Məhkəmədə futbolçunun jurnalistin qətlində iştirakı haqqında işə baxılıb

Jurnalist Rasim Əliyevin qətlində əli olmaqda ittiham olunan futbolçu Cavid Hüseynovun işi üzrə məhkəmə prosesi aprelin 6-da davam edib.

Bu gün Səbail rayon məhkəməsində futbolçunun özünün, anasının və şahidlərin, habelə Rasim Əliyevin anasının ifadələri dinlənilib.

Cavid Hüseynov yenə öz təqsirini inkar edərək, qohumlarını jurnalistlə münasibətləri aydınlaşdırmağa göndərmədiyini bildirib.

Lakin vəfat etmiş jurnalistin anası Teyfurə Əliyeva onun dəlillərini qəbul etməyib, Rasimin döyüldüyü gün Cavidin ona 1-2 dəfə zəng etdiyini, daha sonra onun qohumu Elşən İsmayılovun zəng etdiyini bildirib.

Əliyeva Elşənin Rasimlə guya jurnalistin onun anası haqqında pis söz işlətdiyi üçün onunla hesablaşmağa getdiyi haqqında iddialarını da təkzib edib.

“Oğlum belə bir şey deyə bilməzdi”, deyə o bildirib.

Futbolçunun anası Xalidə Hacıyeva qeyd edib ki, Cavid qohumlarının jurnalistlə görüşündən xəbərsiz idi və onun döyüldüyünü internetdən öyrənib.

Teyfurə Əliyeva həmçinin bildirib ki, həmin gün Cavid Hüseynov Rasimin yatdığı xəstəxanaya gəlib. O, həkimlərlə nə barədəsə danışıb. Amma polis və prokurorluq işçiləri gəldikdə o, xəstəxananı tərk edib.

Hüseynov bildirib ki, həkimlərlə Rasim haqqında heç nə danışmayıb.

Növbəti iclas aprelin 13-də keçiriləcək.

Jurnalist Rasim Əliyev avqustun 8-də bir qrup şəxs tərəfindən döyülüb və avqustun 9-na keçən gecə xəstəxanada dünyasını dəyişib. Jurnalistin döyülməsində təqsirləndirilən beş nəfərin məhkəməsi bu günlərdə yekunlaşıb və onlar 9 ildən 13 ilə qədər həbs cəzası alıblar.

Cavid Hüseynov isə CM-nin 307.1-ci (ağır cinayətin hazırlanmasını və ya törədilməsini bilib xəbər verməmə) və 307.2-ci (ağır cinayəti gizlətmə) maddələrilə ittiham olunur. -0-