Məscid var, ibadət yox

Binəqədi rayonundakı “Heydər məscidi”nin açılışından iki aya yaxın vaxt keçsə də məscid hələ fəaliyyətə başlamayıb.

Bunun səbəbləri hələ də bəlli deyil. Məscid Bakı Şəhər İcra Hakimiyyətinin tabeliyindədir. Bakı Şəhər İcra Hakimiyyəti isə indiyə kimi məscidin idarəçiliyi barədə hansı tədbirlərin görülməsi haqda ölkə ictmaiyyətinə açıqlama verməyib. Bu məscidin bələdiyyə tabeliyinə verilməsi kimi fikirlər də dolaşır. Məsələ ilə bağlı Qafqaz Müsəlmanları İdarəsindən şərh almaq mümkün olmayıb. Adının çəkilməsini istəməyən dindarlardan biri isə bunu anormal qarşılayıb. “Məscid Allahı zikr etmək, ibadət edərək ruhun sakitliyi üçündür. Əgər bir məsciddə ibadət olmayacaqsa, Allah zikr edilməyəcəksə o, yalnız bina olur, daş-divar olur, məscid olmur”, - dindar Turan-a bildirib.

“Heydər” məscidinin tikintisinə 2012-ci ildən başlanılıb, 2014-cü ilin dekabrında rəsmi açılışı olub.-05D-