Mehman Qələndərovun ölümünün nəticələrini hamı hiss edəcək (YENİLƏNİB)

Bakı/30.04.17/Turan: Təcridxanada dünyasını dəyişən siyasi məhbus Mehman Qələndərovun dəfn edildiyi yer məlum olduqdan sonra bazar günü jurnalistlər, ictimai və siyasi xadimlər onun xatirəsini anmaq üçün qəbiristanlığa gediblər.

O, təcridxananın yaxınlığında gizlicə dəfn edilib. 

Rəsmi versiyaya görə, M.Qələndərov kamerada intihar edib. Ancaq hüquq müdafiəçiləri buna şübhə ilə yanaşırlar və hesab edirlər ki, onu öldürüblər.

“Mehman Qələndərov bu gün səhər Kürdəxanı qəsəbəsində valideynlərinin yanında dəfn edilib. Onu kimin dəfn etdiyi məlum deyil. Çünki qohumları danışmaqdan çəkinirlər, çox güman ki, onları qorxudublar. Əldə etdiyimiz məlumata görə, dünən axşam qəbiristanlıq işçilərinə tapşırılıb ki, qəbir qazsınlar. Ancaq onlara bugünkü dəfnin vaxtı və mərhumun kimliyi barədə məlumat verməyiblər. Dəfn mollasız keçib.

Mehmanın valideynlərinin məzarının ətrafına dağılmış torpaq  göstərir ki, onu qohumları dəfn etməyiblər. Məzarların üstündəki torpaq da yığışdırılmayıb”,- hüquq müdafiəçisi Oqtay Gülalıyev bildirib.

“Fikrimcə, bu, intihar deyil”,- O. Gülalıyev vurğulayıb.

“Mehman Qələndərov psixoloq idi və vəziyyəti adekvat dəyərləndirirdi. O, Qiyas İbrahimov və Bayram Məmmədovun həbsinə etiraz olaraq keçirilən aksiyalarda iştirak edib. Və onları dəstəkləyən status yazdıqdan sonra həbs edilib. Onun işgəncə nəticəsində ölməsi istisna olunmur. Həbs zamanı polislər ona hədə-qorxu gəliblər ki, türmədən sağ çıxmayacaq. Bu da nəticə. Əldə etdiyimiz məlumata görə, faciə baş verən zaman Mehmanın kamera yoldaşı hamamda olub. Guya elə o vaxtda da intihar edib, mələfə ilə özünü asıb. Mehmanın ölüm işinin araşdırılması üçün müstəqil jurnalistlər, hüquq müdafiəçiləri, ictimaiyyət nümayəndələrindən ibarət ictimai komitə yaradılmalıdır”, - O.Gülalıyev bildirib.

“Mehman Qələndərovun dəfni gizli olub”, - hüquq müdafiəçisi Taleh Xasməmmədov Turan-a bildirib. “Bu, onun intihar etməsilə bağlı şübhə doğurur. Əgər intihar etsəydi məsul şəxslər bunu sübut edə bilərdilər- onun fotosunu çəkərdilər, kamera yoldaşından ifadə alardılar və bunları ictimaiyyətə təqdim edərdilər. Ancaq bunu etməyiblər. Mən bilmirəm, ekspertiza keçirilib ya yox. Ancaq istənilən halda bunu intihar adlandırmaq olmaz. Dünən Penitensiar Xidmət bildirib ki, Mehman sağ-salamatdır, hər şey normaldır. Sonra onun cəsədinin morqda olması barədə məlumatı təkzib edib”,- T.Xasməmmədov vurğulayıb.

“Sarsıdıcı hadisədir”, - Turan agentliyinin direktoru Mehman Əliyev bildirib.

“Son vaxtlar hakimiyyət azad mətbuata daha çox təzyiq göstərir. Saytların bloklanması, jurnalistlərin, blogerlərin həbsi yeni təqib dalğasının gəlişindən xəbər verir. Hakimiyyət sanki söz azadlığını tamamilə boğmaq istəyir. Münasibət çox aqressivdir. Təcili və gizli dəfn, yaxınlara dəfndə iştirakı, yas mərasimi keçirməyi qadağan etmək kimi halların olduğunu xatırlamıram. Əvvəllər belə şeylər olmayıb. Bu, çox pis tendensiyadır. Bütün ölkədə əks-səda doğuracaq, xalqa, hətta bu cür halları törədənlərə sirayət edəcək”, - M.Əliyev vurğulayıb.

Azərbaycan Baş Prokurorluğu Mehman Qələndərovun ölümü ilə bağlı bəyanat yayıb.  Bəyanatda deyilir ki, Mehman Hüseyn oğlu Qələndərovun ölüm faktı üzrə CM-in  125-ci maddəsilə (ölüm həddinə çatdırma) cinayət işi qaldırılıb, istintaq gedir.–0—

*   *   *

2017 Aprel 30 (Bazar) 19:32:19

Mehman Qələndərov ictimaiyyətdən gizli dəfn edilib

Bakı/30.04.17/Turan: Kürdəxanı təcridxanasında intihar edən siyasi məhbus Mehman Qələndərov bazar günü səhər yanında ki qəbiristanlığında öz valideynlərinin yanında dəfn edilib. Dəfn ictimaiyyətdən gizli keçirilib.

Bu barədə hüquq müdafiəçisi Oqtay Gülalıyev öz Facebook səhifəsində yazıb:

“Mehman Qələndərovun həyatına Kürdəxanı İstintaq Təcridxanasında son qoyuldu. Həmin təcridxananın yanında da gizlicə dəfn edildi. Onun ölümünə səbəb olub onu gizlicə dəfn edənlər elə bilməsinlər ki, onların bu cinayəti ört- basdır ediləcək.   Biz onların ifşa olunub cəzalandırılması üçün əlimizdən gələni edəcəyik”.

O.Gülalıyev xatırladıb ki, M.Qələndərov “Kral istəmirik!”, “Gəlin, hamımız Qiyas olaq!” (Qiyas İbrahimov və Bayram Məmmədov Heydər Əliyevin abidəsinə şüarlar yazandan sonra həbs olunublar) və s. şüarları ilə keçirilən aksiyaların təşkilatçısı olub.

Aprelin 28-də Kürdəxanı təcridxanasında  onun meyidi aşkarlanıb.

M.Qələndərov fevralın 7-də narkotik maddənin qanunsuz dövriyyəsi ittihamı ilə həbs edilmişdi.—06D--