Prezident İlham Əliyev: «Türkiyənin müdafiə sahəsindəki uğurları Azərbaycanın da müdafiə potensialını gücləndirir»

“Biz bu gün Türkiyə xalqının yanındayıq. Bizim birliyimiz əbədidir, sarsılmazdır”,- Azərbaycan prezidenti İlham Əliyev Türkiyə-Azərbaycan Yüksək Səviyyəli Strateji Əməkdaşlıq Şurasının Ankarada iclasından sonra mətbuat konfransında deyib.

İ.Əliyev Türkiyənin paytaxtında baş vermiş terror aktını qətiyyətlə pisləyib, Türkiyə xalqına başsağlığı verib.

“Terror aktları Türkiyə dövlətini sarsıda bilməz, Türkiyə xalqının iradəsinə təsir edə bilməz. 25 ildir ki, Türkiyə və Azərbaycan birlik, həmrəylik nümayiş etdirir”, - “Anadolu” agentliyi İ.Əliyevdən sitat gətirib.

İ.Əliyev Qarabağ məsələsində dəstəyinə görə Türkiyəyə təşəkkürünü bildirib. O qeyd edib ki, məsələ ədalətli, beynəlxalq hüquqa uyğun həll edilməlidir. Sonra o, Türkiyənin müdafiə sənayesinə toxunub: “Türkiyənin bu sahədəki uğurları, əlbəttə ki, Azərbaycanın da müdafiə potensialını gücləndirir", - dövlət başçısı vurğulayıb.

Ərdoğanla görüş zamanı Transanadolu qaz kəmərinin (TANAP) reallaşması, həmçinin nəqliyyat sahəsinin inkişafı üçün yeni imkanlar müzakirə edilib.

Prezident həmçinin qeyd edib ki, dünya miqyasında Türkiyə və Azərbaycan qədər bir-birinə bağlı olan ölkələr yoxdur.  “Bizim əlaqələrimizin təməlində xalqlarımızın birliyi, qardaşlığıdır”, - o vurğulayıb.-02D-