Media icmalı – 01.09.2023

Ölkədə rüşvət alan vəzifəli şəxslərin ifşa edilməsi, Ermənistan - Azərbaycan sərhəddində atışma, Ərəb turistlərin sayının azalması bu gün (01.09.23) üçün əsas müzakirə olunan mövzulardan olub.

525-ci qəzet saytında yayımlanan “Rüşvət müqabilində gömrük sərhədindən malların keçirilməsinə şərait yaradan vəzifəli şəxslər ifşa edilib” sərlövhəli yazıda rüşvət alan insanlar haqqında məlumat yazılıb. Müəllifin sözlərinə görə Dövlət Gömrük Komitəsinin Cənub Ərazi Baş Gömrük İdarəsinin Əməliyyat və təhqiqat idarəsinin rəisi vəzifəsində işləmiş Malik Əliyev və digər şəxslərin qanunsuz əməlləri barədə həmin Komitədən daxil olmuş məlumat əsasında Baş prokuror yanında Korrupsiyaya qarşı Mübarizə Baş İdarəsində cinayət işi başlanılıb.

Müəllif vurğulayıb ki, ümumi dəyəri 30 min manat olan dərman vasitələrinin Astara gömrük postundan ölkə ərazisinə qanunsuz keçirilməsinə şərait yaratmasına əsaslı şübhələr müəyyən edilib. Müəllif sonda qeyd edib ki, Malik Əliyev, Mehdi Mehrəliyev və Zaman Əbdurəhmanova Cinayət Məcəlləsinin 32.5, 206.1 (qaçaqmalçılığa köməklik etmə), 308.1 (vəzifə səlahiyyətlərindən sui-istifadə), 311.3.1 və 311.3.3-cü (qabaqcadan əlbir olan bir qrup şəxs tərəfindən və külli miqdarda rüşvət alma), Ramin Məmmədzadəyə isə həmin Məcəllənin 206.1-ci (qaçaqmalçılıq) maddəsi ilə ittiham elan edilib, Malik Əliyev barəsində məhkəmənin qərarilə həbs, digər şəxslər barəsində isə polisin nəzarəti altına vermə qətimkan tədbiri seçilib.

BBC Azərbaycanca saytında yayımlanan “Azərbaycan-Ermənistan sərhədində atışma: "ölənlər və yaralananlar var" sərlövhəli yazıda bu gün baş verən atışma haqqında məlumat verilib. Müəllifin sözlərinə görə  sərhəddə baş verən atışmalarda Ermənistan Müdafiə Nazirliyi dörd hərbçisinin həlak olduğunu, Azərbaycan Müdafiə Nazirliyi isə üç hərbi qulluqçusunun yaralandığını açıqlayıb. Müəllif qeyd edib ki, Azərbaycan-Ermənistan sərhədində ölüm və yaralanma ilə nəticələnən davamlı atışma Xankəndində ərzaq çatışmazlığı probleminin həlli ilə bağlı müzakirələrin intensivləşdiyi və Qarabağda siyasi vəziyyətin gərginləşdiyi bir vaxta təsadüf edir.

Trend.az saytında yayımlanan “Ərəblər Azərbaycana niyə az gəlir?” sərlövhəli yazıda Azərbaycana gələn Ərəb turistlərin sayının azalmasının səbəbləri haqqında yazılıb. Müəllifin sözlərinə görə bu il Azərbaycana gələn ümumi turistlərin sayı 37 faiz artıb, xüsusilə Avropa ölkələrindən gələnlərin sayında artım müşahidə olunub. Müəllif bu haqda turizm məsələləri üzrə ekspert Ceyhun Aşırovla danışıb. Onun sözlərinə görə ərəb ölkələrindən gələnlərin sayında azalma qeydə alınıb. Bu azalmanın səbəbi daha çox ərəblərin müxtəlif turizm destinasiyalarına getməsidir.

“Ərəb ölkələrində olan turistlər digər ölkələrə, xüsusilə Avropa ölkələrinə səfərlər ediblər. Misal üçün əvvəllər ərəblər üçün 10 turizm məkanı var idisə, indi 20 məkan var. Yəni, ərəb turistləri yenə də eyni qaydada səyahət ediblər, amma çoğrafi paylaşımda Azərbaycana düşən pay azalıb”.

 Sosial media

AzadlıqRadiosu

“Azərbaycanda evdar kişilərin sayı 100min nəfər artıb”- Müəllifin sözlərinə görə İqtisadi qeyri-fəal əhali qrupunda "ev işlərini yerinə yetirən, uşaqlara və digər ailə üzvlərinə qulluq edənlər" – evdar qadınlar sayca daha çox yer tuturlar. Müəllif qeyd edib ki, 2021-ci ildə

"ev işlərini yerinə yetirən, uşaqlara və digər ailə üzvlərinə qulluq edənlər" arasında kişilərin sayı 33 min nəfərdir. Ötən ilə aid göstəricilərdə eyni qrupa daxil olanların sayı 131 min nəfərə yüksəlib. Deməli, siyahıyaalma üzə çıxarıb ki, əslində ölkədə ev işləri görən, uşaqlara və digər ailə üzvlərinə qulluq edən kişi sayı 100 min nəfərə yaxın daha çoxdur.

MeydanTV

Qiymət artımı: “Aldığımız maaşın hamısını bazarda xərcləyirik”- Video materialda Ərzaq qiymətlərinin artırılmasından danışılıb. BU haqda müəllif iqtisadçı Fərid mehralızadə ilə danışıb və bazarda olan əhali arasında kiçik sorğu keçirib. İnsanlar qiymətlərin artması və istədikləri ərzaqların hamısını ala bilməməklərindən şikayətləniblər. İqtisadçının sözlərinə görə ən çox artım ət məhsullarında olub. Ümumi ərzaqların qiymət artımı isə 40 faizə qədərdir. Müəllifin sözlərinə görə bundan əlavə əhali market qiymətlərinin baha olmasından da şikayətləniblər.