![Mərkəzi Bank 8 faiz, müstəqil iqtisadçı ikirəqəmli inflyasiya gözləyir](https://turan.az/resized/media/2023/main/020200057716-750-500-resize.webp)
Mərkəzi Bank 8 faiz, müstəqil iqtisadçı ikirəqəmli inflyasiya gözləyir
Azərbaycan Mərkəzi Bankı bildirib ki, baza ssenari üzrə fərziyyələr sabit qalarsa, 2023-cü ildə illik inflyasiyanın 8 faiz ətrafında olacağı gözlənilir. Ötən il inflyasiyanın rəsmi 14 faiz civarında olduğu açıqlanıb. Hərçənd müstəqil iqtisadçılara görə, bu, 40 faizdən az deyil.
Beynəlxalq Valyuta Fondunun proqnozlarına görə isə, qlobal inflyasiyanın səviyyəsi 8.8 faizdən 6.6 faizə düşəcək.
Milli Məclisin İqtisadi siyasət, sənaye və sahibkarlıq komitəsinin üzvü, iqtisad elmləri doktoru Rüfət Quliyev "Turan"a bildirib ki, 2023-cü ilin büdcə sənədlərində inflyasiya 6.9 faiz qeyd olunub: "Bütün dünyada inflyasiya artımının templəri zəifləyir. Dünya Bankının ekspertləri bunun 4-6 faiz civarında olduğunu proqnozlaşdırır. Amma burada ekspertlər nominal inflyasiya barəsində söhbət getdiyini bildirir".
Onun sözlərinə görə, inflyasiya ilə mübarizənin klassik sxemi uçot dərəcəsinin artırılmasından ibarətdir: "Biz də uçot dərəcəsini qaldırırıq. Bu, pulların dəyərini artırır və ölkədəki pul kütləsinin daralmasına gətirib çıxarır. Eyni zamanda, müəyyən vergi siyasəti həyata keçirilir ki, inflyasiyanın artımı zəifləsin. Digər tərəfdən, Maliyyə Nazirliyi antidövrilik siyasətini aparır. Bütün bunlar öz effektini verir".
O əlavə edib ki, dövlət dollar və manat paritetini saxlamağa çalışır: "Bütün bunları nəzərə alaraq, inflyasiyanın 8 faizə qədər azalması mümkündür. Amma dövlət tənzimləməsi öz nəticəsini versə də, inflyasiya ilə mübarizədə əsas rol yerli istehsallı mallar və xidmətlərin bolluğudur. Bu mənada kənd təsərrüfatı, kiçik və orta biznes üçün kreditlər daha əlçatan olmalıdır".
İqtisadçı Rəşad Həsənov da AzadlıqRadiosuna bildirib ki, 2023-cü ildə həm dünyada, həm Azərbaycanda inflyasiyanın azalması təbii bir proses olacaq: "Buna "baza effekti" deyirlər. 2022-ci ildə kəskin qiymət artımı olub və bundan sonra bazarda yeni tarazlıq istiqamətində hərəkət formalaşıb. Ona görə ki, alıcılıq aşağı düşüb, imkanlar məhdudlaşıb və şirkətlər məcburən qiymət siyasətində daha ehtiyatlı davranmağa çalışırlar".
Ekspertin sözlərinə görə, 2023-cü ildə inflyasiya ötən illə müqayisədə aşağı düşsə də, onun ikirəqəmli olması ehtimalı daha üstündür: "Çünki ötən dövr ərzində istehsal qiymətlərinin indeksi daha çox yüksəlib -məhsulların maya dəyəri daha böyük həcmdə artıb və biz bunu bütün məhsulların üzərində, demək olar ki, görürük. Bu artımlar bazara transformasiya olunmayıb, proses tam bitməyib, belə bir təzyiq qalmaqdadır".
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz