Media-icmal 29.06.18

2018-ci il iyunun 26-da keçirilmiş hərbi parad, aqrar sektorun inkişfına mane olan amillər, Avropa Şurası və Azərbaycan münasibətləri, xaricdə dini təhsil almaq sahəsindəki durum bugünki (29 iyun, 2018-ci il) medianın aparıcı mövzularındandır...

İşğalla barışmama paradı

"Azərbaycan" qəzeti "Azərbaycan əsgərinin böyük vətənpərvərlik ruhu var" sərlövhəli məqalədə Azərbyacan Ordusunun yaradılmasının 100 illiyi ilə bağlı iyunun 26-da Bakida keçirilmiş hərbi paradı dəyərləndirir.

Müəllif deyir ki, bu parad Azərbaycanın heç vaxt işğalla barışmayacağının və öz ərazi bütövlüyünü bərpa edəcəyinin təsdiqi idi.

Ölkə hakimiyyətinin ordu quruculuğunu əsas prioritetlərdən biri hesab etdiyini deyən yazı müəllifi Azərbaycan ordusunun dünyanın ən güclü orduları sırasında olmasını bununla əlaqələndirir.

Müəllif vurğulayır ki, Azərbaycanın indiki gücü 1993-cü ildə ümumilli lider Heydər Əliyevin yenidən hakimiyyətə gəlməsi və həmin siyasəti indi prezident İlham Əliyevin davam etdirməsilə bağlıdır: "Artıq 15 ildən çoxdur Prezident İlham Əliyevin apardığı məqsədyönlü siyasət nəticəsində Azərbaycan güclənib, qüdrətlənib, dünyada söz sahibi olub".

Müəllif ölkənin iqtisadi gücünün ordunu da gücləndirməyə, 2003-cü ildən indiyədək hərbi xərcləri 15 dəfə artırmağa, ən müasir silah və texnika ilə təchiz etməyə imkan verib: "Azadlıq meydanındakı hərbi parad düşmənə bir daha sübut etdi ki, biz təkcə hərbi gücə deyil, həm də böyük vətənpərvərlik ruhuna malikik. Çünki Azərbaycan dövlətinin müdrik başçısı, Azərbaycan Ordusunun güclü sərkərdəsi var".

Azərbaycan Ordusunun əsgər, zabit və generallarının qəhrəmanlıq və rəşadət göstərdiyini deyən müəllif strateji yüksəkliklərin ələ keçirilməsini, Lələtəpə yüksəksliyində, Ağdərə dağlarında Azərbaycan bayrağının dalğalanmasını bunun göstəricisi adlandırır.

Yaşlı nəslin nümayəndəsi olduğunu deyən müəllif vurğulayır ki, dünyanın çox gərdişini görmüş yaşlı insanların, ağsaqqal və ağbirçəklərin böyük qələbənin yaxında olmasına şübhəsi yoxdur.

Müəllif bir neçə gün bundan əvvəl keçirilmiş həmin parada baxdıqca həm də böyük qələbə paradını göz önündə canlandırdıqlarını və o xoşbəxt günün tez gəlməsi üçün dualar etdiklərini bildirir.

Aqrar sahənin özündən böyük problemləri

"Yeni Müsavat" qəzetində isə "Aqrar sektorun dərdi: kredit, sığorta..." sərlövhəli məqalə oxumaq olar.

Müəllif ölkənin qeyri-neft sektorunun ən önəmli sahəsi olan kənd təsərrüfatı istehsalındakı durumu ekspert Rəşad Həsənovla dəyərləndirir.

Yazı müəllifi deyir ki, kənd təsərrüfatının inkişafı ölkə iqtisadiyyatının əsas prioritetlərindən biri elan edilib, bu sahəyə uzun illərdir dövlət dəstəyi verilir, amma bu sahənin yetərli inkişafından danışmaq hələ tezdir.

"Aqrar sektorda çoxsaylı və ciddi problemlər mövcuddur. Ən böyük problemlərdən biri kənd təsərrüfatı istehsalının çox kiçik hissələrə bölünmüş torpaqlarda həyata keçirilməsidir. Torpaq islahatı nəticəsində torpaqlar kiçik hissələrə bölünərək pay torpağı şəklində əhaliyə paylanıb". Ekspert R.Həsənov bu sahədəki durumu qəzetə belə şərh edir.

