Media-icmal 25.07.2016

Tolerantlıq nümunəsi olan kənd

“Azərbaycan” qəzeti (http://www.azerbaijan-news.az/index.php?mod=3&id=101704) ölkədə müxtəlif xalqların birgə yaşayışına dair “180 illik birgə yaşayış” sərlövhəli məqalə ilə çıxış edib.

Müəllif Azərbaycanda müxtəlif xalqların birgəyaşayışının təsdiqi kimi Gədəbəy  rayonunun Slavyanka kəndini nümunə göstərir. Müəllif deyir ki, bü birgəyaşayış normaları  ölkədə yürüdülən milli və dini tolerantlıq siyasətinin, multikulturalizm ənənələrinin nəticəsidir: “Azərbaycan müstəqillik əldə etdikdən sonra ümummilli lider Heydər Əliyevin siyasi iradəsi nəticəsində ölkəmizdə tolerantlıq və multikulturalizm ənənələri hüquqi və siyasi müstəvidə yeni mərhələyə qədəm qoymuşdur”.

Müəllif bu kəndin 1837-ci ildə Rusiyanın Tavriya şəhərindən buraya sürgün edilən ruslar tərəfindən salındığını yazır. Dini inancları baxımından “duxobor” olan bu insanlar birbaşa Allaha sitayiş etdiklərindən hər hansı “Allah evi” deyilən məbədləri də yoxdur. İldə bir dəfə “duxobor günü”  münasibətilə dini ayinlər icra edirlər. 

Məqalədə hazırda kəndin 4 min 300 nəfər əhalisi, 1300 evi, onlardan 31-nin rus ailəsi, 3 məktəb, 40 yerlik uşaq bağçası olması kimi statistik göstəricilərə yer verilir.  Bundan başqa kəndin xəstəxana, poçt, elektron ATS, İnternet şəbəkəsi, musiqi məktəbi, mədəniyyət evinin fəaliyyətinin  təmin edildiyi deyilir. Gədəbəyə gedən magistral avtomobil yolu kəndi iki hissəyə ayırır. Əhalinin əsas məşğuliyyəti əkinçilik və heyvandarlıqdır. Kəndin 50-dən artıq sakini yaxınlıqda fəaliyyət göstərən “Slavyanka” mineral sular zavodunda işləyir. Aparılan aqrar islahatlar nəticəsində kəndin 1260 nəfər əhalisi pay torpaqları ilə təmin edilib.

Müəllif kəndin turizm imkanlarına malik olduğunu, bu il Slavyankada təkcə yay mövsümündə 4 mindən artıq turistin dincəldiyini deyir, turistlərin “ev turizmi”nə üstünlük verdiyini bildirir. Müəllif deyir ki, bir turistin birgünlük qalma xərci 10-30 manat arasında dəyişir. 

Məqalədə kənddə beynəlimiləl ailələrin olması, bu ənənənin davam etməsi xüsusilə qeyd edilir və kənddə yaradlan bütün rahatlıqlarla bağlı dövlət başçısı İlam Əliyevə minnətdarlıq edildiyi xüsusi vurğulanır.

Bu il prezident seçkiləri də ola bilər 

“Azadlıq” qəzetində (http://www.azadliq.info/148156.html) dərc edilən “Parlamentin səlaiyyətlərinin azaldılmasına səbəb hakimiyyətdaxili ziddiyyətlərdir” sərlövhəli məqalədə isə dövlət başçısı İlam Əliyevin rəy alınması üçün Konstitusiya  Məhkəməsinə göndərdiyi Konstitusiyaya dəyişikliklərə dair Referendum Aktının müddəaları müzakirə obyektidir.

Məqalədə dövlət başçısı İ.Əliyevin Konstitusiya Məhkəməsinə göndərdiyi bu dəyişikliklər layihəsinə bu gün baxılacağı vurğulanır. Müəllifin fikrincə, hadisələr çox sürətlə cərəyan edir və ekspertlərə istinadən 2018-ci ildə keçirilməli olan president seçkilərinin 2016-cı ildə keçirilməsini də mümkün sayır: “Referendumun tələsik keçirilməsi, səlahiyyətlərin bir əldə cəmləşməsi onu deməyə əsas verir ki, hakimiyyət bunu mümkün qədər tez etmək istəyir”.  Bu xüsusda müəllif diqqəti parlamentin səlahiyyətlərinin kəskin şəkildə məhdudlaşdırılmasına cəmləyir.

