Məhkəmə Fuad Əhmədlini həbsdə saxlayıb

Bakının Nəsimi rayon məhkəməsi sentyabrın 8-də müdafiə tərəfin Azərbaycan Xalq Cəbhəsi Partiyasının fəalı Fuad Əhmədli barəsində həbs qətimkan tədbirinin ev dustaqlığı ilə əvəz edilməsi haqqında vəsatətini təmin etməyib. Bu barədə Turan-a onun vəkili Əsabəli Mustafayev bildirib.

Onun sözlərinə görə, müdafiə tərəfi Əhmədlinin səhhətində ciddi problemlər və onun istintaq təcridxanasında saxlanılmasının həyatı üçün təhlükəli olması haqqında tibbi arayışları məhkəməyə təqdim edib.

Amma hakim Şəlalə Həsənova müdafiə tərəfin dəlillərini diqqətə almayıb. Vəkil bu məhkəmə qərarından apellyasiya vermək niyyətindədir.

Əhmədli ağ ciyər xəstəliyindən əziyyət çəkir.

Doğmalarının sözlərinə görə, həbsindən bir müddət əvvəl fəal pnevmotoraksla (ağ ciyər səthinin zədələnməsi nəticəsində plevral boşluğa hava daxil olması) əlaqədar əməliyyat keçirib. Bu xəstəlik tənəffüs çətinliyi, öskürək, fiziki yükə tab gətirmənin azalmasına səbəb olur. İstintaq təcridxanası şəraitində sıxlıq və havalandırmanın pis olması ilə əlaqədar xəstəlik ağırlaşır. Əhmədli həbsin ilk günlərində, Dövlət Təhlükəsizlik Xidmətinin istintaq təcridxanasında saxlanılarkən artıq "təcili yardım" çağırıb.

Əhmədli avqustun 18-də saxlanılıb. Avqustun 19-da axşam Azərbaycan Dövlət Təhlükəsizlik Xidməti və Baş Prokurorluq Əhmədlinin işi ilə bağlı birgə bəyanat yayıb. Press-relizdə deyilirdi ki, Əhmədli işlədiyi "Azərfon" mobil rabitə şirkətinin abunəçilərinin şəxsi məlumatlarının yayılmasında ittiham olunur. Əhmədliyə qarşı əməliyyat-axtarış fəaliyyəti haqqında qanunvericiliyi pozmaq və vəzifə səlahiyyətlərindən sui-istifadə ittihamları irəli sürülüb. Hüquq-mühafizə orqanlarının iddiasına görə, Əhmədlinin mənzilində axtarış zamanı qanunvericiliklə qadağan olunmuş dini ədəbiyyat və CD disklər, Fətullah Gülənin çıxışları olan vərəqələr tapılıb. Avqustun 23-də hüquq-mühafizə orqanları Əhmədlinin işinin digər AXCP fəalı, Gülən təşkilatı ilə əməkdaşlıqda şübhəli bilinən Faiq Əmirovun işi ilə bir icraatda birləşdirildiyini bildirib.

AXCP-də bu ittihamları təkzib edirlər və siyasi motivlərlə saxta ittihamlar irəli sürüldüyünü bildirirlər. -06D-