Məhkəmə ədalətli olacaqmı?

Baku/10.11.20/Turan:   Noyabrın 11-də Ali Məhkəmənin Mülki Kollegiyası hakim Gündüz Quliyevin sədrliyilə  Milli Şuranın Koordinasiya Mərkəzinin üzvü, keçmiş deputat Gültəkin Hacıbəyliyə qarşı 85 min manat pul tələbinə dair Nəsimi Rayon Məhkəməsinin 16.09.2019-cu il tarixli qətnaməsindən verilən kassasiya şikayətinə baxacaq. Həmin saxta tələb əsasında G.Hacıbəylinin mənzili və şəxsi avtomobili üzərinə 7 ildir həbs qoyulub. Siyasətçi xanıma qarşı siyasi təqiblər onun 2011-ci ildə müxalifyönlü Ziyalılar Forumunun üzvü olması ilə başladı və ilk təzyiq vasitəsi kimi o dərs dediyi Qafqaz Universitetindən, ailə üzvləri çalışdıqları dövlət qurumlarından uzaqlaşdırıldı. 2013-cü ildə Milli Şuranın yaradılmasından sonra təqiblər daha intensiv xarakter aldı. 17.05.2013-cü il tarixində Milli Şuranın üzvünə qarşı hökumətyönlü medianın iştirakı ilə geniş qarayaxma kampaniysı və həmən ardınca çoxsaylı məhkəmə təqibləri başladı. Bu kampaniya və təqiblərdə G.Hacıbəyliyə qarşı onun 2003-2004-cü illərdə rəsmi nigahda olduğu keçmiş həyat yoldaşı Mahmud Mehdiyev, onun anası Nəhayət Məmmədova və bacısı Aynur Mehdiyevadan istifadə edilib. Öncə Nəsimi  Rayon Məhkəməsi heç bir əsas olmadan G.Hacıbəylinin 9 yaşlı oğlunu faktiki olaraq onun əlindən alıb uşağın tanımadığı və 9 il ərzində heç vaxt aliment ödəməyən atası Mahmud Mehdiyevə verilməsi haqqında qərar qəbul etdi. Daha sonra Mahmud və Aynur Mehdiyevlər G.Hacıbəyliyə qarşı Nəsimi Rayon Məhkəməsində xüsusi ittiham qaydasında iddia qaldırdılar. Məsələnin mahiyyəti ondan ibarətdir ki, Aynur Mehdiyevanın 10.06.2013-cü il tarixində DİN-in Miqrasiya və İnsan Alverinə qarşı Mübarizə İdarələri tərəfindən keçirilən birgə əməliyyat nəticəsində saxlanıldığı günün səhəri onun anası Nəhayət Məmmədova Nəsimi Rayon Məhkəməsinə ərizə ilə müraciət edərək guya 2003-cü ildə keçmiş gəlininə 50 min dollar borc pul verdiyini iddia edib. Borc müqavilərləri üzrə iddia müddətinin onlar notarial qaydada təsdiq olunduğu halda 3 il təşkil etməsinə, bu halda isə tərəflər arasında borcun verilməsini təsdiq edən heç bir sənəd, sübut, notarial qaydada bağlanmış borc müqaviləsinin olmamamasına baxmayaraq məhkəmə bu əsassız və saxta iddia ərizəsini icraata qəbul edib və köhnə tarixlə Gültəkin Hacıbəylinin bütün əmlakının üzərinə köhnə tarixlə həbs qoyub.

