Məhkəmə Xədicə İsmayılovanı 2,5 min manat cərimə edib (YENİLƏNİB)

Bazar ertəsi Kürdəxanı istintaq təcridxanasında keçmiş müxalifətçi Elman Həsənovun (Türkoğlu) jurnalist Xədicə İsmayılovaya qarşı iddiası üzrə məhkəmə başa çatıb. Binəqədi rayon məhkəməsinin hakimi Sədrəddin Hacıyev jurnalisti 147.2-ci (böhtan) maddə ilə təqsirli bilib və 2500 manat cərimə edib, xəbəri Turan-ın müxbiri verib. Hakim jurnalistləri prosesə buraxmayıb və onlar hökmü vəkil Elton Quliyevdən öyrəniblər.

Xatırladaq ki, Elman Həsənov hüquq-mühafizə orqanlarının “tövsiyəsi” ilə (özü etiraf etdiyinə görə) İsmayılovanın onu təhqir etdiyini göstərdiyi iddia verib. Jurnalist onun Milli Təhlükəsizlik Nazirliyinin casusu olduğu haqqında sənədi dərc etməklə guya onu təhqir edib. Lakin jurnalistin dərc etdiyi sənəddə Həsənovun adı yox idi. Bu sənəd iki il əvvəl sosial şəbəkələrdə yayılıb və keçmiş MTN zabiti, hazırda siyasi mühacit olan Ramin Nağıyev tərəfindən dərc edilib.

Jurnalistin vəkili bugünki məhkəmə qərarını “qanunsuz və ədalətsiz” adlandırıb və apellyasiya şikayəti vermək niyyətindədir.

Xatırladaq ki, Xədicə İrmayılovaya qarşı bir neçə iddia verilib və onun barəsində bir neçə cinayət işi aparılır. Elman Həsənovun iddiasından sonra İsmayılovanın onu özünü öldürmə həddinə çatdırdığı haqqında jurnalist Tural Mustafayevin iddiası ortaya çıxdı.

İstintaq bu absurd ittihamı əsas kimi götürüb və İsmayılova həbs edilib. O, artıq həbsdə olarkən prokurorluq ona qarşı yeni mənimsəmə, vergidən yayınma, vəzifə səlahiyyətlərini aşma ittihamları irəli sürüb.

İndi hakimiyyət yenidən başlanğıc iddiaya qayıdıb və məhkəməni İsmayılovanın ötən il dekabrın 5-dən saxlanıldığı İstintaq Təcridxanasında keçirib.

Beynəlxalq və yerli ictimaiyyət İsmayılovanı vicdan məhbusu hesab edir və onun təqib edilməsinin əsas səbəbinin hakim ailənin və digər yüksək səviyyəli məmurların korrupsiya faktları haqqında araşdırmaları olduğundan əmindir. -16/03В-

2015 Fevral 23 (Bazar ertəsi) 13:09:19

Həbsdə olan jurnalist Xədicə İsmayılın bazar ertəsi Kürdəxanı təcridxanasında gözlənilən məhkəmə prosesində iştirak etmək istəyən bir qrup jurnalist Binəqədi məhkəməsində qəribə vəziyyətlə üzləşib.  

Belə ki, Binəqədi Rayon Məhkəməsinin hakimi Sədrəddin Hacıyev məhkəmə prosesində iştirak etmək istəyən jurnalistlərə qeydiyyata düşmək üçün bazar ertəsi saat 10:00-da rayon məhkəməsinin önündə toplaşmağa çağırıb.

Bazar ertəsi jurnalistlər məhkəmə binası önünə toplaşsalar da hakim və köməkçiləri gözə dəyməyiblər. Bir az sonra məlum olub ki, hakim S.Hacıyev məhkəməyə gedib. Jurnalistlər vəziyyəti rayon məhkəməsinin kargüzarlıq şöbəsinin müdiri Azər adlı şəxsə anladıblar. O da öz növbəsində hakimin köməkçisi Anar adlı şəxslə danışacağını jurnalistlərə bildirib. Yarım saata yaxın vaxt keçsə Azər adlı şəxsdən xəbər çıxmayıb. Nəhayət, bir qədər keçdikdən sonra Azər görünərək Anarın hələ tualetdə olduğunu və çıxmadığını elan edib. Bundan sonra jurnalistlər Kürdəxanı təcridxanasına gedərək hakimi təcridxana önündə gözləməyə başlayıblar, burada da məlum olub ki, məhkəməyə getdiyi deyilən hakim S.Hacıyev hələ təcridxanya gəlməyib.

Cümə günü Kürdəxanı təcridxanasında Elman Həsənli adlı şəxsin jurnalist Xədicə İsmayıla qarşı şərəf və ləyaqətin tapdanması barədə iddiasına baxılıb. Müdafə tərəfi iddianı əsassız sayıb, qapalı şəkildə təcridxanada keçirilməsinə etiraz edib. Amma hakim bütün deyilənləri qulaqardına vuraraq təcridxanada məhkəmə prosesini keçirib. X.İsmayıla danışmaq üçün söz verilsə də jurnaıist buna hazır olmadığını deyib və proses bazar ertəsi, fevralın 23-nə təyin edilib.-05B-