İstiqlalçı deputat, Milli Şuranın Koordinasiya Mərkəzinin üzvü İbrahim İbrahimli prosesi şərh edərək deyir ki, 2009-cu ildə keçirilən referendumla konstitusiyalı  monarxiyaya keçidə start verilib. I.Ibrahimlinin fikrincə, iqtidar uzun illər idi ki, neft pullarının hesabına ölkəni rahat idarə edirdi. Amma manatın iki devalvasiyası, neft pullarının və istehsalın azalması iqtisadi çətinlikləri üzə çıxardı: “Artıq ölkənin büdcəsində ciddi şəkildə çətinlik, tədiyyə balansında kəsir əmələ gəlib, idxal ilə ixrac arasında kəskin fərq yaranıb, ölkədən güclü kapital axanı yaşanır. Odur ki, hakimiyyət böhranın dərinləşib dibə dəyməsinə qədər bütün səlahiyyətləri vahid əldə cəmləşdirmək istəyir”.

I.Ibrahimliyə görə, sənəddə Milli Məclisin, Nazirlər Kabinetinin səlahiyyətlərinin azalmasının səbəbi də hakimiyyət daxilindəki ziddiyyətlərdədir.

Ə.Həsənov: “Bu, davam edəcək”

“Yeni Müsavat” qəzeti isə “Bankların bağlanmasında yeni mərhələ-dörd bankın lisenziyası ləğv edildi” (http://musavat.com/news/iqtisadiyyat/banklarin-baglanmasinda-yeni-merhele-dord-bankin-lisenziyasi-legv-edildi_365083.html) sərlövhəli məqaləsində ölkənin bank sektorunu perspektivi ekspertlərlə müzakirə edilir.

Bu müzakirələr bu günlərdə lisenziyaları ləğv edilən “Parabank”ın, “Dekabank”ın, “Kredobank”ın, “Zaminbank”ın bağlanması fonunda baş verir. Məqalənin ön hissəsində bu bankların bağlanmasına dair Maliyyə Bazarlarına Nəzarət Palatasının əsaslandırması, banklardakı əmanətlər və onların əmanətçilərə qaytarılması haqda danışılır.

Ekspert Əkrəm Həsənov ölkə banklarının perspektivilə bağlı nikbin düşüncədə deyil: “Ardı yenə olacaq. Bank sistemində vəziyyət olduqca ağırdır, amma buna görə məsuliyyətə cəlb olunan yoxdur. Vaxtaşırı bankların etibarlılıq reytinqini dərc edirəm və deyirəm ki, hesabatını dərc etməyən bankların vəziyyəti pis olduğu üçün bunu etmirlər. Budur- onların sırasından dördü də tarixə qovuşdu.

Ə.Həsənov deyir ki, bankların çökməsinin səbəbi bank rəhbərlərinin, menecerlərin acgözlüyü, əliəyriliyi və savadsızlığındadır. Onun fikrincə, daha bir cəbəb Mərkəzi Bankın öz səlahiyyətlərini bərbad şəkildə yerinə yetirməsidir. Ekspert reytinqlərə istinadən bu bağlanma prosesinin davam edəcəyini  bildirir. Ekspert deyir ki, bu banklarda yüksək faizli sığortalanmayan əmanətlər də çox olub və onların hamısı batıb.

Ekspert Qubad İbadoğlu isə deyir ki, bankların səas bağlanma səbəbi bir sıra bankların maliyyə mötəbərliliyi və adekvatlığını itirməsi üzündən defolta düşməsidir. Q.İbadoğlu deyir: “Amma bu proses heç də manata olan etimadı artırmayacaq. Çünki bankları bundan sonra da ciddi sınaqlar gözləyir. Bankların problemlərinin həlli bütünlükdə iqtisadiyyatın inkişafından asılıdır, bu isə yaxın vaxtlar üçün mümkün sayıa bilməz”.