Gültəkin Hacıbəyli “Azadlıq” qəzetinə verdiyi 05.07.2013-cü il tarixli müsahibəsində Daxili İşlər Nazirliyinin Mətbuat Xidmətinin 13.06.2013-cü il tarixli rəsmi məlumatına istinadən Aynur Mehdiyevanın insan alveri faktına görə saxlanıldığını və hakimiyyətin onun azadlıqda qalması qarşılığında ailəsilə birlikdə ona qarşı təqib aləti kimi istifadə edildiyini göstərmişdi. Mehdiyevlərin Hacıbəyliyə qarşı qaldırdıqları iddiada Aynur Mehdiyevanın saxlanılması inkar edilir və DİN-in rəsmi  məlumatına istinadən paylaşılan məlumata görə Gültəkin Hacıbəylinin dörd il müddətinə azadlıqdan məhrumedilməsi tələb edilirdi. Ortada insan alveri və əməyin istismarı kimi iki ağır cinayət faktı və konkret insan alverinin qurbanı olan xarici vətəndaş olduğu halda məhkəmə işi icraata qəbul edib və iki il sürən çəkişmə müddətində  xanım müxalifətçi həbslə təhdid edilib. Aynur Mehdiyevanın insan alveri cinayətinin Filippindən olan qurbanı təkliflər və təhdidlər qarşısında susmadığı və iş beynəlxalq mahiyyət qazandığı üçün nəticədə Aynur Mehdiyevanı cinayət məsuliyyətindən tam şəkildə yayındırmaq mümkün olmadı.  Bakı Ağır Cinayətlər Məhkəməsinin 22 may 2014-cü il tarixli hökmü ilə o iki ağır cinayət- insan alveri və əməyin istismarının törədilməsində təqsirli bilinərək  8 il 6 ay müddətinə azadlıqdan məhrumetmə cəzasına məhkum edildi, lakin özünün və ailəsinin “xidmətləri” nəzərə alınaraq azadlıqdan məhrumetmə cəzası bir il şərti cəza ilə əvəzləndi. Mahmud Mehdiyev Baş prokuror Zakir Qaralovun 18 iyun 2010-cu il tarixli intizam məsuliyyətinə cəlbetmə haqqında əmri ilə hərbi xidmətdən yayınmağa və prokurorluq orqanı əməkdaşına yaraşmayan hərəkətlərə görə Ağdaş rayon prokurorluğunun müstəntiqi vəzifəsindən azad edilib. Lakin “xidmətləri” qarşılığında o da “Prokurorluq haqqında”   Azərbaycan Respublikası Qanununun 29-cu maddəsinə zidd olaraq Zakir Qaralovun  22 yanvar 2014-cü il tarixli əmri ilə Xətai rayon prokurorluğuna müstəntiq vəzifəsinə təyin edib.

Nəhayət Məmmədova Gültəkin Hacıbəyliyə qarşı pul iddiasından 2018-ci ilin yanvar ayında dəfələrlə məhkəməyə gəlməyib imtina etsə də 2019-cu ilin fevral ayında, Milli Şuranın izdihamlı 19 yanvar mitinqindən sonra müxalifətə qarşı başladılan yeni təqib kampaniyasında bu iddia yenidən bərpa edilib və bu dəfə artıq Gültəkin Hacıbəylinin üzərində 2013-cü ildən həbs olan şəxsi avtomobili məhkəmə qərarı və heç bir hüquqi əsas olmadan 28.02.2019-cu ildə zorakılıqla əlindən alınıb. Əvvəl icra olunub dörd saat sonra qəbul edilən məhkəmə qərardadından verilən şikayətə Azərbaycan məhkəmələri baxmaqdan imtina edib.

N.Məmmədova ilkin iddiasında G.Hacıbəyliyə borc verdiyini iddia etsə də sonra iddia tələbini dəyişərək Hacıbəyli keçmiş gəlini olduğu üçün ona borc verə bilmədiyini göstərir, ərizədə yeddi dəfə borc sözündən istifadə etdiyini savadsızlığı ilə izah edir və  guya keçmiş millət vəkilinin heç bir maddi imkanı olmadığı üçün onun üç otaqlı şəxsi mənzilini sahibinin razılığı olmadan(!) təmir etdiyini və bu məqsədlə 2003-cü ildə 50 min dollar pul xərclədiyini iddia edir, halbuki 2003-cü ilin qiymətlərilə 50 min dollara üç üçotaqlı mənzil almaq mümkün idi. G.Hacıbəylinin vəkilinin rəsmi sorğusu əsasında təmirin maliyyə ekspertizasını həyata keçirən və  faktiki təmirin ümimi xərclərinin 15 min dolları aşmadığını müəyyən edən peşəkar və nüfuzlu qiymətləndirmə şirkətinin ekspert rəyi isə məhkəmə tərəfindən, ümimiyyətlə, nəzərə alınmayıb. Məhkəmə millət vəkilinin öz şəxsi mənzilinin təmirinə  xərcləməyə heç bir vəsaiti olmadığı halda  pensiyaçı evdan qadın N.Məmmədovanın 50 min dolları hansı mənbədən əldə etməsilə bağlı suala da cavab axtarmayıb, heç bir maddi sübut, əsas, hətta hüquqi əsaslandırma olmadan iddia müddəti 10 il öncə ötmüş iddianı təmin edib.

