![Açiq mənbələrdən foto.](https://turan.az/resized/media/2023/main/081800065568-750-500-resize.webp)
Açiq mənbələrdən foto.
Ölkədə gediş haqqının ödənilməsi, taksi sürücülərinin rüsumları, əsgərin intiharı, uzunmüddətli sülh üçün lazım olan əsas amil bu gün (18.08.2023) üçün mediada əsas müzakirə olunan mövzulardandır.
“525-ci qəzet” saytında yayımlanan “Gediş haqqının elektron qaydada ödənilməsi halları müəyyənləşəcək” sərlövhəli yazıda gediş haqqının ödənilmə qaydaları ilə bağlı yeniliklər qeyd olunub. Müəllifin sözlərinə görə müntəzəm sərnişin daşımalarının həyata keçirilməsi nəzərdə tutulan avtonəqliyyat vasitələrinin gediş haqqının elektron qaydada ödənilməsi üçün ödəniş alətləri ilə təchiz olunması halları müəyyənləşəcək. Müəllif fərmanda qeyd olunan müntəzəm sərnişin daşımalarının həyata keçirilməsi nəzərdə tutulan avtonəqliyyat vasitələrinin gediş haqqının elektron qaydada ödənilməsi üçün ödəniş alətləri ilə təchiz olunması hallarına dair normativ hüquqi aktları altı ay müddətində hazırlanıb təsdiq olunmasını vurğulayıb.
Anews.az saytında “Taksi sürücülərinin ödəyəcəyi rüsumlar təsdiqləndi” sərlövhəli yazıda “Dövlət rüsumu haqqında” qanunda olunan dəyişikliklər qeyd olunub. Müəllifin sözlərinə görə taksi fəaliyyəti üçün yeni rüsumlar təyin olunub:
“Taksi sifarişi operatoru fəaliyyətinə icazənin verilməsi üçün rüsum 3 min manat, taksi minik avtomobilləri ilə sərnişin daşımalarına buraxılış vəsiqəsinin verilməsi üçün rüsum 125 manat, hər bir nəqliyyat vasitəsi üçün buraxılış kartının verilməsi üçün rüsum 25 manat, Azərbaycanla xarici ölkələr arasında avtomobil nəqliyyatı ilə daşımaları yerinə yetirmək üçün operatorlara beynəlxalq yük və qeyri-muntəzəm sərnişin daşımalarına buraxılış vəsiqəsinin verilməsi üçün rüsum 250 manat, hər bir nəqliyyat vasitəsi üçün buraxılış kartının verilməsi üçün isə rüsum 75 manat olacaq”.
“Azərbaycan Ordusunun əsgəri özünü öldürüb” sərlövhəli yazıda kiçik çavuş Asim Hamail oğlu Abbasovun odlu silahdan atəş açmaqla özünü öldürməsi haqqında məlumat verilib. Müəllif qeyd edir ki, fakt üzrə Ağdam Hərbi Prokurorluğunda Azərbaycan Respublikası Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanılaraq şahidlər dindirilib, müvafiq ekspertizalar təyin edilib və təxirəsalınmaz zəruri istintaq hərəkətləri həyata keçirilib. Müəllif hələki bu haqda araşdırma aparıldığını qeyd edib.
Trend.az saytında yayımlanan “Ermənistan silahlı qüvvələrinin ərazilərimizdən ən qısa zamanda çıxarılması uzunmüddətli sülh üçün zəruri şərtdir - Elçin Əmirbəyov” sərlövhəli yazıda Qarabağla bağlı sülh danışıqlarının nəticə verməsi üçün görülməli zəruri tədbirlər haqqında danışılıb. Yazıda Elçin Əmirbəyov Çinə səfəri zamanı “Feniks TV”yə verdiyi müsahibə qeyd olunub. Elçin Əmirbəyov sülhün bərpa olunması üçün qarşılıqlı inamın yaranmasının zəruriliyini vurğulayıb. Bu inamın yaranması üçünsə hər iki tərəfin öz öhtəliklərini yerinə yetirməl olduğunu qeyd edib. Onun sözlərinə görə prosesin sürətlənməsi üçün deyilən sözlərdənsə onları davranışla göstərmək daha effektiv və sürətli həll yoludur.
“2020-ci ilin noyabrında İkinci Qarabağ müharibəsi başa çatıb. Azərbaycan uzun müddət işğal altında qalmış torpaqlarını azad edib. Biz Ermənistana sülh gündəliyi təklif etmişik. Hesab edirəm ki, indi - ərazi bütövlüyünü və tarixi ədaləti bərpa etdikdən sonra düşmənçilik səhifəsini çevirmək və Ermənistanla mehriban qonşuluq əlaqələri, sülh münasibətləri qurmağa çalışmaq şansımız var. Çünki biz bu bölgənin daha yaxşı gələcəyə layiq olduğunu düşünürük”.
Sosial media
Zabratda tullantı yığan qadın: "Kiməsə gedib demirik ki..."- Video müsahibədə Zabrat sakini Gülnaz Əhmədovanın işsizliyə görə çəkdiyi əziyyətdən danışılıb. Onun sözlərinə görə2 ildir zibil yığaraq pul qazanmağa çalışır. O aidiyyatı qurumlara müraciət etsə də heç bir nəticənin olmadığını vurğulayıb.Məcburiyyətdən bu işlə məşğul olduğunu qeyd edib.
Gizli yayılan xərçəng: Qadınlar üçün təhlükəyə çevrilən virusa qarşı peyvəndləmə başlayacaq?- Video materialda qadınlar arasında yayılmış xərçəng haqqında danışılıb. Müəllifin sözlərinə görə hazırda qadınlarda HPV virusunun yayılmasına qarşı vaksinlərdən istifadə oluna bilər. Dünya praktikasında vaksinasiya prosesi bəzi ölkələrdə ödənişsizdir. Video materialda əhali arasında sorğu keçirilib. Bəzi qadınlar bu virus və xəstəlik haqqında məlumatsız olduqlarını qeyd ediblər. Müəllif video materialda ginekoloqla müsahibə aparıb.
Musiqi alətlərinin qiyməti: Gömrük rüsumları həddindən artıq çoxdur – Video materialda musiqi alətlərinin hazırki qiyməti ilə bağlı araşdırma aparılıb. Bir neçə musiqiçi ilə müsahibə aparılıb. Musiqiçilər alətlərin bahalı, gəlirlərin aşağı olmasını vurğulayıblar. Onların sözlərinə görə yerli bazarda olan qiymətlər xaricilərlə eynilik təşkil edir bu isə düzgün deyil. Onlar əllərindəki büdcə ilə sadecə başlanğıc səviyyədə olan alətləri ala biləcəklərini qeyd ediblər.
Rəy yaz