəyərləndirir.

Müəllif ilkin olaraq bu il sentyabrın 27-dən başlayaraq noyabrın 10-na kimi Qarabağda davam etmiş hərbi əməliyyatları yada salır: "Torpaqlarımızın azadlığı uğrunda Vətən müharibəsi xalqımızın qəhrəmanlıq salnaməsinə çevrildi. 44 günlük bu müharibədə Azərbaycan döyüş meydanında Ermənistanı darmadağın etməklə, 30 ilə yaxın davam edən işğala son qoydu. Bu qalibiyyətin fonunda bütün dünya güclü Azərbaycan dövlətini gördü".

Daha sonra müəllif vurğulayır ki, bu gün, yəni 17 noyabr Azərbaycanda Milli Dirçəliş günüdür.

Müəllif yada salır ki, 1988-ci il noyabrın 17-dən başlayan milli azadlıq mübrizəsi heç də asan olmadı, Azərbaycan xalqı bir tərəfdən azadlıq mübarizəsi, digər tərəfdən isə erməni işğalına qarşı mübarizə aparırdı.

Həmin azadlıq mübarizəsinin nəticəsi olaraq xalq uzun on ollər boyu həsrətində olduğu milli azadlığa və milli dövlətçiliyinə qovuşdu.

Amma müəllif iddia edir ki, həmin zamanlarda həqiqi liderə ehtiyac olub və tarix sübut edib ki, xalqların və dövlətlərin taleyində böyük şəxsiyyətlərin, həqiqi liderlərin və siyasətçilərin müstəsna rolu olub. O, belə lider kimi Heydər Əliyevin adını çəkir.

Müəllif deyir ki, Heydər Əliyevin 1993-cü ildə hakimiyyətə gəlişi ilə dövlətçilik gücləndi, vətəndaş müharibəsi təhlükəsi aradan qaldırıldı, separatçılıq meyllərinə son qoyuldu, ən əsası, Azərbaycanın dövlət müstəqilliyi təmin edildi.

2003-cü ildən bu yana davam edən İlham Əliyevin Azərbaycana rəhbərliyi dövrünü isə müəllif Azərbaycan tarixinin ən qüdrətli dövrü kimi qiymtələndirir.

Müəllifə görə, bu siyasətin nəticəsi olaraq Azərbaycan hazırda dünyada söz sahibi olan dövlətlərdəndir, Cənubi Qafqazın lideri statusunu daşıyır, hərbi qələbə isə ölkənin beynəlxalq mövqelərini, nüfuzunu daha da gücləndirdi.

"Redaktor.az" saytı  "Azərbaycan Ordusu bu işi özü həll edəcək - Kəlbəcərlə bağlı sərt açıqlama" sərlövhəli məqalədə ermənilərin

Kəlbəcərdən çıxmasını dəyərləndirir.

Yada salaq ki, Azərbaycan prezidenti İlham Əliyevin, Ermənistan Baş naziri Nikol Paşinyanın və  Rusiya prezidenti Vladimir Putinin noyabrın 10-da imzaladığı bəyanatın şərtlərinə görə, buradakı erməni əhali və Ermənistan silahlı qüvvələri noyabrın 15-nə kimi rayonu tərk etməli idilər.

Amma ermənilər daha 10 gün, yəni noybarın 25-nə kimi  möhlət istəyiblər. Bunun erməni tərəfin hiyləsi ola bilməsilə bağlı sualı cavablandıran deputat

Fazil Mustafa ermənilərin istənilən hiyləsinə qarşı sərt tədbirlərin görüləcəyini bildirib: "Ermənilər dekabr ayının 1-nə qədər istədikləri hiyləni, təxribatı edə bilərlər. Lakin bunu edəcəkləri təqdirdə onların başına "Osmanlı yumruğu" dəyəcək. Bəlkə o zaman başa düşərlər ki, Azərbaycanla hiylə və təxribat dili ilə danışmaq olmaz… Bizə lazımdır ki, onlar dekabrın 1-nə qədər üzərlərinə götürdükləri öhdəlikləri yerinə yetirsinlər. Əgər yerinə yetirməsələr, Azərbaycan öz bildiyi kimi hərəkət edəcək", deyə F.Mustafa bildirib.

Buna görə Azərbaycan vətəndaşlarının narahatlığını başa düşdüyünü deyən deputat bu narahatlığı əsaslı sayıb və əlavə edib ki, əgər Rusiya erməni qoşunlarını Dağlıq Qarabağdan çıxara bilməsə, Azərbaycan Ordusu bu işi özü həll edəcək, bunun başqa yolu yoxdur, amma hələlik qoyulan müddətin sona çatmasını gözləməliyik".

"Moderator.az"  saytı "Türk əsgərinin Qarabağa gəlişi bizim üçün mühüm məsələdir" sərlövhəli məqalədə Milli Məclisin deputatı Vahid Əhmədovun düşüncələrinə yer verib.

Yada salınır ki, Türkiyə prezidenti Rəcəb Tayyip Ərdoğan Azərbaycana hərbi qüvvələrinin göndərilməsilə bağlı layihəni baxılması üçün Türkiyə Böyük Millət Məclisinə göndərib.

Milli Məclisin deputatı Vahid Əhmədov deyir ki, Qarabağda türk qoşunlarının olması bizim üçün çox önəmlidir:

"Türkiyə Böyük Millət Məclisindən icazə alınmamış hərbi qoşunlar Azərbaycana göndərilə bilməz. Bu, bizim üçün mühüm əhəmiyyət kəsb edən məsələdir. Qarabağda vəziyyətə Rusiya sülhməramlıları ilə yanaşı, Türkiyə sülhməramlıları da nəzarət edəcək. Çünki hər iki tərəfin nəzarəti olmalıdır".

V.Əhmədov erməni hərbiçilərin ərazilərdən çıxarılmaması barədə məlumatların yayıldığını da qeyd edib:

"Əldə etdiyimiz məlumatlara görə, Qarabağda olan bəzi erməni hərbiçiləri razılaşmada nəzərdə tutulmuş ərazilərdən çıxmaq istəmirlər. Bu da müəyyən problemlər yaradır. Düzdür, Rusiya sülhməramlılarının əsas vəzifəsi onları həmin ərazilərdən çıxartmaq, oraları boşaltmaq və həmin rayonları bizə təhvil verməkdir. Türkiyə qoşunlarının Qarabağa gəlməsi isə məsələnin həlli üçün əlverişlidir".