Gültəkin Hacıbəyliyə qarşı illərdir davam edən təqib kampaniyası onun yeganə övladından da yan keçməyib. 16 yaşlı Toğrul 2011-ci ildən etibarən ölkədən çıxış yasağı ilə üz-üzədir. Hal-hazırda 11-ci sinif şagirdi olan yeniyetmənin xaricdə təhsil alması üçün qaldırılan iddialar Nəsimi Rayon Məhkəməsi tərəfindən heç bir əsas göstərilmədən rədd edilir. Sonuncu dəfə belə iddia Nəsimi Rayon Məhkəməsinin 26.10.2020-ci il tarixli iclasında hakim Ramin Xəlilovun sədrliyilə baxılaraq rədd edilib. Məhkəmənin bu zaman atanın hüquqlarına istinad etməsi də əsassızdır, çünki ata – Mahmud Mehdiyev məhkəmələrdə bir qayda olaraq iştirak etmir və Nəsimi Rayon İcra və Probasiya Şöbəsinə ünvanladığı 24.10-2014-cü il tarixli ərizəsində “oğlu ilə görüşməyə vaxtı olmadığı üçün icra işini Ali Məhkəməyə qaytarmağı” və onu bir daha görüşə görə narahat etməməyi xahiş edir. Buna baxmayaraq Azərbaycan məhkəmələri bu qənaətdədirlər ki, müxalifət rəhbərinin oğlu ölkədən çıxa və xaricdə təhsil ala bilməz. 

Gültəkin Hacıbəyliyə qarşı məhkəmə təqibilə paralel olaraq digər təzyiq və təhdid metodlarından da istifadə edilir. Onun ABŞ və AB diplomatları ilə şəxsi söhbətləri qanunsuz bir şəkildə yazılaraq ölkə mətbuatında yayılıb, mobil telefon nömrələri davamlı şəkildə müxtəlif eskort saytlara yerləşdirilir, sosial şəbəkə hesabları dəfələrlə kibercinayət yolu ilə ələ keçirilib və dağıdılıb.      

Xatırladaq ki, Milli Şuranın bütün rəhbərliyinə qarşı sistemli şəkildə müxtəlif təhdid və təqib vasitələrindən istifadə edilir, Milli Şuranın fəaliyyətinə ciddi əngəllər yaradılır. Milli Şuranın qapalı və qeyri-rəsmi ZOOM toplantılarının kibercinayət yolu ilə əldə edilərək yayılması və qarayaxma kampaniyasına hədəf edilməsi, Milli Şuranın toplantılarının keçirilməsinə imkan verilməməsi, bu toplantıların keçirilməsi üçün şərait yaradan mülk sahiblərinin təqib edilməsi buna əyani sübutdur.