Ekspert deyir ki, bir zamanlar əhalinin əksəriyyəti neft gəlirləri hesabına icra edilən infrastruktur layihələrində işləməklə qazandı, uzun illər boyu torpaqların çoxu istifadəsiz qaldı.

R.Həsənova görə, əhali son zamanlar torpaqlardan təyinatı üzrə istifadə etməyə başlayıb, indi də problemlərdən biri budur ki, əksəriyyətinin əlində texnika, ilkin kapital, yüksək məhsuldarlıq əldə etməyə imkan verən bilik və bacarıqlar yoxdur.

Ekspert bildirir ki, Azərbaycanda kənd təsərrüfatı istehsalçılarının 97 faizi ailə təsərrüfatlarıdır: "Kiçik təsərrüfatların maliyyə resurslarına çıxış imkanları isə həddindən artıq aşağıdır. Onlar bankların təklif etdikləri girov, zaminlik və sair şərtləri ödəyə bilmirlər. Beynəlxalq təşkilatlar tərəfindən müəyyən layihələr icra edilirdi, banklar vasitəsilə aqrar istehsalçılar üçün kreditləşmə işləri aparılırdı.

Lakin bu məbləğlər sektorda inkişafa nail olmaq üçün yetərli deyil".

R.Həsənov son zamanlar bu sahədə müəyyən işlər görüldüyünü desə də, bunların kağız üzərində qaldığını, icra istiqamətində işlərin çox ləng getdiyini iddia edir.

Ekspert deyir ki, kənd təsərrüfatı kooperasiyalarının yaranması ilə bağlı qanunvericilikdəki boşluqlar, Kredit Zəmanət Fondunun 30 min manatdan aşağı olan kreditlərə zəmanət verməməsi, bu sahədə səmərəli sığortalanma sisteminin olmaması, əhalinin 36%-inin məşğul olduğu bu sahədə əmək haqqının aşağı (220-230 manat) olması, müasir texnoloji nailiyyətlərin tətbiq edilməməsi, idarəçiliyin səmərəsizliyi də problemlər sırasındadır.

R.Həsənov deyir ki, torpaqların şoranlaşması da bu problemlərdən biridir və aqrar sektorun sadalanan problemləri aradan qaldırılmayınca ciddi irəliləyiş əldə etmək mümkün olmayacaq.

Uğur və uğursuzluq sərhəddi

"Azadlıq.info"da isə "Hökumətin növbəti yalanı və saxta uğur çırpıntıları..." sərlövhəli məqalə diqqət cəlb edir.

Müəllif iddia edir ki, Azərbaycan Avropa Şurası Parlament Assambleyasındakı (AŞPA) uğursuzluqlarını uğur kimi təqdim etmyə çalışır və buna qarşı əks arqumentlərini ortaya qoyur.

Müəllif AŞPA-da korrupsiya və rüşvət halları ilə bağlı ilkin istintaq komissiyası yaradıldığını və komissiyanın bu ilin aprelində hazırladığı hesabatda Azərbaycanın AŞPA-dakı nümayəndə heyətinin tərkibinə daxil olan bir neçə deputatın adlarının keçdiyini bildirir.

Müəllif deyir ki, Azərbaycanla bağlı korrupsiya qalmaqalını ört-basdır etmək üçün Azərbaycanın bu qurumdakı nümayəndə heyətinin rəhbəri Səməd Seyidovun AŞPA-nın vitse-prezidenti seçilməsi uğur kimi təqdim edilir: "Halbuki, bu, yeni xəbər deyil, yanvar ayında baş vermiş hadisəni yeni kimi təqdim etməkdə məqsəd var. Bunu Azərbaycan hökumətinin uğuru kimi qələmə verməyə çalışırlar".

Müəllif isə bildirir ki, bu, nə Azərbaycan hökumətinin, nə də S.Seyidovun uğurudur, AŞPA-da vitse-prezidentlik rotasiya qaydasında texniki məsələdir, yəni, bu qayda ilə bütün nümayəndə heyətlərinin rəhbərləri vitse-prezident olur.

Müəllif S.Seyidovun bu sessiyada heç bir vəzifəyə seçilmədiyini, ona qarşı tətbiq olunan sanksiyaların isə qüvvədə qaldığını bildirir.

