Media-icmal 30.07.20

Ölkədə COVİD-19-a qarşı mübarizə, neftin qiymətinin ucuzlaşa bilməsi ehtimalı, manatın məzənnə perspektivi, Biləsuvarda su qıtlığı və s. məsələlər medianın aparıcı mövzuları sırasındadır... 

Dinamika müsbət olsa belə...

"Azərbaycan" qəzeti  "Əhalinin sağlamlığı və təhlükəsizliyi etibarlı təmin olunur" sərlövhəli məqalədə COVİD-19 pandemiyasına qarşı mübarizəni dəyərləndirir.

Məllif deyir ki, Azərbaycanda da yeni növ koronavirusa qarşı mübarizə davam edir, əsas diqqət infeksiyanın nəzarətdə saxlanmasına, əhalinin təhlükəsizliyinin və sağlamlığının etibarlı təmin olunmasına yönəlib.

Müəllifə görə, ölkə əhalisi həm qoruyucu vasitələr, həm də preparatlarla təmn edilirlər.

Yazı müəllifi əlavə edir ki, pandemiya ilə mübarizədə modul tipli xəstəxanalar müstəsna rol oynayır, bölgələr də daxil olmaqla, ölkədə 2000 çarpayılıq 10 modul tipli xəstəxana quraşdırılır. İyulun 29-da Qobustan və İsmayıllıda iki belə xəstəxana fəlaiyyətə başlayıb.

Məqalə müəllifinin sözlərinə görə, Azərbaycan dövləti qlobal böhranın ölkədə daha az hiss olunması üçün bütün istiqamətlərdə lazımi tədbirlər görür.

Onun fikrincə, karantin dövrü ərzində vətəndaşlara göstərilən maddi və sosial yardımlar əhəmiyyətli rol oynayır, Azərbaycanda təqribən 5 milyona yaxın insan dövlət tərəfindən maddi dəstəklə əhatə olunub.

Müəllif deyir ki, COVID-19-la bağlı hazırda müsbət dinamika müşahidə edilir və gündəlik sağalmanın 600-dən yuxarı olmasını tezliklə karantin rejiminin yumşaldılmasına işarə hesab edir.

Müəllif ölkənin baş infeksionisti Cəlal İsayevə istinadən deyir ki, bu gün epidemioloji situasiya bayram vaxtı rayonlara, kəndlərə getməyə imkan vermir. Onun fikrincə, dinamika müsbət olsa da, təhlükə sovuşmayıb, odur ki, vətəndaşlar preventiv tədbirlərin şərtlərinə əməl etməlidirlər.

Bu ehtimal nə qədər ciddidir?

"Redaktor.az" saytında dərc edilən "Neftin qiyməti yenidən ucuzlaşacaq? – qara qızılın qara günləri" sərlövhəli məqalədə neftin ucuzlaşacağı ehtimalları müzakirə edilir. 

"Hazırda neftin qiymətinə təsir edən iki mühüm amil var: dolların qiyməti, pandemiyada ikinci dalğanın yaranması. Neft dollarla satıldığı üçün dünya birjalarında dolların dəyərdən düşməsi qiymətə bir başa təsir göstərir, yəni dollar ucuzlaşdıqca neft bahalaşır".

İqtisadçı-ekspert Natiq Cəfərlinin sözlərinə görə, dünya birjalarında neftin qiymətinin 50 dollardan yuxarı qalxması gözlənilmir:

"Diqqət etsəniz, hazırda dolların indeksi aşağı düşür, neftin qiyməti qalxır. Hətta "Azeri Light" markalı neftin bir barreli 45 dollardan yuxarı qalxıb. Lakin qiymət hər an yenidən aşağı enə bilər. Çünki dünyada pandemiyanın ikinci dalğasının olacağı ilə bağlı yayılan xəbərlər neftin qiymətinə mənfi şəkildə təsir edir. İqtisadiyyatın daralması məsələsi Avropa və Amerikada yenidən gündəmə gəldiyi üçün neftin qiyməti sabitləşmir. Bu səbəbdən son bir həftə ərzində qiymət təxminən 41-44 dollar arasında dəyişir.

