![Media-monitorinq 16.03.2016](https://turan.az/resized/750/500/resize/media/2016/main/031600149997.jpg)
Rəsmi qəzetlər, demək olar ki, bütün səhifələrini dövlət başçısı İlham Əliyevin martın 15-də Ankara səfərinə həsr ediblər.
Vətəndaşların sosial və ailə problemləri müstəqil medianın aparıcı mövzusudur.
İcra başçısı: “Yazanı daş-qalaq edin”
“Azadlıq” qəzeti hökumət komandasında normal kadr tapmağın əsl problem olduğunu deyir və “Daş-qalaq zehniyyətli hökumət” məqaləsində Ağcabədi rayon icra başçısı Şahin Məmmədovun Şənlik kəndində əhali ilə münasibətdə söylədiyi fikirləri diqqətə çatdırır.
İcra başçısına görə, rayona nə qədər pul ayrılması, hansı işə nə qədər pul xərclənməsi camaata aidiyyatı olmayan məsələdir. “Bu pullar kiminsə dədəsinin pulu deyil ki, narahat olsunlar. Əgər mən bu pullara tamah salmıramsa, siz niyə tamah salırsınız?”.
Daha sonra icra başçısı rayona gəlib işləmək istəyən təşkilatların yazı-pozudan qorxduqlarını bildirib. “Əgər bir də bu kənddən kimsə hansısa şikayət dolu yazını mətbuata ötürsə, onu əhali yığışaraq daş-qalaq etsin” hökmü verib.
Qəzet icra başçısının bu mövqeyini əhalini rayondakı yeyintiyə, oğurlamağa göz yummaq, bu cinayətləri ictimailəşdirənləri cəzalandırmaq çağırışı kimi dəyərləndirir. Digər tərəfdənsə qəzet bunu həm də icra başçısının məsuliyyətsizliyi, xalq önündə hesabatlı olması hissini tərk etməsi sayır.
“Bu gün həbsdə olan 100-ə qədər siyasi məhbus da məhz həqiqəti dedikləri üçün, korrupsiyanı ifşa etdiklərinə görə cəzalandırılıblar. Ona görə də Şahin Məmmədov arxayındır və bilir ki, təmsil etdiyi hökumət bunu tələb edir”. Qəzet bu həbslərin həm də siyasi kurs olduğunu bildirir.
“Qısası, hökumət vətəndaşa kölə olmağı əmr edir. “Oğurlayıram, talan edirəm, yaxşı eləyirəm” deyirlər. “Sus, taleyinlə barış, şükr elə” əmr edirlər.”
F.Əlizadə: Neftin dəyəri ensə manatı kataklizm gözləyir
“Əgər neftin dəyəri 25 dollara qədər enməsə manatın nisbi sabitliyi qoruna bilər, amma bütün il ərzində hansısa “sıçrayış”lar”ın oması mümkündür. Bunu “Exo” qəzetinə ekspert Fuad Əlizadə şərhində deyib. Onun firkincə, manatın indiki nisbi güclənməsi xarici valyutaya tələbatın yumşalması ilə bağlıdır. “Görünür, bayram günləri bizim vətəndşalar xaricə getməyəcəklər. Ona görə də pul dəyişmirlər”, F.Əlizadə belə deyib.
Ekspertə görə, valyuta dəyişməsinə qadağa yoxdur, əgər belə hal olsaydı, 90-cı illərdəki kimi “qara bazar” geniş inkişaf edərdi.
“Bu gün Mərkəzi Bank valyuta hərraclarına çıxmır, belə ki, bütün imkanlarını bitirib, hərraclara ancaq Neft Fondu çıxır. Çox şey də “qara qızıl”ın qiymətindən asılıdır. Əgər neft 40 dollar həddində qalsa manat sabit olaraq qalacaq, əgər neftin dəyəri ensə o zaman milli valyutanı da katklizimlər bürüyəcək”. Ekspert bununla manatın pespektivi haqda fikrini bildirib.
F.Əlizadə bunu da qeyd edib ki, nə qədər ki, bazarla Mərkəzi Bank arasında 4%-lik marja var, rəsmi kurs belə müəyyən edilir, “üzən məzənnə” rejiminə keçid real olmayacaq.
“Dollar kreditləri” sahəsindəki durum sosial gərginliyə gətirə bilər
“Xarici valyutada gəliri olmayan bu insanlar bir il ərzində manatın məzənnəsində baş verən kəskin ucuzlaşmadan sonra indi xarici valyutada olan bu kreditləri ödəyə bilmirlər”. “Yeni Müsavat” qəzeti bunu dollar kreditləri sahəsindəki durumla bağlı yazır. Keçən ilin 21 dekabr devalvasiyasına qədər krediti aylıq 200 manatla bağmağın mümkünlüyünü yazan qəzet ondan sonra buna 400 manat pul lazım gəldiyini bildirir. Həm də bunun özünü real saymır.
“Banklara gəlincə, bankların da vəziyyəti ağırlaşır, kreditlərin qaytarılmaması bankları iflic hala sala bilər”. Bununla qəzet bankların da əlverişli durumda olmadığını nəzərə çatdırır.
“Bir sözlə, bu gün bu sahədə tam anlaşılmaz bir özfəaliyyət hökmranlıq edir, bu vəziyyət sonda ölkədə sosial gərginliyin artması ilə nəticələnə bilər. Fikrimizcə, dollarla kredit almış olanlara manatın məzənnnəsindəki dəyişikliklər kompensasiya edilməlidir”. Bu, çıxış yolu olaraq göstərilir.
Ekspertlər isə daha bir çıxış yolu göstərirlər. “Banklar tərəfindən xarici valyutada kreditlərin verilməsi qadağan edilməlidir, Konstitusiyanın tələblərini pozaraq vətəndaşları xarici valyutada kredit götürməyə təhrik etmiş bank rəhbərləri məsiliyyətə cəlb olunmalıdırlar”.
Rəy yaz