Media-icmal 19.01.16

Rəsmi qəzetlər dövlət başçısı İlham Əliyevin yanvarın 18-də keçirilən müşavirədə çıxışını tam şəkildə dərc ediblər.

“Azadlıq” qəzeti regionlarda sosial tələblərlə bağlı etirazların davam etməsini  “Cəlilabad və Astara sakinləri də ayağa qalxdı” deyə nəzərə çatdırır. “Yazıq deyilmi bizim övladlarımız? Gələcək nəsillərin neftdən gələn gəlirlərdəki payını dağıtdınız, üstəlik üzərlərinə bu qədər xarici borc yükləmək nə imiş?” deyə AXCP sədri Əli Kərimli iqtidarın xarici borclanmaya getmək xəttini pisləyib.

Ölkədə yaşanan kəskin böhran fonunda əmək haqlarının 10% artırılmasını qəzet “Əliyevin 10 manatlıq “antiböhran tədbiri” yaxud vətəndaşı ələ salmağın iqtisadi forması” kimi dəyərləndirir. Ekspertlər isə maaşların 10% artmasının inflyasiyanı sürətləndirə biləcəyi barədə xəbərdarlıq edirlər. “Hakimiyyət dəyişməyincə ölkəni bu duruma salanlar cəzalandırılmayacaq”, - hüquqşünas Müzəffər Baxışov indiki ağır durumun səbəbini mövcud hakimiyyətin özündə gördüyünü bildirir.

“Ekspress”  “Bank of Azerbaycan”nın lisenziyasının ləğv olunmasını nəzərə çatdırır. Ekspertlərə görə, indiki böhran şəraitində sahibkarlığı gücləndirmək üçün Neft Fondunun vəsaitlərindən sahibkarlara ucuz kreditlər verilməsi mümükndür.

“Novoe Vremya”  bir zamanlar ölkənin əsas gəlir mənbəyi olan nefti indi “neftin Azərbaycan üçün problemə dönməsi” kimi qiymətləndirir. İndiki böhran şəraitində ölkədə iqtisadi durumu qaydaya salmaq üçün qəzet “inhisarçı və oliqarxlara zərbənin zamanın hökmü” adlandırır.

“Bizim Yol” dövlət başçısı İlham Əliyevin yanvarın 18-də keçirdiyi müşavirədəki açıqlamalarını “prezidentin geniş islahatların anonsunu verməsi” kimi təqdim edir.

Sanksiyaların götürülməsilə İranın neft bazarına girməsinə ekspetrlər bədbin mənada “Azərbaycanı nə gözləyir?” mövqeyini sərgiləyirlər. İndi neftin dəyərinin 28 dollara endiyini yazan qəzet ekspertlərin “İqtisadiyyatı islahatların xilas edəcəyi” bəyanatını səsləndirirlər.

“Yeni Müsavat” dövlət başçısı İlham Əliyevin gömrüklə bağlı bu günlərdəki qərarını oliqarxların sabotaj etdiklərini deyir və bunu olirqaxların asanlıqla “təslim olmaq istəmələri” adlandırır.

Dolların limitsiz və rəsmi məzənnədən çox baha satışına qoyulan qadağadan  sonra dolların “qara bazar”a çıxdığını yazan qəzet bu bazarın qarşısını almağın mümkün olmadığını nəzərə çatdırır.

Dövlət başçısı İlham Əliyevin yanvarın 18-də keçirdiyi müşavirəni, imzalanan fərman və sərəncamları qəzet “Davosa hazır proqramla” getməsi kimi dəyərləndirir.

Rəsmi Bakının sosial tələblərlə keçirilən aksiyalardan xarici qüvvələrin istifadə edə biləcəyi mövqeyinə ekspertlər “bunu hansısa xarici qüvvəyə bağlamaq şişirtmə olardı” cavabını veriblər.

“Böhran müxalifətə işləyir” deyə durumu dəyərləndirən müxalifətçi Pənah Hüseyn ciddi siyasi, iqtisadi islahatlar olmadığı halda növbəti mərhələdə siyasi müxalifətin prosesə qoşulmasını qaçılmaz adlandırıb.