Milli Şuranın Koordinasiya Mərkəzinin üzvləri hüquq müdafiəçisi Leyla Yunus və AXCP sədrinin müavini Gözəl Bayramlı ağır xəstə olduqları bilindiyi halda şərlənərək azadlıqdan məhrum edilib və uzunmüddətli həbs həyatı yaşayıblar. Nəticədə, həbs olunduqdan sonra üç ay müddətində dərmanları ilə təmin edilməyən Gözəl Bayramlının sağlıq durumu kritik həddə ağırlaşmış, o, xərçəng xəstəliyinə yoluxmuş və 08.10.2020-ci il tarixində vəfat etmişdir. Milli Şuranın Koordinasiya Mərkəzinin üzvü “Turan” İnformasiya Agentliyinin rəhbəri Mehman Əliyev də ictimai-siyasi fəaliyyətinə görə şərlənib həbs edilənlər sırasındadır. Milli Şuranın rəhbərlərindən daha biri- hüquq müdafiəçisi Oqtay Gülalıyev dəfələrlə rəsmi və qeyri-rəsmi səviyyələrdə edilən təhdid və xəbərdarlıqlara baxmayaraq prinsipial siyasi və hüquq müdafiəçiliyi fəaliyyətindən imtina etmədi və 29.10.2019-cu il tarixində müəmmalı şəkildə avtomobil qəzasına uğradı. Nəticədə, O.Gülalıyev bir ildən çoxdur ki, komadan ayıla bilmir.  Milli Şuranın sədri professor Cəmil Həsənlinin öncə qızı törətmədiyi avtomobil qəzasına görə məhkum edildi, hal-hazırda isə ölvadı İbrahim Həsənli ABŞ-da bil illik təhsildən sonra Bakıdakı orta məktəbə bərpa edilmir və təhsildən kənar qalıb.

Koordinasiya Mərkəzinin üzvü, AXCP sədri Əli Kərimliyə Avropa Məhkəməsinin qərarına rəğmən 15 ildir xarici pasport verilmir və o ölkədən çıxa bilmir. Bütün müavinləri, köməkçiləri, sürücüləri saxta ittihamlarla həbs həyatı yaşayan Əli Kərimliyə qarşı 13.04.2020-ci il tarixindən daha bir qeyri-adi təqib mexanizmi işə salınıb- Ə.Kərimli internet istifadə etmək imkanından məhrum edilib, özünün və ailə üzvlərinin mobil telefonları isə hər gün yalnız 10.00- 20.00 saatlarında açıq olur. Digər vaxtlar AXCP sədri və ailəsi ətraf aləmlə kommunikasiya imkanlarından tam məhrum edilir. Əli Kərimli və Mili Şura KM daha bir üzvü İbrahim İbrahimli 19.10.2019-cu il tarixində keçirilən Milli Şuranın etiraz aksiyası zamanı polis tərəfindən ağır və amansız işgəncələrə məruz qalıblar. İşgəncə nəticəsində Əli Kərimlinin başı alın nayihəsindən partlamış, alnına 9 tikiş qoyulmuş, bədəninə 20-dən çox ciddi xəsarət yetirilmişdir. Boğulma nəticəsində İbrahim  İbrahimlinin boğazının vətəri qırılmış və o, danışıq qabiliyyətini uzun müddət itirmişdir. İstiqlalçı deputat İ.İbrahimlinin danışıq qabiliyyəti yalnız bu yaxınlarda keçirilən cərrahiyyə əməliyyatından sonra qismən bərpa edilib.

Milli Şuranın Koordinasiya mərkəzinin üzvü Tofiq Yaqublu müxalif siyasi fəaliyyətinə görə 3 dəfə cinayət təqibi, 33 dəfə inzibati qaydada həbs edilib, dəfələrlə işgəncələrə məruz qalıb. Onu 19.10.2019-cu il mitinqi zamanı həbs edib ağır işgəncələrə məruz qoyublar, Milli Şuradan uzaqlaşmayacağı halda oğlunu öldürməklə və uzunmüddətli həbslə təhdid ediblər. 2020-ci ilin mart ayında Azərbaycan hakimiyyətinin Covid -19 pandemiyasından sui-istifadə edərək öz siyasi opponentlərinə qarşı başlatdığı siyasi təqib kampaniyasının ilk qurbanı olaraq Tofiq Yaqublu yenidən şərlənib həbs olunub.

MŞ KM üzvü, ədliyyə generalı Vidadi Mirkamal Milli Şuranın Koordinasiya Mərkəzinin toplantılarını öz bağ evində təşkil etdiyi üçün dəfələrdə hüquq-mühafizə orqanları tərəfindən təhdid edilib və ona qarşı ölkə mətbuatı üzərindən çirkli qarayaxma və şərləmə kampaniyaları həyata keçirilib.    --0--