Müəllifə görə, AŞ-da korrupsiyanı araşdıran komissiya ona digər iki azərbaycanlı deputatla müqayisədə daha yüngül cəza verib. "S.Seyidovu avropalı siyasətçilərin ələ alınmasıyla bağlı korrupsiya əməllərinə görə yox, rəhbərlik etdiyi nümayəndə heyətindəki deputatlara, konkret olaraq, Elxan Süleymanov və Müslüm Məmmədova nəzarət edə bilmədiyinə, məsuliyyətsizliyə görə cəzalandırıblar".

Müəllif S.Seyidovun AŞPA-nın Serbiya üzrə məruzəçisi olduğunu, adı çəkilən komissiyanın qərarına əsasən bu vəzifədən uzaqlaşdırıldığını və AŞPA-nın İnsan Hüquqları və Hüquqi Məsələlər Komitəsində səsvermə hüququndan məhrum edildiyini deyir.

Müəllif E.Süleymanov və M.Məmmədova, eləcə də onlarla işbirliyində olub, korrupsiyaya bulaşmış başqa avropalı deputatlara bundan sonra heç vaxt AŞPA-nın üzvü ola bilməmək, Avropa Şurası strukturlarının binalarına daxil olmamaq, tədbirlərində iştiraklarının yasaqlanması kimi sərt cəzalar verildiyini bildirir.

Müəllif yada salır ki, AŞPA həm Azərbaycana siyasi məhbuslar üzrə məruzəçi təyin edib, həm də Azərbaycanda son prezident seçkilərini demokratik saymayan qətnamə qəbul edib.

Xaricdə dini təhsilə son...?

"Trend.az" da isə "Azərbaycanda mövcud olan iki mindən artıq məsciddən bəziləri din xadimləri ilə təmin olunmayıb" sərlövhəli məqalə diqqət cəlb edir.

Müəllif dini thəsil sahəsindəki durumu yeni yaradılan İlahiyyat İnstitutunun rektoru Ceyhun Məmmədovla müzakirə edir.

Müəllif deyir ki, C.Məmmədov institutda islamşünaslıq üzrə təhsilini başa vuran mütəxəssislərin Qafqaz Müsəlmanları İdarəsinin (QMİ) sərəncamına veriləcəyini və onların QMİ vasitəsilə yerlərdə məscidlərə imam vəzifəsinə təyin olunacaqlarını bildirir.

Rektor indiyədək üç minə yaxın azərbaycanlının xaricdə dini təhsil aldığını bildirərək, bu amilin yaratdığı narahatlığı da dilə gətirib: "Lakin zaman-zaman onların bəziləri təhsil aldıqları ölkənin ideologiyasını Azərbaycanda yaymağa cəhd ediblər. Bilirsiniz ki, qanunvericiliyə edilən düzəlişə əsasən, xaricdə dini təhsil alanlar Azərbaycanda məscidlərdə işləyə bilməzlər".

Amma müəllifin sözlərinə görə, bununla yanaşı, C.Məmmədov onların arasında savadlı, vətənpərvər mütəxəssislərin olduğunu da söyləyib: "Qanunvericiliyə əsasən, mərkəzi icra hakimiyyətinin razılığı ilə onların bir hissəsi məscidlərdə fəaliyyət göstərirlər".

Müəllif bildirir ki, C.Məmmədov İlahiyyat İnstitutunda yeni tədris standartlarının hazırlanması ilə bağlı Təhsil Nazirliyi ilə danışıqlar aparıldığını deyib.

Həm də rektorun sözlərinə görə, bununla bağlı yaxın gələcəkdə yekun qərar qəbul ediləcəyi gözlənilir.

C.Məmmədovun sözlərinə görə, institutda təhsilin tam elektronlaşdırılması nəzərdə tutulur.

Müəllif vurğulayıb ki, C.Məmmədov bu istiqamətdə iş aparıldığını, yaxın günlərdə institutun veb-saytının hazırlanmasına başlanılacağını söyləyib.

Xatırladaq ki, İlahiyyat İnstitutu Dini Qurumlarla iş üzrə Dövlət Komitəsinin tabelyində yaradılıb. BDU-nun ilahiyyat fakultəsi bu instituta aid edilib və bu il instituta 60 nəfər tələbə qəbulu nəzərdə tutulur.

#s3gt_translate_tooltip_mini { display: none !important; }