Mətbuat İcmalı

Rəsmi və iqtidaryönlü qəzetlər birinci səhifələrində prezidentin müxtəlif sərəncamlarını dərc ediblər. Bu qəzetlərin digər səhifələrində isə Heydər Əliyevlə bağlı müxtəlif dövlət strukturları rəhbərlərinin və alimlərin birsəhifəlik tərif dolu çoxsaylı xatirə məqalələri, Avropa Oyunlarına hazırlıqlar barədə məlumatlar dərc edilib. 

Müxalifətyönlü qəzetlər isə müxalifət və QHT fəallarının məhkəmə prosesləri, Avropa Qonşuluq Siyasəti, Gürcüstanla Ermənistan arasında diplomatik gərginlik, Azərbaycan məmurlarına qarşı sanksiya çağırışlarlı, neftin qiyməti, dolların məzənnəsi və s. mövzularda yazıları baş məqalə yerində dərc ediblər.

Azadlıq 

“Repressiya dalğası davam edir” başlıqlı məlumatda deyilir ki, son günlər həbsdə olan jurnalist Xədicə İsmayılın qohumları işdən çıxarılır. Bir-birinin ardınca jurnalistin bacısının qaynının iki oğlu, baldızlarının  qızı və oğlu heç bir səbəb göstərilmədən işdən azad edilib.    

“Sanksiya çağırışları məmurları təşvişə salıb” yazısında deyilir ki, Azərbaycan məmnurları xarici  banklardakı pullarını çıxarmağa başlayıb. Qəzet hakimiyyətdəki mənbələrinə isnad edərək hətta bəzi  məmurların xarici ölkələrdəki bizneslərini də dondurduğunu yazır. Amma qəzet konkret adlar çəkmir.

Qəzet virtualaz.org saytına isnadən Nazirlər Kabineti yanında Dövlət Bayraq Meydanının sabiq rəisi, “Azimport” şirkətinin faktiki sahibi Rəşad Məmmədovun vətəndaşlara və dövlətə milyonlarla manat ziyan vurduğunu bildirir. V.Məmmədov qulluq mövqeyindən istifadə edərək biznes maraqlarını yerinə yetirib.

“AQ İnşaat” şirkətinin Bakıda Rəşid Behbudov küçəsi, 146 ünvanında yerləşən çoxmərtəbəli binada yaşayan hər bir ailədən qanunsuz olaraq 1600 manat pul yığmasından 3 il keçməsinə baxmayaraq, sakinlərə hələ də qaz verilmir.

Kənd təsərrüfatı naziri Heydər Əsədov ölkədə kənd təsərrüfatı təyinatlı torpaqların məmurlar və digər şəxslər tərəfindən qanunsuz olaraq zəbti ilə bağlı araşdırma apararaq ölkə rəhbərinə məlumat hazırlayıb.  Məlum olub ki, 30 faiz kənd təsərrüfatı təyinatlı torpaqlar təyinatı üzrə istifadə olunmur, 20 faiz kənd təsərrüfatı təyinatlı torpaqlar isə ümumiyyətlə istifadə olunmur və ya münbitliyini itirib.     

“Azərbaycanlı oliqarx super sualtı qayıq aldı” məlumatında deyilir ki, ABÇ-ın “DeepFight” şirkəti mayın 6-da azərbaycanlı oliqarx və gəmiçilik maqnatı Mübariz Mənsimovun “Palmarina-Bodrum” şirkətinin sifarişi əsasında hazırladığı “DeepFight Super Falcon” yüksək sürətli özəl sualtı qayığını sifarişçiyə çatdırdığını elan edib.

Yeni Müsavat

Dünya Azərbaycanlıları Konqresinin Daimi Şurasının sədri Əjdər Tağızadə müsahibəsində “DAK yoxdur, DAK-ın skeleti var” deyərək təşkilatın həmsədri Sabir Rüstəmxanlını ittiham edib. O, DAK-ın Türkiyədə  keçirilən qurultayını şou adlandırıb. “DAK faktiki olaraq Güneyin (İranda yaşayan azərbaycanlılar, Güney Azərbaycan-red) problemindən uzaq ölü bir təşkilata çevrilib”, - o qeyd edib.   

“Avropa İttifaqı Putinin Azərbaycana qarşı planında” məqaləsində deyilir ki, Avropa İttifaqı öz məhdud maraqlarını Bakıya qəbul etdirmək üçün Rusiya ilə bir cəbhədə durmağa qərar verib. Burada Yunanıstanın DESFA qaz kəmərləri şirkətinin səhmlərinin 66 faizinin Azərbaycana satılmasından söhbət gedir. Avropa İttifaqı  və Yunanıstanın hazırkı hökuməti  bunu gecikdirir. Yunanıstan hökuməti şirkətin səhmlərinin 66 faizinin deyil, 49 faizinin satılması ilə razıdır.

Dünən Müsavat Partiyasından xaric edilmiş bir qrup insan bu partiyanın qərargahı qarşısında etiraz aksiyası keçirib. Müsavat başqanı Arif Hacılı etirazçıların iradalrını qəbul etmir. “Təşkilatımıza yeridilmiş agentura seti üzərimizə gəlir”, - o bildirib.

“Ərdoğanın Putinə ilk ciddi “soyqırım revanşı” məqaləsində deyilir ki, Türkiyə prezidenti Kreml başçısının Yerevan səfərinə görə 9 may paradını boykot edib.

Bizim Yol

ABŞ səfiri Robert Sekuta və səfir müavini Derek Hoqan səfirliyin Facebook səhifəsində Baltimorda baş verənlərlə bağlı suallara cavab verib. Səfir bildirib ki, Amerikadakı problemləri insanlarla müzakirə etmək hər zaman lazımdır. “Problemlərimizi gizlətməyə yox, onları həll etməyə çalışırıq”, - Sekuta qeyd edib.

Ali Məhkımə fevralın 21-də manatın devalvasiyası ilə bağlı verdiyi qərardan sonra dollarla banklardan kredit götürmüş  əhali manatın əvvəlki kursundan 33 faiz çox ödəməlidir. Bu isə qanunvericiliklə uzlaşmır. Konstitusiya Məhkəməsi bu gün bununla bağlı şikayətə  baxacaq. Ancaq qərarın bir ay sonra elan ediləcəyi gözlənilir.   

“Azərbaycanda yumurta, toyuq əti bahalaşacaqmı?” yazısında “quş qripi” ilə bağlı Türkiyənin bir sıra vilayətlərindən Azərbaycan diri quş, quş əti və yumurta gətirilməsinə qadağa qoyulub.

“Gələn il Neft Fondunda böhran yaranacaq” məqaləsində deyilir ki, bu ilin birinci rübündə fondun büdcə kəsiri 300 milyon manat olub. Ötən ilin avqustundan bu ilin aprelinədək Neft Fondunun ümumi aktivlərinin həcmi  3 milyard dollardan çox azalıb.

Exo 

Azərbaycanda yaşayış fondunun dəyəri 80 milyard dollara yaxındır.

Azərbaycanda kommunal xidmətlərə görə əhalinin borcu yarım milyard manat təşkil edir.  

“Azərbaycanda cinsini dəyişmək haqqında qanun lazımdırmı?” məqaləsində deyilir ki, ölkədə cinsini dəyişənlər sənədlərində də dəyişiklik etməlidir.