Ekspert deyir ki, qeyd etdiyi faktorlar qiymətin daha da yuxarı qalxmasına ikman vermir: "Əgər yaxın zamanlarda bu iki faktorda bir dəyişiklik olmasa, ikinci dalğanın qarşısı alınmasa və ya iqtisadiyyatın bu dalğadan təsirləri sığortalanmasa, qiymətlər yenidən 30 dollara qədər düşə bilər".

Manatın məzənnə perspektivi

"Bizimyolinfo.az"da isə "Dollar "yerində sayır", avro "üzür": Manatı nə gözləyir…"  sərlövhəli məqalədə bank sahəsi üzrə ekspert Əkrəm Həsənovun dünya valyutaları olan dollar və avronun perspektivi barədə düşüncələrinə yer verib.

Müəllif deyir ki, ICE London qitələrarası birjasında keçirilən ticarət əməliyyatlarının gedişində "Brent" neftinin ixracına dair 2020-ci ilin oktyabr müqaviləsinin dəyəri 0,05% azalaraq 1 barelə görə 43,59 dollar təşkil edib.

Müəllif əlavə edir ki, Azərbaycan Mərkəzi Bankının bu günə olan məlumatına görə, iyulun 29-da olan rəsmi məzənnələr bülleteninə əsasən, ABŞ dollarının rəsmi məzənnəsi 1.7000 manat, 1 Avro 1.9939 manat təşkil edir.

Ekspert bildirib ki, birjada neftin hazırkı qiyməti dövlət büdcəsində nəzərdə tutulan qiymətdən aşağıdır. "Azərbaycan neftinin qiymətinin ucuzlaşması müvəqqətidir. Son bir ayda neftin qiyməti 40-45 dollar arasında dəyişir. Bu intervalda neftin qiyməti sabitləşib, amma bu qiymət dövlət büdcəsində nəzərdə tutulan qiymətdən azdır.

Belə ki, 2020-ci ilin dövlət büdcəsində "Azeri Light" markalı Azərbaycan neftinin 1 barelinin qiyməti 55 ABŞ dolları nəzərdə tutulub".

Ekspert deyir ki, valyuta ehtiyatları hesabına Mərkəzi Bank məzənnəni, demək olar ki, dəyişməz olaraq saxlayıb. Ona görə də yaxın günlərdə devalvasiya olacağını düşünmürəm", deyə ekspert Əkrəm Həsənov bildirib.

Biləsuvarda su qıtlığı?

"Sfera.az"da isə "Biləsuvar susuzdur! – deputat çağırış etdi" sərlövhəli məqalədə deputat Bəhruz Məhərrəmov Biləsuvarda su qıtlığı yaşanmasını gündəmin müzakirəsinə çıxarıb.

Deputatın sözlərinə görə, bu məsələ parlamentin iclaslarında dəfələrlə gündəmə gətirilib və aidiyyatı qurumlardan məsələnin ciddiliyinin fərqinə varmağı xahiş edib.

B.Məhərrəmov deyib ki, bu problem yerli orqanların həll edəcəyi məsələ deyil, odur ki, Biləsuvara kömək lazımdır: "Bəli, digər rayonlarda su problemi var, lakin Biləsuvarın vəziyyəti tam fərqlidir. Biləsuvarda olan su qıtlığı digər heç bir rayonda yoxdur. Qonşu rayonlardan, suyu azalsa da, çaylar keçir, Biləsuvarda isə heç bir təbii su qaynağı yoxdur".

Deputat xüsusi olaraq vurğulayıb ki, əgər ölkədə su problemi həll olunacaqsa, inanırıq ki, məsələyə Biləsuvardan başlamaq lazımdır.